UN៖ បើតាមការចេញផ្សាយដោយ ទីភ្នាក់ងារព័ត៌មាន AFP នៅថ្ងៃអង្គារ ទី១៩ ខែសីហា អង្គការសហប្រជាជាតិ (UN) បានរាយការណ៍ថា បុគ្គលិកជំនួយមនុស្សធម៌សរុប៣៨៣នាក់ ត្រូវបានសម្លាប់កាលពីក្នុងឆ្នាំ២០២៤ ខណៈវាគឺជាចំនួនច្រើនមិនធ្លាប់មាន ហើយបានព្រមានថា តួលេខក្នុងឆ្នាំនេះ ក៏ហាក់ច្រើនមិនធម្មតាផងដែរ។
ក្នុងឱកាសទិវាមនុស្សធម៌ពិភពលោក UN បាននិយាយថា តួលេខអ្នកស្លាប់ខាងលើកាលពីឆ្នាំ២០២៤ គឺកើនឡើង៣១ភាគរយ ធៀបទៅនឹងឆ្នាំ២០២៣ ហើយកត្តាចម្បង គឺដោយសារជម្លោះដ៏អាក្រក់ នៅតំបន់ហ្កាហ្សា ជាទីដែលបុគ្គលិកជំនួយមនុស្សធម៌១៨១នាក់ ត្រូវបានសម្លាប់ ព្រមទាំងនៅស៊ូដង់ ដែលមានអ្នកស្លាប់៦០នាក់។
បើតាម UN ជនដៃដល់ចម្បងបំផុតនៃការសម្លាប់បុគ្គលិកមនុស្សធម៌ កាលពីឆ្នាំ២០២៤ គឺតួអង្គរដ្ឋ ហើយអ្នកដែលស្លាប់ភាគច្រើន ជាបុគ្គលិកក្នុងស្រុក។ ពួកគេត្រូវបានសម្លាប់ ពេលកំពុងបំពេញភារកិច្ច ឬពេលកំពុងនៅក្នុងផ្ទះ។ ក្រៅពីអ្នកស្លាប់ បុគ្គលិកជំនួយមនុស្សធម៌៣០៨នាក់ផ្សេងទៀត បានរងរបួស ១២៥នាក់ត្រូវបានចាប់ជំរិត និង៤៥នាក់ ត្រូវបានឃុំខ្លួន កាលពីឆ្នាំមុន។ ដោយឡែក តួលេខបឋមបានបង្ហាញថា គិតត្រឹមថ្ងៃទី១៤ ខែសីហា បុគ្គលិកមនុស្សធម៌២៦៥នាក់ហើយ ត្រូវបានសម្លាប់ក្នុងឆ្នាំនេះ។
គួរបញ្ជាក់ថា ទិវាមនុស្សធម៌ពិភពលោក ត្រូវបានបង្កើតឡើងជាខួបនៃការស្លាប់របស់ប្រមុខសិទ្ធិមនុស្ស UN លោក Sergio Vieira de Mello និងបុគ្គលិកមនុស្សធម៌២១នាក់ផ្សេងទៀត ក្នុងករណីវាយប្រហារបំផ្ទុះគ្រាប់បែក នៅទីស្នាក់ការ UN ក្នុងទីក្រុងបាកដាដ កាលពីឆ្នាំ២០០៣៕
