កម្ពុជាមិនគាំទ្រដាច់ខាតចំពោះការផ្សព្វផ្សាយព័ត៌មានមិនពិត ព្រោះមិនបានជួយដល់ការបន្ធូរបន្ថយភាពតានតឹងទេ ហើយប៉ះពាល់ដល់កិច្ចសន្ទនាប្រកបដោយសន្តិភាពថែមទៀត

ភ្នំពេញ៖ លោកជំទាវឧត្តមសេនីយ៍ឯក ម៉ាលី សុជាតា អ្នកនាំពាក្យក្រសួងការពារជាតិ បានបញ្ជាក់ថា កម្ពុជាមិនគាំទ្រដាច់ខាតចំពោះការផ្សព្វផ្សាយព័ត៌មានមិនពិត ព្រោះមិនបានជួយដល់ការបន្ធូរបន្ថយភាពតានតឹងទេ ហើយប៉ះពាល់ដល់កិច្ចសន្ទនាប្រកបដោយសន្តិភាពថែមទៀត។

ថ្លែងក្នុងឱកាសសង្ខេបព័ត៌មាន ស្តីពីលទ្ធផលនៃការអនុវត្តបទឈប់បាញ់រវាងកម្ពុជា-ថៃ នៅព្រឹកថ្ងៃទី២១ ខែសីហានេះ លោកជំទាវឧត្តមសេនីយ៍ឯកលើកឡើងដូច្នេះថា “ចំពោះកម្ពុជាគឺមិនគាំទ្រដាច់ខាតចំពោះការផ្សព្វផ្សាយព័ត៌មានមិនពិត ឬចែករំលែកព័ត៌មានមិនពិត ឬផលិតព័ត៌មានក្លែងក្លាយណាមួយព្រោះទង្វើទាំងអស់នេះ មិនបានជួយដល់ការបន្ធូរបន្ថយភាពតានតឹង និងជួយកាត់បន្ថយផលប៉ះពាល់អវិជ្ជមានទៅលើសតិអារម្មណ៍សាធារណជនប៉ុណ្ណោះទេ ថែមទាំងមិនបង្កើតបរិយាកាសអំណោយផល ដល់កិច្ចសន្ទនាប្រកបដោយ សន្តិភាពបន្ថែមទៀត”។

លោកជំទាវអ្នកនាំពាក្យ បានបន្ថែមថា កម្ពុជាបន្តអំពានាវឱ្យភាគីថៃអនុវត្តទៅតាមបទឈប់បាញ់ និងកិច្ចព្រមព្រៀងទាំងអស់ ក្នុងនោះក៏មានការបញ្ជូនយោធិនដែលថៃចាប់ខ្លួន១៨នាក់ ឱ្យត្រឡប់មកកម្ពុជាវិញផងដែរ។ ការទាមទារឱ្យដោះលែងនេះ មិនមែនតែកម្ពុជាទេ សូម្បីសហគមន៍អន្តរជាតិ ក៏បានអំពាវនាវឱ្យថៃដោះលែងផងដែរ ព្រោះថៃបានចាប់ខ្លួន យោធិនកម្ពុជា ៨ម៉ោងក្រោយកិច្ចព្រមព្រៀងឈប់បាញ់ចូលជាធរមាន។

អ្នកនាំពាក្យក្រសួងការពារបញ្ជាក់ថា ការអនុវត្តបទឈប់បាញ់បានយ៉ាងពេញលេញរបស់ភាគីទាំងសងខាងនឹងធ្វើឲ្យបរិយាកាសមានភាពអំណោយផល ឆ្ពោះទៅការនាំមកវិញនូវសន្តិភាព ស្ថិរភាព និងប្រក្រតីភាព នៃទំនាក់ទំនងរវាងប្រទេសទាំងពីរ ដែលមិនត្រឹមតែជាអ្វីដែលប្រជាជនទាំងពីរចង់បាននោះទេ ក៏ប៉ុន្តែពិភពលោកទាំងមូលក៏ចង់ឃើញផងដែរ តាមរយៈការចេញសារជាច្រើនសម្តែងការអបអរសាទរ និងការគាំទ្រចំពោះ កិច្ចព្រមព្រៀងបទឈប់បាញ់ និងលទ្ធផលជាវិជ្ជមាននៃកិច្ចប្រជុំវិសាមញ្ញ នៃគណៈកម្មការធិការព្រំដែនទូទៅកម្ពុជា-ថៃ (GBC)៕