ស្ថាបនិកក្រុមហ៊ុន SoftBank Group កំពុង ពិចារណា បង្កើតគម្រោងឧស្សាហកម្មដ៏ធំមួយដែលមានតម្លៃ ១ ទ្រីលានដុល្លារ (ឬ ១ ពាន់ពាន់លានដុល្លារ) នៅរដ្ឋ Arizona សហរដ្ឋអាមេរិក

បរទេស៖ បើយោងតាមការចុះផ្សាយរបស់ Bloomberg News និងត្រូវចេញផ្សាយបន្តដោយទីភ្នាក់ងារសារព័ត៌មាន Reuters នៅថ្ងៃទី២០ ខែមិថុនា ឆ្នាំ២០២៥ លោក Masayoshi Son ស្ថាបនិក ក្រុមហ៊ុន SoftBank Group កំពុង ពិចារណា បង្កើត គម្រោង ឧស្សាហកម្ម ដ៏ ធំ មួយ ដែល មាន តម្លៃ ១ ទ្រីលាន ដុល្លារ (ឬ ១ ពាន់ពាន់លានដុល្លារ) នៅ រដ្ឋ Arizona សហរដ្ឋអាមេរិក ដើម្បី ផលិត មនុស្សយន្ត និង បច្ចេកវិទ្យា បញ្ញាសិប្បនិម្មិត (AI)។

គម្រោងនេះមានឈ្មោះ ថា «Project Crystal Land» គឺមានបំណង នាំយក ការ ផលិត បច្ចេកវិទ្យាទំនើបៗ ត្រឡប់ មក សហរដ្ឋអាមេរិកវិញ និងបង្កើត មជ្ឈមណ្ឌល ផលិតកម្មដ៏ធំស្រដៀងទៅ នឹង ទីក្រុង Shenzhen របស់ ចិន។

Bloomberg បានគូសបញ្ជាក់ថា SoftBank កំពុង ស្វែងរក កិច្ចសហប្រតិបត្តិការ ជាមួយ ក្រុមហ៊ុន Taiwan Semiconductor Manufacturing Co (TSMC) ហើយបានពិភាក្សា ជាមួយរដ្ឋមន្ត្រីក្រសួងពាណិជ្ជកម្មអាមេរិកលោក Howard Lutnick អំពីលទ្ធភាពនៃការលើកលែង ពន្ធ។

យ៉ាងណាមិញគេមិនទាន់ច្បាស់ពី តួនាទី ជាក់លាក់របស់ TSMC ក្នុងគម្រោង នេះ នៅឡើយទេហើយក៏មិនដឹងថា តើក្រុមហ៊ុន តៃវ៉ាន់ នេះចាប់អារម្មណ៍ ចូលរួម ដែរ ឬ អត់។ TSMC កំពុងសាងសង់រោងចក្រផលិត បន្ទះឈីបនៅសហរដ្ឋអាមេរិករួចហើយ ជាមួយការវិនិយោគ ១៦៥ ពាន់លានដុល្លារ។ លោកSon ក៏កំពុងស្វែងរកចំណាប់អារម្មណ៍ ពី ក្រុមហ៊ុនបច្ចេកវិទ្យាផ្សេងទៀតដូចជា Samsung Electronics ផងដែរ។

គួរជម្រាបថា ផែនការនេះកំពុងស្ថិតនៅ ក្នុង ដំណាក់កាលបឋមនៅឡើយ ហើយ លទ្ធភាពនៃការសម្រេចបានអាស្រ័យ លើ ការ គាំទ្រពីរដ្ឋបាលលោក Trump និង មន្ត្រី រដ្ឋ។ ជុំវិញរបាយការណ៍នេះទាំង SoftBank និង TSMC បានបដិសេធមិនធ្វើអត្ថាធិប្បាយ នោះទេ៕