រដ្ឋមន្រ្តីការបរទេសអាមេរិក ជួបពិភាក្សាជាមួយ បណ្តាសមភាគីអឺរ៉ុបជជែកអំពីកិច្ចប្រឹងប្រែងការទូត ដើម្បីស្វែងរកទីបញ្ចប់សម្រាប់សង្រ្គាមនៅអ៊ុយក្រែន

វ៉ាស៉ីនតោន៖ បើតាមការចេញផ្សាយដោយ ទីភ្នាក់ងារព័ត៌មាន Reuters កាលពីថ្ងៃចន្ទ ទី២៥ ខែសីហា រដ្ឋមន្រ្តីការបរទេសនៃសហរដ្ឋអាមេរិក លោក Marco Rubio បានពិភាក្សាជាមួយ បណ្តាសមភាគីអឺរ៉ុបរបស់លោក ហើយជជែកអំពីកិច្ចប្រឹងប្រែងការទូត ដើម្បីស្វែងរកទីបញ្ចប់សម្រាប់សង្រ្គាមនៅអ៊ុយក្រែន។

អ្នកនាំពាក្យក្រសួងការបរទេសអាមេរិក បានឱ្យដឹងថា លោក Rubio បាននិយាយជាមួយរដ្ឋមន្រ្តីការបរទេសចក្រភពអង់គ្លេស លោក David Lammy, រដ្ឋមន្រ្តីការបរទេសអ៊ុយក្រែន លោក Andrii Sybiha, រដ្ឋមន្រ្តីការបរទេសហ្វាំងឡង់ លោកស្រី Elina Valtonen, ប្រធានគោលនយោបាយការបរទេសហភាពអឺរ៉ុប (EU) លោកស្រី Kaja Kallas ក្នុងចំណោមប្រមុខការទូតដទៃទៀត។

នាឱកាសសន្ទនាគ្នាខាងលើ លោក Sybiha បានលើកឡើងថា អ៊ុយក្រែនអរគុណចំពោះលោក Rubio សម្រាប់កិច្ចប្រឹងប្រែងរបស់លោក និងចំពោះប្រធានាធិបតីអាមេរិក លោក ដូណាល់ ត្រាំ សម្រាប់ភាពជាអ្នកដឹកនាំបង្កើតសន្តិភាព។ លោក Sybiha បានបន្ថែមថា ការធានាសន្តិសុខដល់អ៊ុយក្រែន គឺជាគន្លឹះដ៏សំខាន់មួយ។

គួរបញ្ជាក់ថា លោក ត្រាំ បន្ទាប់ពីជំនួបកំពូលដាច់ដោយឡែកពីគ្នា ជាមួយប្រធានាធិបតីរុស្ស៉ី លោក វ៉្លាឌីមៀ ពូទីន ហើយក្រោយមក ជាមួយប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី និងក្រុមមេដឹកនាំអឺរ៉ុប បានចាត់តាំងឱ្យលោក Rubio ដឹកនាំកិច្ចពិភាក្សា ស្តីពីការផ្តល់ការធានាសន្តិសុខសម្រាប់អ៊ុយក្រែន៕