ប្រមុខ NATO ថាការបង្កើនកញ្ចប់ថវិកា និងផលិតអាវុធ ជាតម្រូវការសម្រាប់ធានាសន្តិសុខអឺរ៉ុប
បែរឡាំង៖ អគ្គលេខាធិការនៃអង្គការណាតូ (NATO) លោក Mark Rutte បានប្រាប់បទសម្ភាសន៍មួយថា ថវិកាការពារជាតិច្រេីនជាងមុន និងការបង្កើនការផលិតសម្ភារយោធា គឺជាតម្រូវការចាំបាច់ដើម្បីធានាសន្តិសុខអឺរ៉ុប។ នេះបេីយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃសៅរ៍ ទី៨ ខែមីនា ឆ្នាំ២០២៥។
លោក Rutte បានប្រាប់កាសែតអាល្លឺម៉ង់ Welt am Sonntag ដូច្នេះថា «យើងនឹងត្រូវការចំណាយថែមទៀតដើម្បីការពារយើងឱ្យមានសុវត្ថិភាព។ ប៉ុន្តែយើងក៏ត្រូវបង្កើនផលិតកម្មអាវុធឱ្យបានលឿននៅក្នុងចំណោមសមាជិកណាតូផងដែរ»។
សមាជិកអង្គការណាតូ មានប្រទេសអឺរ៉ុបភាគច្រើន និងសហរដ្ឋអាមេរិក រួមទាំងកាណាដាផងដែរ។ តាមលោក Rutte គ្រាប់រំសេវ នាវា រថក្រោះ យន្តហោះចម្បាំង ផ្កាយរណប និងដ្រូន សុទ្ធតែជាសម្ភារយោធាដែលមានតម្រូវការ។
គួរបញ្ជាក់ថា បណ្តាប្រទេសនៅអឺរ៉ុបកំពុងប្រញាប់ប្រញាល់បង្កើនការចំណាយលើវិស័យការពារជាតិ និងរក្សាការគាំទ្រសម្រាប់អ៊ុយក្រែន បន្ទាប់ពីប្រធានាធិបតីអាមេរិក លោក ដូណាល់ ត្រាំ ផ្អាកការផ្តល់ជំនួយយោធា និងចំពេលដែលមានការសង្ស័យអំពីការប្តេជ្ញាចិត្តរបស់ទីក្រុងវ៉ាស៉ីនតោនចំពោះសម្ព័ន្ធមិត្តអឺរ៉ុប។
