រដ្ឋបាលខេត្តព្រះសីហនុ ណែនាំម្ចាស់ក្រុមហ៊ុនផលិតស្លាកសញ្ញាផ្សព្វផ្សាយពាណិជ្ជកម្ម ពុំមានលិខិតអនុញ្ញាត និងមានភ្ជាប់និមិត្តសញ្ញាឆ្នោតអនឡាញ QR Code ឬវេបសាយខុសច្បាប់

ព្រះសីហនុ៖ រដ្ឋបាលខេត្តព្រះសីហនុ នៅថ្ងៃទី៤ ខែធ្នូ ឆ្នាំ២០២៥ បានណែនាំម្ចាស់ក្រុមហ៊ុនផលិតស្លាកសញ្ញាផ្សព្វផ្សាយពាណិជ្ជកម្ម ពុំមានលិខិតអនុញ្ញាត និងមានភ្ជាប់និមិត្តសញ្ញាឆ្នោតអនឡាញ QR Code ឬវេបសាយខុសច្បាប់។

កិច្ចប្រជុំស្ដីពីលទ្ធផលពិនិត្យ និងណែនាំដល់ម្ចាស់ក្រុមហ៊ុននេះបានធ្វើឡើងដឹកនាំដោយលោក ពេជ្រ ខៅដាង នាយករងរដ្ឋបាលសាលាខេត្តព្រះសីហនុ មានការចូលរួមពីសំណាក់ លោកស្រីប្រធានច្រក លោក-លោកស្រីអនុប្រធានមន្ទីរអង្គភាពពាក់ពន្ឋ័ តំណា ងរដ្ឋបាលក្រុងព្រះសីហនុ និងតំណាងក្រុមហ៊ុនផលិតស្លាកសញ្ញាផ្សព្វផ្សាយពាណិជ្ជកម្មមានម្ចាស់ជាជនជាតិខ្មែរនិងចិន។

នាយករងរដ្ឋបាលខេត្ត បានឲ្យដឹងថា កិច្ចកាងារនេះបានធ្វើឡើងបន្ទាប់ពីទទួលបានសារាចរណែនាំរបស់ក្រសួងមហាផ្ទៃ ស្តីពីការបញ្ឈប់សកម្មភាពផ្សព្វផ្សាយល្បែងស៊ីសងខុសច្បាប់ កន្លងទៅរដ្ឋបាលខេត្តព្រះសីហនុ បានចាត់ក្រុមការងារខេត្ត និងក្រុង ចុះត្រួតពិនិត្យណែនាំដល់ម្ចាស់ក្រុមហ៊ុនផលិតស្លាកសញ្ញាផ្សព្វផ្សាយពាណិជ្ជកម្ម ពុំមានលិខិតអនុញ្ញាត និងមានភ្ជាប់និមិត្តសញ្ញាឆ្នោតអនឡាញ QR Code ឬវេបសាយ ចាប់តាំងពីថ្ងៃទី១ វិច្ឆិកា ដល់ថ្ងៃទី២ ខែធ្នូ ឆ្នាំ២០២៥។

លទ្ធផលនៃកិច្ចប្រជុំនាពេលនេះ ក្រុមការងាររដ្ឋបាលក្រុងព្រះសីហនុ បានចុះត្រួតពិនិត្យនិងណែនាំទីតាំងលើកស្លាកសញ្ញាផ្សព្វផ្សាយពាណិជ្ជកម្ម ពុំមានលិខិតអនុញ្ញាត និងស្ថិតនៅលើចំណីផ្លូវចំនួន ១៣លើក ស្មើនឹង ៦៨ទីតាំង មានចំនួន ១១៦ស្លាក ព្រមទាំងមានវិធានការ និងណែនាំដល់ម្ចាស់ទីតាំងឲ្យរុះរើស្លាកចេញដោយខ្លួនឯងចំនួន ៣១ស្លាក កែតម្រូវស្លាក និងស្នើសុំលិខិតអនុញ្ញាតចំនួន៤១ស្លាក រុះរើស្លាកដែលដាក់តាំងនៅលើចំណី ផ្លូវសាធារណៈចំនួន ៤៤ស្លាក។ក្រៅពីនេះក្រុមការងាររដ្ឋបាលក្រុងក៏បានចុះត្រួតពិនិត្យនិងណែនាំទីតាំងផលិតស្លាកសញ្ញាផ្សព្វផ្សាយពាណិជ្ជកម្ម ចំនួន ៥ទីតាំងទៀត។

ដើម្បីអនុវត្តនសារាចរណែនាំលេខ ០៧២សណន របស់ក្រសួងមហាផ្ទៃ អោយមានប្រសិទ្ធភាពល្អបន្ថែមទៀត លោក ពេជ្រ ខៅដាង ក្នុងនាមរដ្ឋបាលខេត្តព្រះសីហនុបានណែនាំ លោកស្រីប្រធានច្រក អនុប្រធានមន្ទីរអង្គភាព ពាក់ពន្ឋ័ រដ្ឋបាលក្រុងព្រះសីហនុ និងតំណាងក្រុមហ៊ុនផលិតស្លាកសញ្ញាផ្សព្វផ្សាយពាណិជ្ជកម្មមានម្ចាស់ជាខ្មែរនិងចិន ត្រូវចូលរួមជាមួយរដ្ឋបាលខេត្តអនុវត្តសារាចរណែនាំរបស់ក្រសួងមហាផ្ទៃអោយបានសម្រេចជោគជ័យ៕