សម្ដេចបវរធិបតី ហ៊ុន ម៉ាណែត៖ ការពង្រឹងវិស័យអប់រំនេះ គឺត្រូវបន្តខិតខំធ្វើជាប្រចាំ ពិសេសគ្រូបង្រៀនត្រូវផលិតកូនសិស្ស ដែលមានគុណភាព

ភ្នំពេញ៖ សម្តេចមហាបវរធិបតី ហ៊ុន ម៉ាណែត​​ នាយករដ្ឋមន្ត្រី នៃព្រះរាជាណាចក្រកម្ពុជា បានលើកឡើងថា ការពង្រឹងវិស័យអប់រំនេះ គឺត្រូវបន្តខិតខំធ្វើជាប្រចាំជាពិសេសគ្រូបង្រៀន ត្រូវផលិតកូនសិស្សដែលមានគុណភាព ។

ក្នុងឱកាសអញ្ជើញជាអធិបតី​ “បិទសន្និបាតបូកសរុបលទ្ធផលការងារអប់រំ យុវជន និងកីឡា ឆ្នាំសិក្សា ២០២៣-២០២៤ និងទិសដៅឆ្នាំ ២០២៤-២០២៥” នាថ្ងៃទី២៦ ខែកុម្ភៈនេះ សម្ដេចធិបតី បានថ្លែងកោតសរសើរ និងវាយតម្លៃខ្ពស់ចំពោះសមិទ្ធផលដែលសម្រេចបានលើការកែទម្រង់វិស័យអប់រំ ជាពិសេសការកែទម្រង់ការប្រឡងបាក់ឌុបនៅក្នុងប្រវិស័យអប់រំរបស់កម្ពុជា ធ្វើឱ្យការរៀន និងការបង្រៀននៅតាមសាលារៀនមានគុណភាព និងប្រសិទ្ធភាពខ្ពស់មកដល់បច្ចុប្បន្ន។

សម្ដេចធិបតី មានប្រសានស៍ថា នៅក្នុងយុទ្ធសាស្រ្ដបញ្ចកោណ-ដំណាក់កាលទី១ ក្នុងបញ្ចកោណ យុទ្ធសាស្រ្ដទី១ របស់រាជរដ្ឋាភិបាលបានផ្ដោតលើការអភិវឌ្ឍមូលធនមនុស្សរបស់កម្ពុជា ជាកិច្ចការងារអាទិភាព ក្នុងការចូលរួមអភិវឌ្ឍសង្គម ជាតិកម្ពុជា។

សម្ដេចធិបតី ក៏បានគាំទ្រដល់កម្មវិធីកំណែទម្រង់ ផ្ដោតលើអភិបាលកិច្ចអប់រំ និងការធ្វើកំណែទម្រង់តាមសាលារៀន ដែលជាការកែទម្រង់ច្បាស់លាស់ ប្រកបដោយភាពជាក់ស្ដែងនិយម ដើម្បីកសាងមូលធនមនុស្សកម្ពុជាដែលមានសក្ដានុពលពេញលេញ។

សម្ដេចធិបតី គូសបញ្ជាក់ថា ការពង្រឹងគុណភាពអប់រំគ្រប់កម្រិតរាជរដ្ឋាភិបាលបានធ្វើមកច្រើនតាំងពីអាណត្តិមុនៗមកហើយ និងបានធ្វើជាប្រចាំ។ ប៉ុន្ដែការពង្រឹងវិស័យអប់រំនេះគឺត្រូវបន្តខិតខំធ្វើជាប្រចាំជាពិសេសគ្រូបង្រៀនត្រូវផលិតកូនសិស្សដែលមានគុណភាព ៕