វ៉ាស៊ីនតោន៖ អ៊ីស្រាអែលយល់ព្រមលើសំណើបទឈប់បាញ់របស់អាម៉េរិកនៅតំបន់ហ្កាហ្សា ខណៈក្រុមហាម៉ាសអះអាងកំពុងត្រួតពិនិត្យមើលផែនការនេះ។ នេះបើតាមសេតវិមានអះអាងកាលពីថ្ងៃព្រហស្បតិ៍ទី២៩ឧសភា។
ប្រព័ន្ធផ្សព្វផ្សាយអ៊ីស្រាអែលបានរាយការណ៍ថា នាយករដ្ឋមន្ត្រី លោក បែនចាមីន នេតាន់យ៉ាហ៊ូ បានបង្ហើរសំឡេងប្រាប់ក្រុមគ្រួសារចំណាប់ខ្មាំងនៅហ្កាហ្សា ថា អ៊ីស្រាអែលបានទទួលយកកិច្ចព្រមព្រៀងបទឈប់បាញ់ ដែលណែនាំដោយបេសកជនរបស់លោក ដូណាល់ ត្រាំ នៅមជ្ឈិមបូព៌ា គឺ លោក ស្វីវ វីតខូហ្វ (Steve Witkoff) ខណៈប្រព័ន្ធចែកចាយជំនួយស្បៀងអាហារនៅហ្កាហ្សា ដែលគាំទ្រដោយសហរដ្ឋអាម៉េរិក ត្រូវបានពង្រីកទូលំទូលាយ។
យ៉ាងណា ការិយាល័យរបស់លោក នេតាន់យ៉ាហ៊ូ មិនបានបញ្ជាក់លើរបាយការណ៍នេះទេ ប៉ុន្តែអ្នកនាំពាក្យសេតវិមាន លោកស្រី ខារ៉ូលីន ឡេវីត (Karoline Leavitt) បានប្រាប់អ្នកសារព័ត៌មានថា អ៊ីស្រាអែលបានចុះហត្ថលេខាលើសំណើនេះហើយ។
ប្រភពមួយបានអះអាងក្នុងលក្ខខណ្ឌមិនបញ្ចេញឈ្មោះថា ដំណាក់កាលដំបូងនៃកិច្ចព្រមព្រៀងដែលបានស្នើឡើង នឹងរួមបញ្ចូលបទឈប់បាញ់រយៈពេល៦០ថ្ងៃ និងរំហូរនៃជំនួយមនុស្សធម៌ចូលទៅក្នុងតំបន់ទុរ្ភិក្សមួយនេះ។
ទោះជាយ៉ាងនេះក្ដី ក្រុមសកម្មប្រយុទ្ធហាម៉ាសបានលើកឡើងថា ខ្លួនកំពុងសិក្សាលើសំណើរនេះ ហើយកំពុងពិភាក្សាគ្នានៅឡើយ។ ជាមួយគ្នា មន្រ្តីជាន់ខ្ពស់របស់ក្រុមហាម៉ាសបានលើកឡើងថា អ៊ីស្រាអែលគ្មានបំណងក្នុងការបញ្ចប់សង្រ្គាម ដកកងទ័ព ឬផ្តល់ជំនួយ ដូចដែលក្រុមហាម៉ាសបានទាមទារនោះទេ។
ជាក់ស្តែង អ៊ីស្រាអែលបានទទូចឱ្យក្រុមហាម៉ាសដកអាវុធចេញទាំងស្រុង ហើយអំពាវនាវឱ្យចំណាប់ខ្មាំងទាំង ៥៨នាក់ ដែលនៅតែឃុំខ្លួននៅតំបន់ហ្កាហ្សា ត្រូវតែដោះលែងវិញ មុននឹងយល់ព្រមបញ្ចប់សង្រ្គាម។ ប៉ុន្តែក្រុមហាម៉ាសបានទាត់ចោលការទាមទារ ជុំវិញការទម្លាក់អាវុធ ហើយជំរុញឱ្យអ៊ីស្រាអែល ត្រូវតែដកកងទ័ពរបស់ខ្លួនចេញពីតំបន់ហ្កាហ្សា ហើយប្តេជ្ញាបញ្ចប់សង្គ្រាមទាំងស្រុង។
មូលនិធិមនុស្សធម៌ហ្កាហ្សា ជាក្រុមឯកជនគាំទ្រដោយសហរដ្ឋអាម៉េរិក និងអ៊ីស្រាអែល បាននិងកំពុងពង្រីកការចែកចាយជំនួយរបស់ខ្លួនទៅកាន់តំបន់រងគ្រោះ ដោយសង្គ្រាមមួយនេះ។ គួរបញ្ជាក់ថា យុទ្ធនាការរបស់អ៊ីស្រាអែលបានសម្លាប់ប្រជាជនប៉ាឡេស្ទីនជាង៥៤០០០នាក់៕
