បរទេស៖ យោធាអ៊ីស្រាអែលបានបើកការវាយប្រហារតាមអាកាសលើកំពង់ផែចំនួនបីក្នុងខេត្ត Hodeidah ភាគខាងលិចប្រទេសយេម៉ែនកាលពីល្ងាចថ្ងៃអាទិត្យ ភ្លាមៗបន្ទាប់ពីបានចេញការព្រមានជម្លៀសចេញ នេះបើតាមទូរទស្សន៍ Houthi-run al-Masirah បានរាយការណ៍។
ការវាយប្រហារបានផ្តោតលើកំពង់ផែ Hodeidah, Ras Issa និង As-Salif ដែលស្ថិតនៅតាមបណ្តោយសមុទ្រក្រហម។ មិនមានអ្នករងរបួសត្រូវបានគេរាយការណ៍ទេ។
អ្នកស្រុកបានប្រាប់ស៊ីនហួថា កម្មករ Houthi បាននិងកំពុងរៀបចំកំពង់ផែ ដើម្បីទទួលបានការដឹកជញ្ជូនប្រេងឥន្ធនៈ នៅមុនពេលការវាយប្រហារ។
ប្រហែល ៤០នាទីមុនពេលការវាយប្រហារ អ៊ីស្រាអែលតាមសេចក្តីរាយការណ៍បានព្រមានជនស៊ីវិលឱ្យចាកចេញពីតំបន់នោះ។ នៅព្រឹកថ្ងៃដដែល ប្រតិបត្តិការពាណិជ្ជកម្មតាមដែនសមុទ្ររបស់អង់គ្លេស (UKMTO) ក៏បានណែនាំផងដែរ ឱ្យនាវានានា កាច់ចង្កូតចេញពីដែនទឹក នៅជិតកំពង់ផែដែលកាន់កាប់ដោយក្រុម Houthi។
កាលពីថ្ងៃសុក្រ ក្រុមនេះបានអះអាងទទួលខុសត្រូវចំពោះការវាយប្រហារដោយមីស៊ីលលើអាកាសយានដ្ឋាន Ben Gurion របស់អ៊ីស្រាអែល ដែលមន្ត្រីអ៊ីស្រាអែលបាននិយាយថា ត្រូវបានស្ទាក់ចាប់។ ការវាយប្រហារនេះបានកើតឡើងជាការឆ្លើយតបទៅនឹងការវាយប្រហារតាមអាកាសរបស់អ៊ីស្រាអែលកាលពីថ្ងៃអង្គារដែលបានសម្លាប់មនុស្សរាប់សិបនាក់នៅក្នុងទីក្រុងសាណា និងបានបំផ្លាញអាកាសយានដ្ឋានរបស់រដ្ឋធានីរួមទាំងយន្តហោះពាណិជ្ជកម្មចំនួនបីផងដែរ។
ការវាយប្រហារកាលពីថ្ងៃអាទិត្យ គឺជាការវាយប្រហារចុងក្រោយបង្អស់របស់អ៊ីស្រាអែល ទៅលើកំពង់ផែដែលគ្រប់គ្រងដោយក្រុម Houthi ក្នុងប៉ុន្មានសប្តាហ៍ថ្មីៗនេះ ចំពេលមានការខ្វះខាតប្រេងកាន់តែច្រើននៅក្នុងតំបន់ទាំងនោះ។
កាលពីសប្តាហ៍មុន ប្រទេសអូម៉ង់បានប្រកាសថា ខ្លួនបានចុះកិច្ចព្រមព្រៀងបទឈប់បាញ់គ្នារវាងក្រុម Houthi និងសហរដ្ឋអាមេរិក ដែលក្រោមនោះ Houthi បានយល់ព្រមផ្អាកការវាយប្រហារលើនាវាអាមេរិកនៅសមុទ្រក្រហម ជាថ្នូរនឹងការបញ្ឈប់ការវាយប្រហារតាមអាកាសរបស់អាមេរិកលើទីតាំង Houthi។
