ប្រមុខការបរទេសអាម៉េរិក និងរុស្ស៊ី ជួបប្រជុំគ្នាបន្ទាប់ពីប្រធានាធិបតី ដូណាល់ ត្រាំ ហៅប្រមុខរដ្ឋធានីម៉ូស្គូថាជា «ខ្លាក្រដាស»
ញូវយ៉ក៖ លោក ម៉ាកូ រូប៊ីអូ រដ្ឋមន្ត្រីការបរទេសសហរដ្ឋអាម៉េរិក និងលោក ស៊ែហ្គី ឡាវរ៉ូវ រដ្ឋមន្ត្រីការបរទេសរុស្ស៊ី បានជួបប្រជុំគ្នានៅថ្ងៃពុធទី២៤កញ្ញា មួយថ្ងៃបន្ទាប់ពីប្រធានាធិបតី ដូណាល់ ត្រាំ ហៅប្រមុខរដ្ឋធានីម៉ូស្គូថាជា «ខ្លាក្រដាស» ហើយបាននិយាយថា អ៊ុយក្រែនអាចដណ្តើមទឹកដីពីរុស្ស៊ីត្រឡប់មកវិញ។
លោក រូប៊ីអូ និងលោក ឡាវរ៉ូវ រួមជាមួយគណៈប្រតិភូរបស់ពួកគេ បានជួបប្រជុំគ្នានៅខាងក្រៅមហាសន្និបាតអង្គការសហប្រជាជាតិនៅទីក្រុងញូវយ៉ក។ ឯកអគ្គរដ្ឋទូតសហរដ្ឋអាម៉េរិកប្រចាំអង្គការសហប្រជាជាតិ លោក ម៉ៃ វ៉ាល់ស៍ (Mike Waltz) ក៏មានវត្តមានផងដែរ។ កិច្ច ប្រជុំ នេះ មាន រយៈពេល ប្រហែល៥០នាទី ។
លោក ឡាវរ៉ូវ មិនបានឆ្លើយតបនឹងសំណួរនៅពេលគាត់ចាកចេញពីកិច្ចប្រជុំទេ។ ក្រសួងការបរទេសរុស្ស៊ី បានប្រកាសថា ៖«ភាគីទាំង២ បានអះអាងជាថ្មីនូវចំណាប់អារម្មណ៍ទៅវិញទៅមកក្នុងការស្វែងរកដំណោះស្រាយដោយសន្តិវិធី។
លោក ឡាវរ៉ូវ បានសង្កត់ធ្ងន់លើការត្រៀមខ្លួនរបស់ប្រទេសរបស់យើងក្នុងការប្រកាន់ខ្ជាប់នូវគោលការណ៍ដែលបង្កើតឡើងដោយមេដឹកនាំរុស្ស៊ី និងសហរដ្ឋអាម៉េរិកនៅរដ្ឋអាឡាស្កា រួមទាំងការសម្របសម្រួលកិច្ចខិតខំប្រឹងប្រែងជាមួយភាគីសហរដ្ឋអាម៉េរិកដើម្បីដកចេញនូវឫសគល់នៃជម្លោះអ៊ុយក្រែន។
លោករដ្ឋមន្ត្រីបានសង្កត់ធ្ងន់លើភាពមិនអាចទទួលយកបាននៃគម្រោងដែលមានបំណងអូសបន្លាយជម្លោះដែលត្រូវបានផ្សព្វផ្សាយដោយរដ្ឋធានីកៀវ និងបណ្តាប្រទេសអឺរ៉ុបមួយចំនួន»។ ភាគីទាំងពីរបានយល់ព្រមរក្សាការសន្ទនាប្រកបដោយស្ថាបនារវាងការិយាល័យការបរទេសរុស្ស៊ី និងសហរដ្ឋអាម៉េរិក។
ដោយឡែក អ្នកនាំពាក្យរបស់លោក រូប៊ីអូ បានចេញសេចក្តីថ្លែងការណ៍ខ្លីមួយបន្ទាប់ពីកិច្ចប្រជុំដោយគ្រាន់តែនិយាយថា៖«លោក រូប៊ីអូ បានរំលឹកឡើងវិញនូវការអំពាវនាវរបស់ប្រធានាធិបតី ត្រាំ ឱ្យបញ្ឈប់ការសម្លាប់ និងតម្រូវការសម្រាប់រដ្ឋធានីម៉ូស្គូដើម្បីចាត់វិធានការដ៏មានអត្ថន័យឆ្ពោះទៅរកដំណោះស្រាយយូរអង្វែងនៃសង្គ្រាមរុស្ស៊ី-អ៊ុយក្រែន»។
អស់ជាច្រើនខែមកហើយ ដែលលោក ត្រាំ បាននិយាយថា រដ្ឋធានកៀវទំនងជាត្រូវការប្រគល់ទឹកដីទៅឱ្យរុស្ស៊ី ដើម្បីបញ្ចប់សង្រ្គាម។ ប៉ុន្តែលោក ត្រាំ បានផ្លាស់ប្ដូរជំហរភ្លាមៗបន្ទាប់ពីបានជួបជាមួយប្រធានាធិបតីអ៊ុយក្រែនលោក លោក វ៉ូឡូឌីមៀ ហ្សេឡេនស្គី កាលពីថ្ងៃអង្គារទី២៣កញ្ញា។
លោក ត្រាំ ជឿជាក់ថា អ៊ុយក្រែនអាចដណ្តើមបានមកវិញនូវទឹកដីទាំងអស់ដែលបានបាត់បង់ចាប់តាំងពីការឈ្លានពានរបស់រុស្ស៊ីឆ្នាំ២០២២។ មិនត្រឹមតែប៉ុណ្ណោះ លោក ហៅរុស្ស៊ីថាជាខ្លា ក្រដាស៕
