តំណាងពាណិជ្ជកម្មអាម៉េរិកអះអាងថា សហរដ្ឋអាម៉េរិករំពឹងថា នឹងសម្រេចបានកិច្ចព្រមព្រៀងពាណិជ្ជកម្មជាមួយបណ្តាប្រទេសអាស៊ីអាគ្នេយ៍ជាច្រើនទៀតនៅប៉ុន្មានខែខាងមុខ

គូឡាឡាំពួ៖ លោក ជេមីសុន ហ្គ្រៀ (Jamieson Greer) តំណាងពាណិជ្ជកម្មអាម៉េរិក បានអះអាងនៅថ្ងៃទី២៤កញ្ញាថា សហរដ្ឋអាម៉េរិករំពឹងថា នឹងសម្រេចបានកិច្ចព្រមព្រៀងពាណិជ្ជកម្មជាមួយបណ្តាប្រទេសអាស៊ីអាគ្នេយ៍ជាច្រើនទៀតនៅប៉ុន្មានខែខាងមុខ។

លោក ហ្គ្រៀ បានធ្វើការកត់សម្គាល់ខាងលើនៅពេលចាប់ផ្តើមកិច្ចប្រជុំជាមួយរដ្ឋមន្ត្រីសេដ្ឋកិច្ចមកពីសមាគមប្រជាជាតិអាស៊ីអាគ្នេយ៍ ចំពេលមានការព្រួយបារម្ភនៅក្នុងប្លុកដែលពឹងផ្អែកលើការនាំចេញ ជុំវិញផលប៉ះពាល់នៃពន្ធរបស់សហរដ្ឋអាម៉េរិកលើសេដ្ឋកិច្ច។ អត្រាពន្ធត្រូវបានកំណត់នៅកម្រិត១៩ភាគរយ និង២០ភាគរយសម្រាប់ប្រទេសជាច្រើន។ ប្រទេស ឡាវ និង មី យ៉ាន់ ម៉ា បាន រង ផល ប៉ះពាល់ ដោយ អត្រា ពន្ធ ៤០ ភាគរយ ខណៈ សិង្ហ បុរី ប្រឈម ពន្ធ ១០ ភាគរយ ។

តំណាងពាណិជ្ជកម្មអាម៉េរិករូបនេះដដែល បានបន្ថែមថា ការពិភាក្សាជាមួយបណ្តាប្រទេសផ្សេងៗលើការយកពន្ធមានដំណើរការល្អ នាំឱ្យកិច្ចព្រមព្រៀងមួយចំនួនត្រូវបានប្រកាស ខណៈកិច្ចព្រមព្រៀងផ្សេងទៀតនឹងត្រូវបានបញ្ចប់នៅក្នុងប៉ុន្មានខែខាងមុខ។

សហរដ្ឋអាម៉េរិក បានឈានដល់កិច្ចព្រមព្រៀងជាមួយឥណ្ឌូណេស៊ី និងវៀតណាមលើពន្ធគយ។ វៀតណាម ដែលជាប្រទេសនាំចេញធំជាងគេទី៦របស់ពិភពលោកទៅកាន់សហរដ្ឋអាម៉េរិក ប្រឈមនឹងកាខាតបង់លុយ២៥ពាន់លានដុល្លារជារៀងរាល់ឆ្នាំ ដោយសារការយកពន្ធ២០ភាគរយលើទំនិញរបស់ខ្លួន ដែលនឹងធ្វើឱ្យប្រទេសនេះក្លាយជាប្រទេសរងគ្រោះខ្លាំងជាងគេនៅក្នុងតំបន់។

នៅក្នុងសេចក្តីថ្លែងការណ៍រួមមួយ រដ្ឋមន្ត្រីសេដ្ឋកិច្ចអាស៊ានបានកត់សម្គាល់ពីផលប៉ះពាល់អវិជ្ជមាន និងភាពមិនច្បាស់លាស់ដែលកើតឡើងពីទិដ្ឋភាពពន្ធគយ និងបានព្រមានអំពីដំណើរការពាណិជ្ជកម្មក្នុងតំបន់យឺតជាងក្នុងឆមាសទីពីរនៃឆ្នាំ២០២៥ ដោយសារតែការផ្ទុកទំនិញនាំចេញមុននឹងការដាក់ពន្ធនៅដើមឆ្នាំ។

រដ្ឋមន្ត្រីក៏បានសម្ដែងការព្រួយបារម្ភចំពោះការកើនឡើងនូវលទ្ធិគាំពារនិយម និងវិធានការពាណិជ្ជកម្មឯកតោភាគី ដែលពួកគេលើកឡើងថា បង្កហានិភ័យយ៉ាងសំខាន់ដល់ប្រព័ន្ធពាណិជ្ជកម្មពហុភាគី និងស្ថិរភាពនៃខ្សែច្រវាក់ផ្គត់ផ្គង់ពិភពលោក៕