ឯកឧត្តម ឡាំ ហេងហួត ដឹកនាំកិច្ចប្រជុំឆ្លងពង្រាងរបាយការណ៍ស្ដីពីលទ្ធផលការងារគ្រប់គ្រងគ្រោះមហន្តរាយ ក្នុងខែមិថុនា និងទិសដៅអនុវត្តបន្ត ខែកក្កដា
ភ្នំពេញ៖ ឯកឧត្តម ឡាំ ហេងហួត រដ្ឋមន្ត្រីប្រតិភូអមនាយករដ្ឋមន្ត្រី អនុប្រធាន គ.ជ.គ.ម. និងជាអគ្គលេខាធិការ កាលពីថ្ងៃទី០១ ខែកក្កដា ឆ្នាំ២០២២ បានដឹកនាំកិច្ចប្រជុំឆ្លងពង្រាងរបាយការណ៍ស្ដីពីលទ្ធផលការងារគ្រប់គ្រងគ្រោះមហន្តរាយ ក្នុងខែមិថុនា និងទិសដៅអនុវត្តបន្ត ខែកក្កដា ឆ្នាំ២០២២ និងការងារផ្សេងៗនៅក្នុងអគ្គលេខាធិការដ្ឋាន គ.ជ.គ.ម.។
កិច្ចប្រជុំនេះដែរមានការអញ្ជើញចូលរួមពី ឯកឧត្តម លោកជំទាវ អគ្គលេខាធិការរង, ឯកឧត្តម ទីប្រឹក្សា និងជានាយកកម្មវិធីជាតិ, ប្រធាននាយកដ្ឋាន និងមន្ត្រីពាក់ព័ន្ធមួយចំនួន នៅសាលប្រជុំអគារគណៈកម្មាធិការជាតិគ្រប់គ្រងគ្រោះមហន្តរាយ។
ឆ្លៀតក្នុងឱកាសនេះផងដែរ ឯកឧត្តម ឡាំ ហេងហួត ក៏បានកោតសរសើរចំពោះគ្រប់នាយកដ្ឋានទាំងអស់ ដែលតែងតែសហការគ្នាលើការងារផ្សេងៗកន្លងមក ជាពិសេសការងារបូកសរុប និងរៀបចំរបាយការណ៍ពង្រាងរបាយការណ៍ស្ដីពីលទ្ធផលការងារគ្រប់គ្រងគ្រោះមហន្តរាយ ក្នុងខែមិថុនា ឆ្នាំ២០២២ និងទិសដៅអនុវត្តបន្ត ខែកក្កដា ឆ្នាំ២០២២ ក្នុងគោលបំណងពិនិត្យ និងប្រមូលធាតុចូលបន្ថែមពីគ្រប់នាយកដ្ឋាន នៃអគ្គលេខាធិការដ្ឋាន គ.ជ.គ.ម. ដើម្បីកែសម្រួលដាក់ជូនថ្នាក់ដឹកនាំពិនិត្យសម្រេច។
ក្នុងនោះដែរ ឯកឧត្តម ឡាំ ហេងហួត ក៏បានលើកឡើងអំពីវឌ្ឍនភាពក្នុងការងាររៀបចំនូវ «ផែនការត្រៀមបម្រុងសម្រាប់ឆ្លើយតបសង្គ្រោះបន្ទាន់គ្រោះមហន្តរាយទឹកជំនន់ឆ្នាំ២០២២» ដើម្បីឱ្យក្រុមការងារបច្ចេកទេសរៀបចំកែសម្រួលឱ្យបានឆាប់រហ័សក្នុងការដាក់ចេញផ្សព្វផ្សាយឱ្យបានទាន់ពេលវេលា។
បន្ថែមពីនេះទៀត ឯកឧត្តមបានឱ្យក្រុមការងាររៀបចំ «វេទិកាជាតិស្ដីពីការកាត់បន្ថយហានិភ័យគ្រោះមហន្តរាយលើកទី២៩» ដែលនឹងប្រព្រឹត្តទៅនាថ្ងៃទី១៣ ខែកក្កដា ឆ្នាំ២០២២ ខាងមុខនេះ ដែលថ្នាក់ដឹកនាំបានប្រគល់ភារកិច្ចជូន សហការគ្នាធ្វើការងារតាមតួនាទីរៀងៗខ្លួនឱ្យបានល្អប្រសើរ និងធ្វើឱ្យកម្មវិធីប្រព្រឹត្តទៅយ៉ាងរលូន។
ឯកឧត្តម ឡាំ ហេងហួត បានណែនាំបន្ថែមលើការងារទូទៅនៅក្នុងអគ្គលេខាធិការដ្ឋាន គ.ជ.គ.ម. ទាក់ទងនឹងការពង្រឹងនូវវិន័យការងារសម្រាប់មន្ត្រីក្នុងអគ្គលេខាធិការដ្ឋាន និងរៀបចំនូវបញ្ជីវត្តមានសម្រាប់មន្ត្រីដែលមកបំពេញ ការងារប្រចាំថ្ងៃ ព្រមទាំងណែនាំដល់មន្ត្រីក្រោមឱវាទទាំងអស់ ឱ្យយកចិត្តទុកដាក់ក្នុងការបំពេញការងារដែលថ្នាក់ដឹកនាំបានប្រគល់ជូនឱ្យកាន់តែល្អប្រសើរ និងមានប្រសិទ្ធភាពខ្ពស់ជូនដល់អង្គភាព៕
