មន្រ្តីអាមេរិក៖ ប្រតិបត្តិការវាយឆ្មក់របស់យោធាសហរដ្ឋអាមេរិក នៅភាគពាយ័ព្យប្រទេសស៉ីរី បានកំណត់គោលដៅ និងសម្លាប់សមាជិកជាន់ខ្ពស់ម្នាក់នៃក្រុម ISIS
ស៉ីរី៖ បើយោងតាមការចេញផ្សាយនៅថ្ងៃព្រហស្បតិ៍ ទី២១ ខែសីហា ឆ្នាំ២០២៥ មន្រ្តីអាមេរិកម្នាក់បានប្រាប់ Reuters ថាប្រតិបត្តិការវាយឆ្មក់របស់យោធាសហរដ្ឋអាមេរិក នៅភាគពាយ័ព្យប្រទេសស៉ីរី កាលពីថ្ងៃពុធសប្តាហ៍នេះ បានកំណត់គោលដៅ និងសម្លាប់សមាជិកជាន់ខ្ពស់ម្នាក់នៃក្រុម ISIS។
នេះជាការវាយឆ្មក់លើកទីពីរលើភាគខាងជើងស៉ីរី ដោយកងកម្លាំងអាមេរិក ចាប់តាំងពីអតីតប្រធានាធិបតីស៉ីរី លោក Bashar al-Assad ត្រូវបានបណ្តេញចេញពីអំណាច នៅក្នុងខែធ្នូ។ ដោយនិយាយក្នុងលក្ខខណ្ឌមិនបញ្ចេញឈ្មោះ មន្រ្តីអាមេរិករូបនោះនិយាយថា សមាជិកជាន់ខ្ពស់នៃក្រុម ISIS ដែលត្រូវបានសម្លាប់គឺជាបេក្ខជនម្នាក់ ដែលនឹងត្រូវជ្រើសរើសឱ្យធ្វើជាមេដឹកនាំរបស់ក្រុមនេះ នៅក្នុងប្រទេសស៉ីរី។
តាមសន្តិសុខស៉ីរី និងអ្នករស់នៅក្នុងទីក្រុង Atmeh ខេត្ត Idlib ការវាយឆ្មក់មួយបានកើតឡើងកាលពីវេលាម៉ោង ២យប់ថ្ងៃពុធ។ ប្រភពមួយនៅ ស៉ីរី និយាយ ថា អ្នកដែលត្រូវបានកំណត់គោលដៅ ជា ជនជាតិ អ៉ីរ៉ាក់ ហើយមានភរិយាជាជនជាតិបារាំង។ ជុំវិញការលើកឡើងនេះ មន្ទីរបញ្ចកោណមិនទាន់មានការបញ្ជាក់នោះទេ៕
