ឧត្តមសេនីយ៍ទោ សោម ស៊ុន អញ្ជើញសំណេះសំណាល សាកសួរសុខទុក្ខ និងឧបត្ថម្ភស្បៀងអាហារ ថវិកា ជូនអតីតយុទ្ធជន ដែលជាដៃគូសម្ព័ន្ធមេត្រីភាព

ភ្នំពេញ៖ ឧត្តមសេនីយ៍ទោ សោម ស៊ុន មេបញ្ជាការ តំបន់ប្រតិបត្តិការសឹករងកំពង់ធំ និងជា ប្រធានសមាគមអតីតយុទ្ធជនកម្ពុជាខេត្តកំពង់ធំ រួមជាមួយសហការី នៅព្រឹកថ្ងៃទី៥ ខែកក្កដា ឆ្នាំ២០២២ បានអញ្ជើញសំណេះសំណាល សាកសួរសុខទុក្ខនិងឧបត្ថម្ភស្បៀងអាហារ ថវិកា ជូនក្រុមគ្រួសារអតីតយុទ្ធជនចំនួន ៨ គ្រួសារ ដែលជាដៃគូសម្ព័ន្ធមេត្រីភាពជាមួយបញ្ជាការដ្ឋានតំបន់ប្រតិបត្តិការសឹករងកំពង់ធំ នៅភូមិដងក្តារ ឃុំក្រយា ស្រុកសន្ទុក ខេត្តកំពង់ធំ។

ឧត្តមសេនីយ៍ទោ សោម ស៊ុន បានពាំនាំនូវការផ្តាំផ្ញើសាកសួរសុខទុក្ខពីសំណាក់សម្ដេចអគ្គមហាសេនាបតីតេជោ ហ៊ុន សែន និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលសម្ដេចទាំងទ្វេតែងតែគិតគូរ អំពីសុខទុក្ខនិងជីវភាពរស់នៅរបស់បងប្អូនអតីតយុទ្ធជននៅគ្រប់ទីកន្លែងនិងគ្រប់ពេលវេលា ព្រោះអតីតយុទ្ធជនយើងបានរួមចំណែកយ៉ាងធំធេង ជាមួយសម្ដេចតេជោ ក្នុងការអនុវត្តនូវនយោបាយ ឈ្នះ ឈ្នះ ដើម្បីធ្វើ ឲ្យប្រទេសជាតិយើងមានសុខសន្តិភាព ពេញលេញដូចសព្វថ្ងៃនេះ ។

ឧត្តមសេនីយ៍ទោ សោម ស៊ុន បាន កោតសរសើរ ដល់ ក្រុម គ្រួសារ អតីត យុទ្ធ ជន ដែល ឆ្លង កាត់ ការ រស់នៅ ក្នុង រយៈពេល ជាង មួយ ឆ្នាំ កន្លង មក នេះ បាន ប្រឹងប្រែង ខិតខំ បង្ករបង្កើងផលចិញ្ចឹមសត្វ ដោះស្រាយ ជីវភាព រស់នៅ បាន ល្អ ប្រសើរ បន្ទាប់ ពី បាន ទទួល ផ្ទះ ថ្មី និង ដីសម្បទានសង្គមកិច្ច ក្នុង មួយ គ្រួសារ ចំនួន មួយ ហិកតា កន្លះ ដែល ជាអំណយ ដ៍ថ្លៃ ថ្លៃថ្លា របស់ សម្តេច តេជោ ហ៊ុន សែន និង សម្តេច កិត្តិព្រឹទ្ឋបណ្ឌឹត ។

ឧត្តមសេនីយ៍ទោ សោម ស៊ុន បានអំពាវនាវដល់បងប្អូនអតីតយុទ្ធជននឹងក្រុមគ្រួសារ ត្រូវបន្តការប្រុងប្រយ័ត្នក្នុងការពារទប់ស្កាត់ការឆ្លងជំងឺកូវីដ-១៩ ជាថ្មី ទៀត ដោយ បច្ចុប្បន្ន នេះ មាន ការ ឆ្លង រាលដាល ជាថ្មី ទៀត នៅ ក្នុង សហគមន៍ មួយ ចំនួន ដោយត្រូវ បន្តអនុវត្តឲ្យបានត្រឹមត្រូវតាមវិធានការរបស់ក្រសួងសុខាភិបាល និងវិធានការ ៣ការពារ និង៣កុំ របស់សម្ដេចតេជោ ហ៊ុន សែន ឲ្យបានខ្ជាប់ខ្ជួន។

នៅ ក្នុង ឱកាស នេះ ឧត្តមសេនីយ៍ទោ សោម ស៊ុន បាននាំយកនូវស្បៀងអាហារ និង ថវិកា ដែល ជា ជំនួយ ឧបត្ថម្ភ របស់ លោក វរសេនីយ៍ ទោ ថន ស៊ីសក្តា មេបញ្ជាការ អង្គភាព កងវរសេនាតូចលេខ១ នៃបញ្ជាការដ្ឋានតំបន់ប្រតិបត្តិការសឹករងកំពង់ធំ មកផ្ដល់ជូនបងប្អូនអតីតយុទ្ឋជន ដែលជាដៃគូសម្ព័ន្ឋមេត្រីភាពទាំង ៨ គ្រួសារ ដោយ ក្នុង មួយ គ្រួសារ ទទួល បាន ននូវអង្ករគ្រឿងឧបភោគបរិភោគ និងថវិកាមួយចំនួន ផងដែរ ។ ដោយឡែកអតីតយុទ្ធជនចំនួន ៥០ នាក់ ដែលបានអញ្ជើញមកចូលរួមក្ន្ងងកម្មវិធីនេះ បានទទួលថវិកា ក្នុង ម្នាក់ៗ ចំនួន១ម៉ឺនរៀល ផងដែរ ៕