តុលាការសហព័ន្ធប្រេស៉ីល បង្គាប់ឱ្យអតីតប្រធានាធិបតី លោក Jair Bolsonaro បង់ប្រាក់សំណង ១៨៨.៨៦៥លានដុល្លារ សម្រាប់ការបំពានខាងសីលធម៌ តាមរយៈការបញ្ចេញមតិប្រកាន់ពូជសាសន៍
សៅប៉ូឡូ៖ បើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃទី១៧ ខែកញ្ញា ឆ្នាំ២០២៥ តុលាការសហព័ន្ធប្រេស៉ីល បានបង្គាប់ឱ្យអតីតប្រធានាធិបតី លោក Jair Bolsonaro បង់ប្រាក់សំណង ១៨៨.៨៦៥លានដុល្លារ សម្រាប់ការបំពានខាងសីលធម៌ តាមរយៈការបញ្ចេញមតិប្រកាន់ពូជសាសន៍ ពេលដែលលោកនៅកាន់តំណែង។
ការស៉ើបអង្កេតមួយបានធ្វើឡើង បន្ទាប់ពីមានការអត្ថាធិប្បាយរបស់ លោក Bolsonaro ទៅកាន់អ្នកគាំទ្រជនជាតិស្បែកខ្មៅម្នាក់ ដែលបានទៅជួបលោក កាលពីខែឧសភា ឆ្នាំ ២០២១ ហើយសុំថតរូបជាមួយ។ អំឡុងពេលនោះ លោក Bolsonaro បាននិយាយលេងសើចថាឃើញមានសត្វកន្លាត នៅក្នុងសក់របស់បុរសនោះ ហើយក៏ប្រៀបធៀប style សក់បុរសនោះទៅនឹងកន្លែងបង្កាត់សត្វកន្លាត ដែលចង់មានន័យថាសក់ក្បាលគាត់មិនស្អាត។
ការបង្គាប់ឱ្យបង់សំណងនេះទៀតសោត បានកើតឡើងតិចជាងមួយសប្តាហ៍ បន្ទាប់ពីតុលាការកំពូលប្រេស៉ីល កាត់ទោសអតីតប្រធានាធិបតីរូបនេះ ឱ្យជាប់ពន្ធនាគារ ២៧ឆ្នាំ និង ៣ខែពីបទប៉ុនប៉ងធ្វើរដ្ឋប្រហារក្នុងការបោះឆ្នោតឆ្នាំ ២០២២។ ឥឡូវនេះ លោក Bolsonaro កំពុងសម្រាកព្យាបាលនៅមន្ទីរពេទ្យក្នុងទីក្រុង Brasília បន្ទាប់ពីធ្លាក់ខ្លួនឈឺនៅឯគេហដ្ឋាន ជាកន្លែងដែលលោកស្ថិតក្រោមការឃុំខ្លួនក្នុងផ្ទះ៕
