ប្រជាពលរដ្ឋខេត្តប៉ៃលិនយ៉ាងច្រើនកុះករ ចូលរួមស្ម័គ្រចិត្ដបរិច្ចាគឈាម លើកទឹកចិត្ត និងគាំទ្រដល់យុទ្ធជនកម្ពុជា
ប៉ៃលិន៖ នៅថ្ងៃទី២៨ ខែកក្កដា ឆ្នាំ២០២៥ មន្ត្រីរាជការ ព្រះសង្ឃ យុវជន និងប្រជាពលរដ្ឋខេត្តប៉ៃលិន យ៉ាងច្រើនកុះករ បានចូលរួមស្ម័គ្រចិត្តបរិច្ចាគឈាម គាំទ្រដល់យុទ្ធជនកម្ពុជា ដែលកំពុងការពារបូរណភាពទឹកដីពីសង្រ្គាមឈ្លានពានរបស់ថៃយ៉ាងគឃ្លើន ហើយការស្ម័គ្រចិត្តបរិច្ចាគឈាមមនុស្សធម៌នេះ ធ្វើឡើងតបតាមការអំពាវនាវរបស់លោកជំទាវ ពេជ ចន្ទមុន្នី ហ៊ុនម៉ាណែត ដើម្បីត្រៀមនៅពេលបន្ទាន់ណាមួយ ខណៈវីរកងទ័ពជួរមុខកម្ពុជាកំពុងការពារបូរណភាពទឹកដីចំពោះសត្រូវឈ្លានពានយ៉ាងអង់អាចក្លាហាន។
លោកជំទាវបណ្ឌិត បាន ស្រីមុំ អភិបាលខេត្តប៉ៃលិន បានមានប្រសាសន៍លើកឡើងថា ក្នុងបុព្វហេតុមនុស្សធម៌ និងទឹកចិត្តស្នេហាជាតិមាតុភូមិ រួមទាំងការគាំទ្រដល់យុទ្ធជនកម្ពុជាដែលកំពុងការពារបូរណភាពទឹកដីចំពោះសត្រូវឈ្លានពាន លោកជំទាវ ពេជ ចន្ទមុន្នី ហ៊ុន ម៉ាណែត បានអំពាវនាវដល់បងប្អូនប្រជាពលរដ្ឋស្ម័គ្រចិត្តចូលរួមបរិច្ចាគឈាមឱ្យបានកាន់តែច្រើន ដើម្បីត្រៀមនៅពេលបន្ទាន់ណាមួយ ហើយកម្មវិធីបរិច្ចាគឈាមដោយស័្មគ្រចិត្តនេះ គឺគោលបំណង ពីរចំណុចសំខាន់ៗ ដើម្បីបម្រើដល់សេចក្តីត្រូវការ ជាប្រចាំក្នុងការសង្គ្រោះជីវិតដែលទទួលគ្រោះថ្នាក់ ឬអ្នកជំងឺ ដែលកំពុងសម្រាកព្យាបាល ហើយមាន តម្រូវការឈាមជាបន្ទាន់ និងត្រៀមបម្រុងសម្រាប់វីរៈកងទ័ពជួរមុខ ឬ ប្រជាពលរដ្ឋក្នុងករណីដែលទទួលរងរបួស ឬគ្រោះថ្នាក់ដោយសារសង្គ្រាមឈ្លានពានទឹកដី ដែលទាមទារឱ្យមានតម្រូវការឈាមជាចាំបាច់ ក្នុងការសង្គ្រោះ ឬអាចនឹងសម្រាប់បំពេញតាមសេចក្តីត្រូវការឈាមជាបន្ទាន់ណាមួយរបស់គ្រូពេទ្យ ព្រោះ “ឈាមជាជីវិត។
លោកជំទាវបានមានប្រសាសន៍ថ្លែងអំណរគុណដល់បងប្អូន អ៊ំពូមីង តាយាយ មហាគ្រួសារខ្មែរ ដែលបានមកបរិច្ចាគឈាមយ៉ាងច្រើន ដែលនេះបានបង្ហាញយ៉ាងច្បាស់អំពីទឹកចិត្តមនុស្សធម៌ និងគាំទ្រដល់តម្រូវការដែលអាចនឹងមានសម្រាប់វីរកងទ័ព ក៏ដូចជាប្រជាជនដែលជាជនភៀសសឹកនៅក្នុងខេត្តឧត្តរមានជ័យ និង ខេត្តព្រះវិហារ ជាពិសេស បានចូលរួមចំណែកជួយទៅដល់ប្រទេសជាតិ និងរាជរដ្ឋាភិបាលកម្ពុជាដែលមានសម្តេចមហាបវរធិបតី ហ៊ុន ម៉ាណែត ជានាយករដ្ឋមន្ត្រី ។
