ឯកឧត្ដម ហួត ហាក់៖ អង្គសន្និបាតក្រសួងទេសចរណ៍បានស្នើឱ្យរដ្ឋាភិបាលជំរុញការផ្សព្វផ្សាយទេសចរណ៍កម្ពុជា តាមរយៈការទាក់ទាញក្រុមហ៊ុនផលិតភាពយន្តល្បីៗ មកថតនៅកម្ពុជា

ភ្នំពេញ៖ ឯកឧត្ដម ហួត ហាក់ រដ្ឋមន្ត្រីក្រសួងទេសចរណ៍ បានលើកឡើងថា អង្គសន្និបាតនៃក្រសួងទេសចរណ៍រយៈពេល១ថ្ងៃកន្លះមកនេះ បានស្នើឱ្យរដ្ឋាភិបាលជំរុញការផ្សព្វផ្សាយទេសចរណ៍កម្ពុជា តាមរយៈការទាក់ទាញក្រុមហ៊ុនផលិតភាពយន្តល្បីៗ មកថតនៅកម្ពុជា និងបង្កើនកិត្តិនាមកម្ពុជា នៅលើឆាកអន្តរជាតិ និងឈានទៅដល់ការលុបបំបាត់ព័ត៌មានក្លែងក្លាយ។

ឯកឧត្ដមបានលើកឡើងបែបនេះក្នុងពិធីបិទសន្និបាតបូកសរុបលទ្ធផលការងារឆ្នាំ២០២៤ និងលើកទិសដៅការងារឆ្នាំ២០២៥ របស់ក្រសួងទេសចរណ៍ នៅថ្ងៃទី២៧ ខែកុម្ភៈ ឆ្នាំ២០២៥ ក្រោមអធិបតីភាពរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា។

ឯកឧត្ដម ហួត ហាក់បានថ្លែងថា តាមរយៈកិច្ចពិភាក្សារបស់អង្គសន្និបាតនៃក្រសួងទេសចរណ៍ រយៈពេល១ថ្ងៃកន្លះនេះ បានស្នើសុំឱ្យពិចារណា ជំរុញការផ្សព្វផ្សាយទេសចរណ៍ និងបង្កើនកិត្តិនាមកម្ពុជា តាមរយៈការទាក់ទាញក្រុមហ៊ុនផលិតភាពយន្តល្បីៗមកថតនៅកម្ពុជា ដូចជា ក្រុមហ៊ុន Hollywood, Bollywood, China Film Group និងក្រុមហ៊ុនមកពីប្រទេសគោលដៅសំខាន់ៗ ដោយអាចផ្តល់ជាគោលនយោបាយលើកទឹកចិត្ត និងការសម្រួលនីតិវិធីក្នុងការស្នើសុំការអនុញ្ញាតថតជាដើម។

ឯកឧត្ដមបានឱ្យដឹងថា ថ្មីៗនេះ ក្រសួងទេសចរណ៍បានសហការជាមួយក្រសួងវប្បធម៌ និងវិចិត្រសិល្បៈ អាជ្ញាធរអប្សរា ក្រសួងស្ថាប័នពាក់ព័ន្ធ និងរដ្ឋបាលរាជធានី ខេត្ត សម្របសម្រួលការថតភាពយន្ត របស់ក្រុមហ៊ុនផលិតភាពយន្ត ប្រទេសចិន ប្រទេសកាហ្សាក់ស្ថាន ហើយបាននឹងកំពុងទាក់ទាញក្រុមហ៊ុនផលិតភាពយន្ត សិល្បករ និងតន្ត្រីករល្បីៗ ពីប្រទេសចិន, សាធារណរដ្ឋកូរ៉េ (K-pop), សហរដ្ឋអាមេរិក, អ៊ីតាលី (ដូចជាលោក Andrea Bocelli តន្ត្រីករអ៊ីតាលីដ៏ល្បីល្បាញ), ឥណ្ឌ ជប៉ុន និងតួគីបន្ថែមទៀត។

ឯកឧត្ដមបន្ថែមថា អ្វីដែលជាតម្លៃបន្ថែមទៀតសម្រាប់កម្ពុជា ដោយសារកត្តាសុខសុវត្ថិភាព ភាពប្រកួតប្រជែង និងមានសម្បទាទេសចរណ៍គ្រប់គ្រាន់ កន្លងទៅថ្មីៗនេះ ប្រទេសកម្ពុជាមានលទ្ធភាពក្នុង ការទទួលការថតពាណិជ្ជកម្ម និងការតាំងពិព័រណ៍ម៉ាកផលិតផលល្បីៗលំដាប់ពិភពលោក ដូចជា៖ Stefano Ricci (ម៉ាកសម្លៀកបំពាក់ប្រណិតរបស់អ៊ីតាលី), BVLGARI (ម៉ាកយីហោគ្រឿង អលង្ការប្រណិតលំដាប់ពិភពលោក) ជាដើម៕