អភិបាលខេត្តបន្ទាយមានជ័យ អញ្ជើញជាអធិបតីបើកវគ្គបណ្តុះបណ្តាលស្តីពី ” កិច្ចការរដ្ឋបាល និង បណ្ណសារ”

បន្ទាយមានជ័យ៖ នៅព្រឹកថ្ងៃទី២៨ ខែឧសភា ឆ្នាំ ២០២៥ ឯកឧត្តម អ៊ុំ រាត្រី អភិបាល នៃគណៈអភិបាលខេត្តបន្ទាយមានជ័យ អញ្ជើញជាអធិបតីភាពបើកវគ្គបណ្តុះបណ្តាលស្តីពី ” កិច្ចការរដ្ឋបាល និងបណ្ណសារ” ដល់មន្រ្តីរាជការ នៃរដ្ឋបាលខេត្ត ក្រុង-ស្រុក និងមន្ទីរសុខាភិបាលនៃរដ្ឋបាលខេត្ត ប្រារព្ធធ្វើនៅសាលប្រជុំធំ នៃសាលាខេត្តបន្ទាយមានជ័យ។

ក្នុងឱកាសនោះ ឯកឧត្ដម អ៊ុំ រាត្រី បានមានប្រសាសន៍ ជំរុញដល់អាជ្ញាធរពាក់ព័ន្ធគ្រប់លំដាប់ថ្នាក់ លេីការកែទម្រង់ដើម្បីអភិបាលកិច្ចល្អ បន្តការកែទម្រង់រដ្ឋបាលសាធារណៈ ដើម្បីកសាង ឱ្យបាននូវរដ្ឋបាលសាធារណៈប្រកបដោយសមត្ថភាព ភាពខ្លាំង ស្អាតស្អំ វៃឆ្លាត និងផ្តោតលើប្រជាជន ដោយត្រូវលើកកម្ពស់ការផ្តល់សេវាសាធារណៈឱ្យកាន់តែមានគុណភាព និងប្រសិទ្ធភាពខ្ពស់។

ឯកឧត្ដមបញ្ជាក់ថា ដោយអនុវត្តតាមស្មារតីនេះ ឯកឧត្តម ឌិត ទីណា រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តបន្ទាយមានជ័យ បានដាក់គោលដៅដោយកំណត់យក ខេត្តបន្ទាយមានជ័យ ជាខេត្តគំរូ ក្នុងការផ្តល់សេវាសាធារណៈ ដោយផ្តល់ការឧបត្ថម្ភគាំទ្របន្ថែមដល់ មន្រ្តីបង្គោល សំខាន់ៗនៅមូលដ្ឋានរួមមាន៖ នៅរដ្ឋបាលក្រុង ស្រុក បានផ្តល់លទ្ធភាពបន្ថែមបុគ្គលិកស្ម័គ្រចិត្ត២រូប និងនៅតាមរដ្ឋបាលឃុំ សង្កាត់ បន្ថែមបុគ្គលិកស្ម័គ្រចិត្ត១រូប ដើម្បីពន្លឿនការផ្តល់សេវាអត្រានុកូលដ្ឋាន និងឧបត្ថម្ភដល់ប៉ុស្តិនគរបាល រដ្ឋបាលឃុំ សង្កាត់ ដែលនៅឆ្ងាយពីអធិការដ្ឋាន ឯកឧត្ដម ឌិត ទីណា ក៏បានឧបត្ថម្ភថវិកាក្នុងការធ្វេីដំណេីរ ដើម្បីពន្លឿនការផ្តល់សេវាតម្រូវការជូនប្រជាពលរដ្ឋដូចជា សៀវភៅគ្រួសារ សៀវភៅស្នាក់នៅ។ល។

ជាមួយគ្នានោះឯកឧត្ដម អភិបាលខេត្ត លើកទឹកចិត្តដល់មន្រ្តីទាំងអស់ ត្រូវខិតខំយកចិត្តទុក ដាក់សិក្សាស្រាវជ្រាវបន្ថែម លើជំនាញឯកទេសពាក់ព័ន្ធសំខាន់ៗដូចជា កុំព្យូទ័រ និងភាសាបរទេស ជាពិសេស ភាសាអង់គ្លេស ពីព្រោះចំណេះដឹងទាំងនេះវាមានទំនាក់ទំនងជាមួយកិច្ចការការិយាល័យ ការងាររដ្ឋបាល និងបណ្ណសារ៕