ញូវដែលី៖ បើតាមការចេញផ្សាយដោយទីភ្នាក់ងារសារព័ត៌មាន AFP ឥណ្ឌា នៅថ្ងៃពុធ ទី២០ ខែសីហា បានអះអាងថាខ្លួនបានធ្វើតេស្ដបាញ់មីស៊ីលបាលិស្ទីគរយៈចម្ងាយឆ្ងាយមួយគ្រាប់ប្រកបដោយជោគជ័យ ហើយនៅពេលដាក់ឱ្យធ្វើប្រតិបត្តិការ មីស៊ីលនេះអាចមានសមត្ថភាពបំពាក់ក្បាលគ្រាប់នុយក្លេអ៊ែរបាញ់ដល់គ្រប់ទីកន្លែងនៃប្រទេសចិន។
តាមយោធាឥណ្ឌា មីស៊ីល Agni-5 ត្រូវបានធ្វើតេស្ដបាញ់ដោយជោគជ័យនៅឯរដ្ឋ Odisha ស្ថិតនៅភាគខាងកើតនៃប្រទេសឥណ្ឌា។ ឥណ្ឌា និងចិនគឺជាប្រទេស២ មានប្រជាជនច្រើនជាងគេបំផុតនៅលើពិភពលោក កំពុងប្រជែងដណ្ដើមឥទ្ធិពលគ្នាយ៉ាងខ្លាំងនៅក្នុងតំបន់អាស៊ីខាងត្បូង ហើយទំនាក់ទំនងបានធ្លាក់ចុះដល់ចំណុច ទាបបំផុតមួយក្នុងឆ្នាំ២០២០ ក្រោយផ្ទុះជម្លោះព្រំដែន។
ឥណ្ឌាក៏ជាសមាជិកមួយនៃក្រុមប្រទេស Quad ជាមួយសហរដ្ឋអាមេរិក អូស្ត្រាលី និងជប៉ុន ដែលត្រូវបាន បង្កើតឡើងដើម្បីទប់ទល់នឹងចិនផងដែរ។
លើសពីនេះទៅទៀត សត្រូវរបស់ឥណ្ឌាគឺប៉ាគីស្ថានក៏មានអាវុធនុយក្លេអ៊ែរដែរ ហើយប្រទេសទាំង២ប៊ិះនឹងផ្ទុះសង្រ្គាមទ្រង់ទ្រាយធំនឹងគ្នាទៅហើយកាលពី ខែឧសភាកន្លងទៅ។ ក៏ប៉ុន្តែ ខណៈរងការគំរាមកំហែងពន្ធគយពីលោកប្រធានាធិបតីអាមេរិក លោក ដូណាល់ ត្រាំ ចិន និងឥណ្ឌាបានព្រមព្រៀងផ្សះផ្សាទំនាក់ទំនង ឡើងវិញ ហើយនាយករដ្ឋមន្ត្រីឥណ្ឌា លោក Narendra Modi ត្រូវបានរាយការណ៍ថាគ្រោងនឹងធ្វើទស្សនកិច្ចទៅកាន់ប្រទេសចិនជាលើកដំបូងចាប់តាំងពី ឆ្នាំ២០១៨មក នៅក្នុងខែសីហានេះ៕
