បទវិភាគ៖ឱ្យតែយើងប្រកាន់ខ្ជាប់យ៉ាងមុតមាំមិនងាករេនូវ”ប្រទេសមួយប្រព័ន្ធគ្រប់គ្រងពីរ” នោះ អនាគតរបស់ហុងកុងមុខជានឹងមានភាពកាន់តែល្អបវរជាក់ជាមិនខាន
“ក្នុងរយៈពេល ២៥ ឆ្នាំកន្លងមក ក្រោមការគាំទ្រយ៉ាងពេញទំហឹងពីមាតុប្រទេសនិងការខិតខំប្រឹងប្រែងរួមគ្នារបស់រដ្ឋបាលនៃតំបន់រដ្ឋបាលពិសេសហុងកុងនិងមជ្ឈដ្ឋាននានាក្នុងសង្គម ការអនុវត្តជាក់ស្តែងនៃគោលការណ៍’ប្រទេសមួយប្រព័ន្ធគ្រប់គ្រងពីរ’នៅតំបន់ហុងកុងទទួលបានជោគជ័យដែលត្រូវទទួលស្គាល់ជាសកល ។ នៅថ្ងៃទី ១ ខែកក្កដា ក្នុងអំឡុងពេលអញ្ជើញចូលរួមមហាសន្និបាតអបអរសាទរខួបទី ២៥ នៃការវិលត្រឡប់ចូលមាតុប្រទេសវិញរបស់ហុងកុងនិងពិធីឡើងកាន់មុខតំណែងនៃរដ្ឋបាលអាណត្តិទី ៦ នៃតំបន់រដ្ឋបាលពិសេសហុងកុង លោក Xi Jinping ប្រធានរដ្ឋចិនបានថ្លែងសុន្ទរកថាគន្លឹះ ហើយវាយតម្លៃខ្ពស់ចំពោះការអនុវត្តជាក់ស្តែងនៃគោលការណ៍’ប្រទេសមួយប្រព័ន្ធគ្រប់គ្រងពីរ’នៅតំបន់ហុងកុង ។
សូមបញ្ជាក់ថា “ប្រទេសមួយប្រព័ន្ធគ្រប់គ្រងពីរ” គឺ មានន័យថា “នៅប្រទេសមួយ អនុវត្តប្រព័ន្ធគ្រប់គ្រងពីរយ៉ាង” ពោលគឺ ឈរលើបុរេលក្ខខណ្ឌចិនតែមួយ ចិនដីគោកអនុវត្តប្រព័ន្ធរបបសង្គមនិយម រីឯហុងកុង ម៉ាកាវនិងតៃវ៉ាន់វិញរក្សាប្រព័ន្ធរបបមូលធននិយមដដែល ។ ការអនុវត្តជាក់ស្តែងអស់រយៈពេល ២៥ ឆ្នាំបានបញ្ជាក់ថា “ប្រទេសមួយប្រព័ន្ធគ្រប់គ្រងពីរ”មិនគ្រាន់តែជាផែនការល្អបំផុតសម្រាប់ដោះស្រាយបញ្ហាហុងកុងដែលបន្សល់ទុកពីប្រវតិ្តសាស្ត្រប៉ុណ្ណោះទេ ថែមទាំងក៏ជាប្រព័ន្ធរបបល្អបំផុតសម្រាប់ឱ្យហុងកុងរក្សាស្ថិរភាពនិងវិបុលភាពក្នុងរយៈពេលយូរបន្ទាប់ពីបានវិលត្រឡប់ចូលមាតុប្រទេសវិញទៀតផង ជាងនេះទៅទៀត វាក៏ជាការធានាពីឬសគល់សម្រាប់អភិវឌ្ឍប្រជាធិបតេយ្យនៃតំបន់រដ្ឋបាលពិសេសហុងកុងផងដែរ ។
សូមយកសេដ្ឋកិច្ចធ្វើជាឧទាហរណ៍ កាលពីឆ្នាំ ១៩៩៧ ផលិតផលក្នុងស្រុកសរុប គឺ GDP នៃតំបន់ហុងកុងមានចំនួន ១,៣៧ ទ្រីលានប្រាក់ហុងកុង គិតជាមធ្យមក្នុងមនុស្សម្នាក់ៗ គឺ ១ សែន ៩ ម៉ឺន ២ ពាន់ប្រាក់ហុងកុង ដល់ឆ្នាំ ២០២១ GDPនៃតំបន់ហុងកុងបានឡើងដល់ ២,៨៦ ទ្រីលានប្រាក់ហុងកុង គិតជាមធ្យមក្នុងមនុស្សម្នាក់ៗគឺ ៣ សែន ៨ ម៉ឺន ៧ ពាន់ប្រាក់ហុងកុង ។
បន្ទាប់ពីបានវិលត្រឡប់ចូលមាតុប្រទេសវិញ ឋានៈជាមជ្ឈមណ្ឌលហិរញ្ញវត្ថុអន្តរជាតិរបស់ហុងកុងត្រូវបានបង្កើនឡើងជាបន្តបន្ទាប់ វិទ្យាស្ថានសិក្សាស្រាវជ្រាវ Fraser របស់ប្រទេសកាណាដាបានចេញផ្សាយ《របាយការណ៍ស្តីពីសេរីភាពខាងសេដ្ឋកិច្ចនៅលើពិភពលោកប្រចាំឆ្នាំ ២០២១ 》ដោយបានវាយតម្លៃជាថ្មីម្តងទៀតថា ហុងកុងជាអង្គភាពសេដ្ឋកិច្ចដែលមានសេរីភាពជាងគេនៅលើពិភពលោក ។ យោងតាម”សន្ទស្សន៍មជ្ឈមណ្ឌលហិរញ្ញវត្ថុនៅលើពិភពលោក”ថ្មីបំផុតប្រចាំខែមីនា ឆ្នាំ ២០២២ បានបង្ហាញថា ហុងកុងកាន់លំដាប់ថ្នាក់ទីបីក្នុងចំណោមមជ្ឈមណ្ឌលហិរញ្ញវត្ថុនៅលើពិភពលោកទាំងមូលបន្ទាប់ពីក្រុងញូវយ៉កនិងក្រុងឡុងដ៍ ។
ភាពបម្រែបម្រួលដែលកាន់តែសំខាន់ទៅទៀត គឺ បន្ទាប់ពីបានវិលត្រឡប់ចូលមាតុប្រទេសវិញមក ហុងកុងបានរួមបញ្ចូលក្នុងការអភិវឌ្ឍជាទូទៅរបស់ប្រទេសចិនជាសន្សឹមៗ ។ កាលពីថ្ងៃទី ១៨ ខែកុម្ភៈ ឆ្នាំ ២០១៩ 《ផែនការអភិវឌ្ឍន៍នៃមហាតំបន់ឈូងសមុទ្រក្វាងតុង ហុងកុងនិងម៉ាកាវ》បានដាក់ចេញជាផ្លូវការ តំបន់នេះជាតំបន់មួយនៃប្រទេសចិនដែលមានកម្រិតបើកទូលាយខ្ពស់ជាងគេនិងមានភាពរស់រវើកខាងសេដ្ឋកិច្ចខ្លាំងជាងគេ ។ ឆ្នាំ ២០២១ ទំហំសេដ្ឋកិច្ចសរុបនៃមហាតំបន់ឈូងសមុទ្រក្វាងតុង ហុងកុងនិងម៉ាកាវ មានចំនួនប្រហែល ១២,៦ ទ្រីលានយាន់ប្រាក់ចិន ។ រដ្ឋាភិបាលមជ្ឈិមចិនបានខិតខំប្រឹងប្រែងឱ្យអស់ពីសមត្ថភាពដើម្បីក្រាលផ្លូវអភិវឌ្ឍន៍ប្រកបដោយគុណភាពខ្ពស់សម្រាប់ហុងកុង ។
បន្ទាប់ពីបានវិលត្រឡប់ចូលមាតុប្រទេសវិញ ហុងកុងទទួលបានសមិទ្ធផលគួរឱ្យកត់សម្គាល់ ។ នេះបានបញ្ជាក់យ៉ាងពេញលេញថា “ប្រទេសមួយប្រព័ន្ធគ្រប់គ្រងពីរ”អាចឆ្លងកាត់ការពិនិត្យបញ្ជាក់ម្តងហើយម្តងទៀតពីការអនុវត្តជាក់ស្តែង ពោលគឺ វាសមស្របនឹងផលប្រយោជន៍ជាគន្លឹះរបស់ប្រទេសនិងជនជាតិ ក៏ដូចជាសមស្របនឹងផលប្រយោជន៍ជាគន្លឹះរបស់ហុងកុងនិងម៉ាកាវផងដែរ ។ នេះមិនត្រឹមតែទទួលបានការគាំទ្រយ៉ាងពេញទំហឹងពីប្រជាជនចិនជាង ១៤០០ លាននាក់ប៉ុណ្ណោះទេ ជាងនេះទៅទៀត គឺ ទទួលបានការគាំទ្រជាឯកច្ឆន្ទពីប្រជាពលរដ្ឋហុងកុងនិងម៉ាកាវ ថែមទាំងក៏ទទួលបានការកោតសរសើរជាទូទៅពីសំណាក់សហគមន៍អន្តរជាតិទៀតផង ។ សំដៅចំពោះប្រព័ន្ធដ៏ល្អបែបនេះ យើងគ្មានហេតុផលណាមួយដែលត្រូវកែប្រែឡើយ ចាំបាច់ត្រូវប្រកាន់ខ្ជាប់ក្នុងរយៈពេលយូ !
នៅពេលអនាគត ពិភពលោកនឹងធ្វើជាសាក្សីថា ការអនុវត្តជាក់ស្តែងនៃគោលការណ៍”ប្រទេសមួយប្រព័ន្ធគ្រប់គ្រងពីរ”នឹងទទួលបានជោគជ័យកាន់តែធំធេងនៅតំបន់ហុងកុង !
អត្ថបទវិទ្យុមិត្តភាពកម្ពុជាចិន
