កម្ពុជាចែករំលែកបទពិសោធនៃការប្រើប្រាស់ ថ្នាលផ្ទៀងផ្ទាត់ឯកសាររបស់រាជរដ្ឋាភិបាល verify.gov.kh ជូនប្រទេសជាសមាជិកអាស៊ាន និងអាស៊ានបូកបី

សៀមរាប៖ នៅក្នុងសិក្ខាសាលាស្តីពីឌីជីថលូបនីយកម្ម ក្នុងរដ្ឋបាលសាធារណៈ ដែលកម្ពុជាធ្វើជាម្ចាស់ផ្ទះរៀបចំរយៈពេល ៣ថ្ងៃ នៅខេត្តសៀមរាប កម្ពុជាបានចែករំលែកសមិទ្ធផលនៃរដ្ឋាភិបាលឌីជីថល និងការប្រើប្រាស់ កម្មវិធីនានារបស់កម្ពុជា ជូនប្រទេសជាសមាជិកអាស៊ាន អាស៊ានបូកបី និងមន្ត្រីរាជការនៃក្រសួង ស្ថាប័នរបស់កម្ពុជា។ បទបង្ហាញកាលពីថ្ងៃទី២៦ ខែសីហា ឆ្នាំ២០២៥ ផ្តល់ជូនដោយឯកឧត្តម ជា សេរីវឌ្ឍ អគ្គលេខាធិការនៃអគ្គលេខាធិការដ្ឋានគណៈកម្មាធិការរដ្ឋាភិបាលឌីជីថល។

នៅក្នុងបទបង្ហាញ ឯកឧត្តមអគ្គលេខាធិការ បានចែករំលែកចក្ខុវិស័យរបស់ក្រសួងប្រៃសណីយ៍ និងទូរគមនាគមន៍ នោះគឺ «A Paperless Government»។

ក្នុងបទបង្ហាញនោះ ឯកឧត្តមបានសង្កត់ធ្ងន់លើការប្រើប្រាស់ថ្នាលផ្ទៀងផ្ទាត់ឯកសាររបស់រាជរដ្ឋាភិបាល verify.gov.kh ដោយបានបង្ហាញពីបទពិសោធជោគជ័យជាច្រើន ដែលកម្ពុជាទទួលបាន ជាពិសេស ការកាត់បន្ថយយន្តការប្រើប្រាស់ឯកសារផ្ទាល់ ដោយងាកមកប្រើប្រាស់ឯកសារដែលមានការបញ្ជាក់ និងទទួលស្គាល់ត្រឹមត្រូវតាមប្រព័ន្ធឌីជីថល។ តាមរយៈសមិទ្ធផលទាំងនោះ កម្ពុជាក៏បាននាំយកការប្រើប្រាស់ថ្នាលផ្ទៀងផ្ទាត់ឯកសារ verify.gov ដើម្បីអនុវត្តនៅតាមប្រទេសផ្សេងៗទៀតផងដែរ។

ទន្ទឹមនេះ ក្នុងបរិបទនៃការគ្រប់មន្ត្រីក្នុងរដ្ឋបាលសាធារណៈ បទបង្ហាញខាងលើ ក៏បានរំលេចចេញនូវការប្រើប្រាស់ថ្នាលឌីជីថលគ្រប់គ្រងមន្ត្រីរាជការ ដែលក្រសួងមុខងារសាធារណៈ កំពុងប្រើប្រាស់ប្រចាំថ្ងៃនោះគឺ HRMIS (Human Resource Management Information System)។

បទបង្ហាញរបស់កម្ពុជាទទួលបានការចាប់អារម្មណ៍ និងទទួលការចូលរួមមតិយោបល់ រួមជាមួយការពិភាក្សាលើបញ្ហាប្រឈមនានា ដែលសហគមន៍អាស៊ានត្រូវរួមគ្នាដោះស្រាយ ដើម្បីជំរុញការធ្វើបរិវត្តកម្មឌីជីថលក្នុងរដ្ឋបាលសាធារណៈ និងក្នុងរាជរដ្ឋាភិបាលឱ្យកាន់តែប្រសើរ និងមានប្រសិទ្ធភាពខ្ពស់៕