អង្គការហេឡែនខេលល័រ និងមន្ទីរអប់រំខេត្តកំពត រៀបចំការតាំងពិព័រណ៍សាលារៀន ស្តីពីការកាត់បន្ថយហានិភ័យជំងឺមិនឆ្លង នៅតាមគ្រឹះស្ថានសិក្សា
កំពត៖ មន្រ្តីនៃមន្ទីរអប់រំ យុវជន និងកីឡាខេត្តកំពត ព្រមទាំងមន្រ្តីសម្របសម្រួលនៃការិយាល័យអប់រំ យុវជន និងកីឡា ស្រុកបន្ទាយមាស សហការជាមួយបុគ្គលិកអង្គការហេឡែនខេលល័រ អន្តរជាតិ រៀបចំការតាំងពិព័រណ៍នៅតាមសាលារៀនគោលដៅចំនួន១០ ក្នុងស្រុកបន្ទាយមាស ក្នុងគម្រោងកាត់បន្ថយហានិភ័យនៃជំងឺមិនឆ្លង តាមរយៈការគាំទ្រថវិកាពីមូលនិធិទឹកនោមផ្អែមពិភពលោក។
លោកហេង សុខហ៊ុល បុគ្គលិកអង្គការហេឡែនខេលល័រ អន្តរជាតិ បានលើកឡើងថា ការតាំងពិព័រសាលារៀនផ្តោតលើអាហារសុខភាពនេះ ក្នុងគោលបំណងលើកកម្ពស់ការយល់ដឹងអំពីកត្កាហានិភ័យ និងវិធីការបង្ការជំងឺមិនឆ្លង យល់ដឹងឥរិយាបថរស់នៅប្រកបដោយសុខុមាលភាព រួមមានទម្លាប់ការបន្ថយការប្រើប្រាស់ស្ករតិច អំបិលតិច និងខ្លាញ់តិច ការយល់ដឹងអំពីអាហារសុខភាព និងអាហារប៉ះពាល់ស្របតាមប្រកាស១៨ របស់ក្រសួងអប់រំ យុវជន និងកីឡា ក្នុងនោះផងដែរ បានផ្សាភ្ជាប់ទំនាក់ទំនងរវាងកសិករមូលដ្ឋាន ដែលផលិតបន្លែផ្លែឈើ ត្រីសាច់ ជាមួយអ្នកលក់ក្នុងសាលារៀន ដើម្បីផ្គត់ផ្គង់អាហារសុខភាព និងសុវត្ថិភាពសម្រាប់កុមារ។
លោកវ៉ាន់ សុលី ជាមន្រ្តីទទួលបន្ទុកការងារសុខភាពសិក្សានៃការិយាល័យអប់រំ យុវជន និងកីឡា ស្រុកបន្ទាយមាស បានមានប្រសាសន៍ថា ការតាំងពិព័រណ៍សាលារៀនស្ដីពីជំងឺមិនឆ្លងគឺជាវិធីមួយដ៏មានប្រសិទ្ធភាពក្នុងការបង្កើនការយល់ដឹង និងលើកកម្ពស់សុខភាពសិស្សានុសិស្ស និងប្រជាពលរដ្ឋ។ លើសពីនេះទៀត វាអាចជួយសម្រួលដល់ការកាត់បន្ថយអត្រាជំងឺមិនឆ្លង និងលើកកម្ពស់គុណភាពជីវិតរបស់ប្រជាជន។ សូមបញ្ជាក់ផងដែរថា ការតាំងពិព័រណ៍សាលារៀនស្ដីពីអាហារសុខភាពនេះ មានអ្នកចូលរួមប្រជាង៤០០នាក់ ជាសិស្សានុសិស្ស ប្រជាពលរដ្ឋ អ្នកលក់ដូរក្នុងនឹងក្រៅសាលា និងលោកគ្រូអ្នកគ្រូ នៅតាមសាលាគោលដៅទាំង១០ ក្នុងស្រុកបន្ទាយមាស៕
