ភ្នំពេញ៖ ក្រុមការងារក្រសួងបរិស្ថាន ដឹកនាំដោយ លោក កែ វង្សវឌ្ឍនា អគ្គនាយករង នៃអគ្គនាយកដ្ឋានគាំពារបរិស្ថាន ក្រសួងបរិស្ថាន ដោយមានការចូលរួមពី តំណាងរដ្ឋបាលក្រុងសំពៅពូន អធិការដ្ឋាននគរបាលក្រុងសំពៅពូន អាជ្ញាធរសង្កាត់សំពៅពូន នៅថ្ងៃទី២១ ខែមេសា ឆ្នាំ ២០២៥ បានចុះត្រួតពិនិត្យ លើអគារពាណិជ្ជកម្មរបស់ក្រុមហ៊ុនព្រីន៤ រកឃើញមានការបញ្ចេញសំណល់រាវ ប៉ះពាល់ប្រភពទឹកសាធារណៈ (ព្រែកជីក៧២) ស្ថិតនៅភូមិកប៉ាល់គឿង សង្កាត់សំពៅពូន ក្រុងសំពៅពូន ខេត្តកណ្ដាល។
ក្រុមហ៊ុនព្រីន៤នេះ បានបើកដំណើរការនៅដើមឆ្នាំ២០២៥ និងបានសាសង់អគារពាណិជ្ជកម្មចំនួន៦អគារ ដោយប្រើប្រាស់ទឹក ៧៥២ម៉ែត្រគូប/ថ្ងៃ ដែលទទួលបានពីប្រភពទឹកស្អាត ហើយរហូតដល់ពេលនេះ ក្រុមហ៊ុន មិនមានអាងប្រព្រឹត្តិកម្ម សម្រាប់សម្អាតសំណល់រាវ និងទឹកកខ្វក់ទេ។ ក្រុមការងារ បានរកឃើញថា ករណីបំពុលទឹកព្រែក៧២ គឺបង្កឡើងដោយក្រុមហ៊ុនព្រីន៤ ដែលបានបូមបង្ហូរទឹកកខ្វក់ ចូលព្រែក៧២ដោយផ្ទាល់។
ក្នុងពេលចុះត្រួតពិនិត្យ ក្រុមការងារបានរកឃើញថា ក្រុមហ៊ុនមិនទាន់ មានរបាយការណ៍វាយតម្លៃហេតុប៉ះពាល់បរិស្ថាន និងលិខិតអនុញ្ញាតបញ្ចេញសំណល់រឹង រាវ នោះទេ។ ក្រុមការងារបានពិនិត្យស្ថានភាពទឹកព្រែក៧២ ចាប់ពីខ្សែទឹកខាងលើ រហូតដល់ខ្សែទឹកខាងក្រោម និងបានយកសំណាកទឹកចំនួន ៥ទីតាំង។
សូមបញ្ជាក់ថា ទឹកព្រែក៧២ មានប្រភពពីទន្លេបាសាក់តាមរយៈប្រឡាយ០៣ នៅរដូវប្រាំង។ ចំណែកនៅរដូវវស្សាទឹកទន្លេបាសាក់ហូរដោយផ្ទាល់ចូលព្រែក៧២។
ក្រុមការងារបានអនុវត្តច្បាប់ចំពោះក្រុមហ៊ុន អនុលោមតាមក្រមបរិស្ថាននិងធនធានធម្មជាតិ អនុក្រឹត្យលេខ២៧ អនក្រ.បក ស្ដីពីការត្រួតពិនិត្យការបំពុលទឹក និងសារាចរលេខ ០៣ សរ ចុះថ្ងៃទី១២ ខែមីនា ឆ្នាំ២០២៥ ស្ដីពីវិធានការទប់ស្កាត់និងកាត់បន្ថយការបំពុលតំបន់ទឹកសាធារណៈ របស់រាជរដ្ឋាភិបាល ដើម្បីការពារប្រភពទឹកសាធារណៈ និងទប់ស្កាត់ការបំពុលសុខភាពសាធារណៈនិងបរិស្ថាន ក្នុងនោះ៖
• ក្រុមហ៊ុនត្រូវបញ្ឈប់ការបង្ហូរសំណល់រាវ ចេញពីទីតាំងក្រុមហ៊ុន ចូលទៅព្រែក៧២ ជាបណ្តោះអាសន្ន រហូតទទួលបានការអនុញ្ញាត ពីក្រសួងបរិស្ថាន អនុលោមតាមមាត្រា២៩០ នៃក្រមបរិស្ថាន និងធនធានធម្មជាតិ។
• អនុលោមតាមក្រមបរិស្ថាននិងធនធានធម្មជាតិ មាត្រា៨២៩ មាត្រា១៥៦ មាត្រា១៦០ មាត្រា២៨៧ និងអនុក្រឹត្យលេខ២៧ ស្តីពីការត្រួតពិនិត្យការបំពុលទឹក ក្រុមហ៊ុន ត្រូវរងការពិន័យអន្តរការណ៍ តាមបទល្មើសជាក់ស្តែង។
• ត្រូវសាងសង់អាងប្រព្រឹត្តិកម្មសម្អាតសំណល់រាវ និងទឹកកខ្វក់ អនុលោមតាមស្ដង់ដារកំណត់ និងត្រូវបំពាក់ឧបករណ៍ស្វ័យត្រួតពិនិត្យការបញ្ចេញសំណល់រាវ យោងតាមក្រមបរិស្ថាននិងធនធានធម្មជាតិមាត្រា២៨៧។
• ក្រុមហ៊ុនត្រូវសហការជាមួយក្រុមហ៊ុនផ្ដល់សេវាដែលទទួលស្គាល់ពីក្រសួងបរិស្ថាន និងអាជ្ញាធរមានសមត្ថកិច្ចក្នុងការបូមសម្អាតសំណល់រាវ និងទឹកកខ្វក់ចេញពីទីតាំងក្រុមហ៊ុន ក្នុងដំណាក់កាលសាងសង់អាងប្រព្រឹត្តិកម្ម។
• ត្រូវរៀបចំរបាយការណ៍វាយតម្លៃហេតុប៉ះពាល់បរិស្ថាន និងស្នើសុំលិខិតអនុញ្ញាតបញ្ចេញសំណល់ យោងតាមក្រមបរិស្ថាននិងធនធានធម្មជាតិមាត្រា៦៥០។
• ករណីក្រុមហ៊ុនមិនអនុវត្តតាម ឬបំពានបន្តទៀត ក្រសួងបរិស្ថាន នឹងចាត់វិធានការច្បាប់ និងបិទទ្វារក្រុមហ៊ុនផងដែរ ៕
