ថៃបើកការស៊ើបអង្កេត បន្ទាប់ពីពិធីការិនីរបស់ទីភ្នាក់ងារសារព័ត៌មានអង់គ្លេស BBC រាយការណ៍ថា មន្ត្រីនៅរាជធានីបាងកក បានរារាំងខ្លួនមិនឱ្យថតភាពយន្តឯកសារ ដែលបង្ហាញពីតថភាពសង្គមថៃ

បាងកក៖ រាជរដ្ឋាភិបាលថៃ បានបើកការស៊ើបអង្កេតភ្លាមៗ បន្ទាប់ពីពិធីការិនីរបស់ទីភ្នាក់ងារសារព័ត៌មានអង់គ្លេស BBC បានរាយការណ៍ថា មន្ត្រីនៅរាជធានីបាងកក បានរារាំងខ្លួនមិនឱ្យថតភាពយន្តឯកសារ ដែលបង្ហាញពីតថភាពសង្គមថៃ។

ភាពយន្តឯកសាររបស់ BBC ដែលមានចំណងជើងថា «ប្រទេសថៃ៖ ផ្នែកងងឹតនៃឋានសួគ៌ (Thailand: The Dark Side of Paradise)» ដែលជាការស៊ើបអង្កេតរយៈពេល៤៤នាទី ធ្វើបទបង្ហាញដោយលោកស្រី ហ្សារ៉ា ម៉ាកឌឺម៉ុត។ ភាពយន្តនេះបង្ហាញពីគ្រោះថ្នាក់ដែលភ្ញៀវទេសចរអង់គ្លេសជួបប្រទះពេលទៅលេងប្រទេសថៃ ដោយបង្ហាញថា ស្ថានកុងស៊ុលអង់គ្លេសនៅរាជធានីបាងកកជួយជនជាតិអង់គ្លេសប្រហែល២០០០នាក់ក្នុងមួយឆ្នាំ។

អ្នកធ្វើបទបង្ហាញវ័យ២៨ឆ្នាំរូបនេះ បាននិយាយនៅក្នុងភាពយន្តឯកសារថា៖«ប៉ូលិសមួយចំនួនហាក់ដូចជាបិទភ្នែកធ្វើមើលមិនឃើញចំពោះឧស្សាហកម្មផ្លូវភេទ។ ប៉ុន្តែប្រសិនបើអ្នកស្នាក់នៅហួសទិដ្ឋាការសូម្បីតែ២នាទីហើយមិនអាចបង់ប្រាក់ពិន័យបានទេ នោះអ្នកនឹងត្រូវចាប់ដាក់គុក»។

លោកស្រី ម៉ាកឌឺម៉ុត បានអះអាងថា ក្នុងរយៈពេលតិចជាង២៤ម៉ោងនៅរាជធានីបាងកក ក្រុមសហសេវិករបស់ខ្លួនវិះតែត្រូវបានប៉ូលិសថៃចាប់ខ្លួន ខណៈពេលកំពុងថតនៅផ្លូវ Cowboy Soi ជាតំបន់មួយពោរពេញទៅដោយស្ត្រីស្លៀកពាក់មិនសមរម្យ។ បើទោះជាបានទទួលការអនុញ្ញាតពីប៉ូលិសក្នុងការថតក៏ដោយ ក៏ក្រុមសហសេវិកត្រូវបានមន្ត្រីថៃសម្លុតគំរាមឱ្យលុបវីដេអូ ឬប្រឈមមុខនឹងការចាប់ខ្លួន។ យ៉ាងណាមិញ ក្រសួងទេសចរណ៍ និងកីឡារបស់ប្រទេសថៃ បានបដិសេធយ៉ាងខ្លាំងចំពោះការអះអាងដែលថា មន្ត្រីរាជរដ្ឋាភិបាល បានជ្រៀតជ្រែកក្នុងការថតភាពយន្តឯកសាររបស់ BBC នៅរាជធានីបាងកក។ លេខាធិការអចិន្ត្រៃយ៍ទេសចរណ៍ និងកីឡា លោកស្រី ណាត់រីយ៉ា ថាវីវង្ស (นัทรียา ทวีวงศ์) បានបញ្ជាក់ថា រាជរដ្ឋាភិបាលបានបើកការស៊ើបអង្កេតភ្លាមៗ បន្ទាប់ពីទូរទស្សន៍អន្តរជាតិដ៏ធំនេះ ចោទប្រកាន់ថា មន្ត្រីថៃបានរារាំងការផលិតឯកសាររបស់ពួកគេនៅក្នុងរាជធានីបាងកក៕