យ៉ាងហោចណាស់មនុស្ស១៨នាក់បានបាត់បង់ជីវិត ដោយសារភ្លើងឆេះព្រៃនៅទូទាំងតំបន់ភាគអាគ្នេយ៍ប្រទេសកូរ៉េខាងត្បូង
សេអ៊ូល៖ យ៉ាងហោចណាស់មនុស្ស១៨នាក់បានបាត់បង់ជីវិត ដោយសារភ្លើងឆេះព្រៃដែលកំពុងឆាបឆេះយ៉ាងសន្ធោសន្ធៅនៅទូទាំងតំបន់ភាគអាគ្នេយ៍នៃប្រទេសកូរ៉េខាងត្បូង។
ភ្លើងឆេះព្រៃដ៏សាហាវបានរាលដាលពាសពេញតំបន់ភាគអាគ្នេយ៍របស់ប្រទេស កាលពីថ្ងៃអង្គារទី២៥មីនា ដោយបានបង្ខំឱ្យអ្នកស្រុករាប់ពាន់នាក់ភៀសខ្លួនចេញពីផ្ទះសម្បែង។ អាជ្ញាធរបានផ្ទេរអ្នកទោសរាប់រយនាក់ចេញពីពន្ធនាគារ។ គិតត្រឹមម៉ោង៥ ព្រឹកថ្ងៃពុធនេះ មនុស្ស១២នាក់បានស្លាប់នៅក្នុងភ្លើងឆេះព្រៃដែលចាប់ផ្តើមពីក្រុង អ៊ូអ៊ិសឹង ខណៈអ្នកស្លាប់៤នាក់ផ្សេងទៀតត្រូវបានសម្លាប់ដោយអណ្តាតភ្លើងមួយផ្សេងទៀតនៅភូមិសានចឹង។ នេះបើយោងតាមក្រសួងសុវត្ថិភាព។
លោក លី យ៉ុងឌូ អ្នកជំនាញខាងគ្រោះមហន្តរាយព្រៃឈើនៅវិទ្យាស្ថានជាតិវិទ្យាសាស្រ្តព្រៃឈើបាននិយាយថា អណ្តាតភ្លើងនៅទីក្រុងអ៊ូអ៊ិសឹង ត្រូវបានពន្លត់៦៨ភាគរយប៉ុណ្ណោះ តែវារីករាលដាលកាន់តែធ្ងន់ធ្ងរដោយខ្យល់បក់ខ្លាំង ដែលធ្វើឱ្យអណ្តាតភ្លើងនេះមានទំហំ និងល្បឿនដែលមិននឹកស្មានដល់។
ប្រធានាធិបតីស្តីទី លោក ហាន ដុកស៊ូ បានប្តេជ្ញាដាក់ពង្រាយឧទ្ធម្ភាគចក្រ និងបុគ្គលិកពន្លត់អគ្គិភ័យ ដើម្បីទប់ទល់នឹងភ្លើងឆេះ ដែលបណ្តាលមកពីខ្យល់បក់ខ្លាំង និងអាកាសធាតុស្ងួត។ អណ្តាតភ្លើងបានឆាបឆេះកាលពីចុងសប្តាហ៍មុន ក្នុងទីក្រុងអ៊ូអ៊ិសឹង មិនទាន់ត្រូវបានទប់ស្កាត់នៅឡើយ ដោយបានបំផ្លាញប្រាសាទបុរាណ និងបំផ្លាញផ្ទះសម្បែងជាច្រើនខ្នង។ រដ្ឋាភិបាលបានកំណត់តំបន់រងគ្រោះជាតំបន់គ្រោះមហន្តរាយពិសេស ខណៈភ្លើងបានបំផ្លាញផ្ទៃដីជាង១៥០០០ហិកតា៕
