ឧត្តមសេនីយ៍ទោ តូច ប៊ុណ្ណា ដឹកនាំក្រុមចម្រុះអធិការកិច្ចហត្ថពលកម្មបរទេស ចូលជួបសម្ដែងការគួរសមជាមួយ ឯកឧត្តមអភិបាលខេត្តរតនគីរី

ភ្នំពេញ៖ ឧត្តមសេនីយ៍ទោ តូច ប៊ុណ្ណា អនុប្រធាននាយកដ្ឋានជនបរទេសអន្ដោប្រវេសន្ដជាអ្នកវិនិយោគឯកជន និងជាប្រធានក្រុមចម្រុះអធិការកិច្ចហត្ថពលកម្មបរទេសប្រចាំខេត្តរតនគីរី នាព្រឹកថ្ងៃទី៤ ខែកក្កដា ឆ្នាំ២០២២ បានដឹកនាំក្រុមការងារ ចូលជួបសម្ដែងការគួរសមជាមួយ ឯកឧត្តម ញ៉ែម សំអឿន អភិបាលខេត្តរតនគីរី ដែលបានប្រារព្ធឡើងនៅសាលប្រជុំសាលាខេត្ដរតនគីរី ដើម្បីជម្រាបជូននូវលទ្ធផលការងារអធិការកិច្ចហត្ថពលកម្មបរទេសឆ្នាំ២០២១ និងផែនការចុះធ្វើអធិការកិច្ចហត្ថពលកម្មបរទេស តាមសហគ្រាស គ្រឹះស្ថាននានា នៅក្នុងភូមិសាស្រ្តខេត្តរតនគីរីឆ្នាំ២០២២។

នៅក្នុងឱកាសនោះ ឯកឧត្តម អភិបាល បានសម្តែងការស្វាគមន៍និងគាំទ្រនូវដំណើរការបើកយុទ្ធនាការអធិការកិច្ចហត្ថពលកម្មបរទេសឆ្នាំ២០២២ក្នុងភូមិសាស្ត្រខេត្តរតនគីរីដើម្បីចាត់វិធានការ និងពង្រឹងការអនុវត្តច្បាប់ស្តីពីអន្តោប្រវេសន៍ និងច្បាប់ ស្តីពីការងារ នៃព្រះរាជាណាចក្រកម្ពុជាឲ្យកាន់តែមានប្រសិទ្ធិភាព ក្នុងការជម្រុញអោយជនបរទេសដែលកំពុងប្រកបអាជីវកម្ម និងបម្រើការងារបង់អាករប័ណ្ណការងារចូលថវិការជាតិ៕