កញ្ចប់ថវិកាការពារជាតិអ៉ីស្រាអែល សម្រាប់ឆ្នាំ២០២៦ ត្រូវបានកំណត់លើសពីចំនួនដែលត្រូវបានកំណត់ ក្នុងសំណើព្រាងមុន
ហ៊្សេរុយសាឡិម៖ បើតាមការចេញផ្សាយដោយ ទីភ្នាក់ងារព័ត៌មាន Reuters នាថ្ងៃសុក្រ ទី៥ ខែធ្នូ ឆ្នាំ២០២៥ ការិយាល័យរដ្ឋមន្រ្តីការពារជាតិអ៉ីស្រាអែល នាថ្ងៃសុក្រនេះបានឱ្យដឹងថា កញ្ចប់ថវិកាការពារជាតិអ៉ីស្រាអែល សម្រាប់ឆ្នាំ២០២៦ ត្រូវបានកំណត់មានចំនួន ៣៤.៦៣ពាន់លានដុល្លារ លើសពីចំនួនដែលត្រូវបានកំណត់ ក្នុងសំណើព្រាងមុន។
រដ្ឋមន្រ្តីការពារជាតិអ៉ីស្រាអែល លោក Israel Katz បានលើកឡើងថា យោធានឹងបន្តបំពេញតម្រូវការរបស់កងទ័ពអ៉ីស្រាអែល ហើយ កាត់បន្ថយបន្ទុកលើក្រុមទាហានបម្រុង។
បើតាមការិយាល័យរបស់លោក លោក Katz បាននិយាយយ៉ាងដូច្នេះថា «យើង នឹងបន្តធ្វើសកម្មភាពយ៉ាងម៉ឺងម៉ាត់ ដើម្បីពង្រឹងកងកម្លាំងយោធា ហើយឆ្លើយតបយ៉ាងពេញលេញ ចំពោះតម្រូវការកងទ័ពយើង និង កាត់បន្ថយបន្ទុកលើទាហានបម្រុង ក្នុងគោលដៅធានាសន្តិភាពនៃរដ្ឋអ៉ីស្រាអែល នៅគ្រប់ជ្រុងទាំងអស់»។
គួរបញ្ជាក់ថា សង្រ្គាមហ្កាហ្សា គឺជាសង្រ្គាមដ៏ថ្លៃមួយសម្រាប់អ៉ីស្រាអែល ដែលបានចំណាយថវិកា៣១ពាន់លានដុល្លារ កាលពីឆ្នាំ ២០២៤ ក្នុងជម្លោះយោធាជាមួយក្រុមហាម៉ាស និងជាមួយក្រុមហេសបូឡា នៅឯប្រទេសលីបង់។ ប៉ុន្តែតាំងពីពេលនោះមក អ៉ីស្រាអែលឥឡូវសម្រេចបាន កិច្ចព្រមព្រៀងឈប់បាញ់ជាមួយក្រុមសកម្មប្រយុទ្ធទាំងពីរហើយ៕
