អភិបាលខេត្តកណ្ដាល ជឿជាក់ថា មិនថាបងប្អូនខ្មែរឥស្លាម ខ្មែរ ឬសហគមន៍ផ្សេងៗទៀត ដែលរស់នៅក្នុងប្រទេសកម្ពុជានឹងបន្តគាំទ្រគោលនយោបាយសុខដុមនីយកម្ម របស់រាជរដ្ឋាភិបាលសម្រាប់សេចក្ដីសុខ សេចក្ដីចម្រើន របស់យើងទាំងអស់គ្នាជាបន្តទៀត

កណ្ដាល៖ ឯកឧត្ដម គួច ចំរើន អភិបាលខេត្តកណ្ដាល បានជឿជាក់ថា មិនថាបងប្អូនខ្មែរឥស្លាម ខ្មែរ ឬសហគមន៍ផ្សេងៗទៀត ដែលរស់នៅក្នុងប្រទេសកម្ពុជានឹងបន្តគាំទ្រគោលនយោបាយសុខដុមនីយកម្ម របស់រាជរដ្ឋាភិបាលសម្រាប់សេចក្ដីសុខ សេចក្ដីចម្រើន របស់យើងទាំងអស់គ្នាជាបន្តទៀត។

ការលើកឡើងបែបនេះធ្វើឡើងនារសៀលថ្ងៃទី២៧ ខែកុម្ភៈ ឆ្នាំ២០២៦ ក្នុងឱកាសដែល ឯកឧត្ដម នូ សាខន ប្រធានក្រុមប្រឹក្សាខេត្តកណ្ដាល និងឯកឧត្ដម គួច ចំរើន អភិបាល នៃគណៈអភិបាលខេត្តកណ្ដាល អញ្ជើញជាអធិបតីភាពក្នុងពិធីពិសាអាហារស្រាយបួសរ៉ាម៉ាឌនថ្នាក់ខេត្ត លើកទី២ ឆ្នាំ២០២៦ នៅក្នុងបរិវេណវិហារដារុលតាក់ហ្សីម ស្ថិតនៅភូមិចាមលើ ឃុំព្រែកថ្មី ស្រុកកោះធំ ខេត្តកណ្តាល។

ឯកឧត្ដម គួច ចំរើន បន្តថា ក្រោមការដឹកនាំរបស់ សម្ដេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រី និងជាប្រធានឧត្តមក្រុមប្រឹក្សាព្រះមហាក្សត្រ និងសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានផ្ដល់ឱកាសដល់បងប្អូនប្រជាពលរដ្ឋគ្រប់ជាតិសាសន៍ទូទាំងប្រទេសកម្ពុជា អាចរស់នៅសុខដុមរមនាជាមួយគ្នា។

ឯកឧត្ដមបន្ថែមថា ពិតណាស់ថាយើងមានសាសនាខុសគ្នា ប៉ុន្តែយើងរស់នៅក្នុងប្រទេសតែមួយ និងក្រោមគោលនយោបាយរបស់រាជរដ្ឋាភិបាលតែមួយ យើងរួមរស់ជាមួយគ្នាប្រកបដោយសុខដុមរមនាដោយមិនមានបញ្ហាអ្វីមួយដែលបង្កជាអរិយភាពជាមួយគ្នាទៅវិញទៅមកឡើយ។ គោលនយោបាយរបស់រាជរដ្ឋាភិបាលដែលបានដាក់ចេញបានផ្ដល់ឱកាសទូលំទូលាយដល់បងប្អូនប្រជាពលរដ្ឋគ្រប់ជាតិសាសន៍ ហើយបានផ្ដល់មកវិញនៅសុខដុមរមនីយកម្មនៅក្នុងសង្គមជាតិរបស់យើង ដូចនេះមិនថាបងប្អូនខ្មែរឥស្លាម ខ្មែរ ឬសហគមន៍ផ្សេងៗទៀត ដែលរស់នៅក្នុងប្រទេសកម្ពុជានិងបន្តគាំទ្រគោលនយោបាយសុខដុមនីយកម្មសម្រាប់សេចក្ដីសុខ សេចក្ដីចម្រើន របស់យើងទាំងអស់គ្នាជាបន្តទៀត។

ឯកឧត្ដម បញ្ចាក់បន្ថែមថា៖ ពិធីជួបជុំពិសារអាហារដ៏មានអត្ថន័យធំធេងនាថ្ងៃនេះ បានឆ្លុះបញ្ចាំងយ៉ាងច្បាស់អំពីស្មារតីសាមគ្គីភាព ភាតរភាព និងការយោគយល់អធ្យាស្រ័យគ្នាខ្ពស់ របស់បងប្អូនខ្មែរឥស្លាមក្នុងខេត្តកណ្តាល។ ទន្ទឹមនេះ កម្មវិធីនេះក៏បានផ្តល់នូវឱកាសដ៏វិសេសវិសាលមួយ ដែលអនុញ្ញាតឱ្យថ្នាក់ដឹកនាំ និងសមាជិកសហគមន៍ខ្មែរឥស្លាម បានជួបជុំគ្នាបង្កើនភាពស្និទ្ធស្នាល សាងទំនាក់ទំនងឱ្យកាន់តែរឹងមាំ ផ្លាស់ប្តូរទស្សនៈ និងចែករំលែកបទពិសោធន៍ល្អៗ សំដៅរួមចំណែកអភិវឌ្ឍវិស័យសាសនាឥស្លាម ព្រមទាំងលើកស្ទួយ «សុខដុមនីយកម្មជាតិសាសន៍ និងសាសនា» នៅកម្ពុជា ដើម្បីធានាបាននូវសុខសន្តិភាព ស្ថិរភាព និងភាពកក់ក្តៅទាំងផ្លូវកាយនិងផ្លូវចិត្ត ដែលជាមូលដ្ឋានគ្រឹះមិនអាចខ្វះបាន សម្រាប់ការអភិវឌ្ឍសង្គម និងសេដ្ឋកិច្ចជាតិប្រកបដោយចីរភាព។

ក្នុងឱកាសនោះដែរ ឯកឧត្ដម អភិបាលខេត្តកណ្ដាល បានសូមអំពាវនាវដល់គណៈអ៊ីម៉ាំខេត្ត ក្រុង ស្រុក គណៈអ៊ីមុំាម៉ាស្ជិទ ហាកឹម តួន បងប្អូនសាសនិកឥស្លាមគ្រប់រូប សូមបន្តផ្ដល់ជំនឿជឿជាក់ និងពង្រឹងទំនាក់ទំនង កិច្ចសហប្រតិបត្តិការ ឱ្យកាន់តែជិតស្និទ្ធ ជាមួយអាជ្ញាធរមូលដ្ឋានគ្រប់លំដាប់ថ្នាក់ មន្ទីរ អង្គភាព ស្ថាប័នមានសមត្ថកិច្ច រួមទាំងសាសនិក បុព្វជិត នៃសាសនាដទៃ ដើម្បីបន្តកសាង អភិវឌ្ឍ វិស័យសាសនាឥស្លាម ព្រមទាំងអភិរក្សវប្បធម៌ ប្រពៃណីដ៏ផូរផង់របស់ខ្មែរឥស្លាមយើងឱ្យស្ថិតស្ថិរ គង់វង្ស ស្របនឹងប្រសាសន៍របស់ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា “កម្ពុជា ដែលទទួលបាននូវភាពសុខដុមនីយកម្មជាតិសាសន៍ និងសាសនា គឺជាសម្បត្តិដែលត្រូវថែទាំឱ្យគង់វង្ស។” និងឯកឧត្ដមទេសរដ្ឋមន្រ្តី អូស្មាន់ ហាស្សាន់ “យើងពិតជាមានសំណាងណាស់ ដែលបានកើតនៅលើទឹកដីស្រស់បវរ ដែលមានសាសនាព្រះពុទ្ធជាសាសនារបស់រដ្ឋ មេដឹកនាំជាតិជាពុទ្ធសាសនិក តែបានយកចិត្តទុកដាក់ចំពោះខ្មែរឥស្លាម ច្រើនជាងប្រទេសកាន់សាសនាឥស្លាមទៅទៀត៕