កាកបាទក្រហមកម្ពុជា បើកវគ្គបណ្តុះបណ្តាលគ្រូបង្គោល ស្តីពី “ផែនទីបង្ហាញផ្លូវទៅកាន់ភាពធន់តាមរយៈការលើកកម្ពស់ ការប៉ាន់ប្រមាណភាពងាយរងគ្រោះ និងសមត្ថភាព” ជូនដល់មន្ត្រីកាកបាទក្រហមកម្ពុជា
ភ្នំពេញ៖ នៅព្រឹកថ្ងៃទី២៤ ខែកុម្ភៈ ឆ្នាំ២០២៤ លោកជំទាវ ម៉ែន នារីសោភ័គ អគ្គលេខាធិការរងទី១ កាកបាទក្រហមកម្ពុជា អញ្ជើញជាអធិបតីក្នុងពិធីបើកវគ្គបណ្តុះបណ្តាលគ្រូបង្គោលស្តីពី “ផែនទីបង្ហាញផ្លូវទៅកាន់ភាពធន់តាមរយៈការលើកកម្ពស់ ការប៉ាន់ប្រមាណភាពងាយរងគ្រោះ និងសមត្ថភាព” ។
ពិធីនេះមានវត្តមានអញ្ជើញចូលរួមពី ឯកឧត្តម ហៀម ឃួន អនុប្រធានអចិន្ត្រៃយ៍ សាខាកាកបាទក្រហមកម្ពុជាខេត្តពោធិ៍សាត់ លោក Arnaud Raulin អ្នកសម្របសម្រួលការងារកាត់បន្ថយហានិភ័យគ្រោះមហន្ត រាយថ្នាក់តំបន់ នៃសហព័ន្ធអន្តរជាតិ តំបន់អាស៊ីប៉ាស៊ីហ្វិក (IRFC/APRO) កញ្ញា Apinya Khumchart (Nan) តំណាងសហព័ន្ឋអន្តរជាតិប្រចាំទីក្រុងបាងកក លោកនាយក នាយិការងសាខា លោក លោកស្រី មន្ត្រីទីស្នាក់ការកណ្តាល និងសាខាសរុប ៣៨នាក់ ដែលប្រព្រឹត្តទៅពីថ្ងៃទី២៤ ដល់ថ្ងៃទី២៧ ខែកុម្ភៈ ឆ្នាំ២០២៥ នៅទីស្នាក់ការសាខាកាកបាទក្រហមកម្ពុជាខេត្តពោធិ៍សាត់។
មានប្រសាសន៍បើកវគ្គបណ្តុះបណ្តាល លោកជំទាវអគ្គលេខាធិការរងទី១ បានពាំនាំប្រសាសន៍របស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធានផ្តាំផ្ញើសួរសុខទុក្ខបងប្អូនទាំងអស់ដែលជាប្រតិបត្តិករជួរមុខដោយក្តីនឹករលឹក ស្រឡាញ់យ៉ាងជ្រាលជ្រៅ ដែលបានខិតខំប្រឹងប្រែងអនុវត្តយុទ្ធសាស្ត្រ ២០២១-២០៣០ របស់កាកបាទក្រហមកម្ពុជាតាមបាវចនា សកម្មភាពនៅមូលដ្ឋាន សម្រេចគោលដៅសកល”។
ជាមួយគ្នានេះលោកជំទាវបានបន្តឱ្យដឹងថា«វគ្គបណ្តុះបណ្តាលនេះមានគោលបំណងសំខាន់ដើម្បីពង្រឹងចំណេះដឹង និងសមត្ថភាពរបស់មន្ត្រីកាកបាទក្រហមកម្ពុជា នៅក្នុងការងារប៉ាន់ប្រមាណភាពងាយរងគ្រោះ និងសមត្ថភាព (តាមបែបចូលរួម) និងប្រព័ន្ធប្រកាសឱ្យដឹងមុនរបស់សហគមន៍ ព្រមទាំងអាចយកចំណេះដឹងទាំងនេះ ទៅបណ្តុះបណ្តាលបន្តជូនមន្ត្រីសាខា អនុសាខា និងអ្នកស្ម័គ្រចិត្ត ហើយថែមទាំងអាចធ្វើការប៉ាន់ប្រមាណ ការកសាងផែនការភាពធន់ និងដែលអាចអនុវត្តបាន។»
ទន្ទឹមនឹងនេះលោកជំទាវបានបញ្ជាក់ថា «ដោយសារការផ្លាស់ប្តូរបរិបទនៃបរិយាកាសខាងក្រៅ (ព្រឹត្តិការណ៍អាកាសធាតុធ្ងន់ធ្ងរ និងការប្រែប្រួលរយៈពេលវែង ការរីកចម្រើនផ្នែកនគរូបនីយកម្មយ៉ាងឆាប់រហ័ស ការសឹករិចរិលបរិស្ថាន/ធម្មជាតិ។ល។) ដែលចាំបាច់ខ្លាំងសម្រាប់ពង្រឹងភាពធន់ ការយល់កាន់តែច្បាស់អំពីហានិភ័យដែលសហគមន៍កំពុងប្រឈម ក៏ដូចជាវិមាត្រសំខាន់ៗ ដែលអាចធ្វើ ឱ្យសហគមន៍មានភាពធន់ ដែលចាំបាច់ត្រូវមានអ្នកដែលចេះសម្របសម្រួលក្នុងការប៉ាន់ ប្រមាណ និងមានជំនាញធ្វើការប៉ាន់ប្រមាណ។»
ជាទីបញ្ចប់ក្នុងនាមកាកបាទក្រហមកម្ពុជា សូមថ្លែងអំណរគុណយ៉ាងជ្រាលជ្រៅចំពោះគណៈកម្មាធិការសាខាកាកបាទក្រហមកម្ពុជាខេត្តពោធិ៍សាត់ ដែលបានចូលរួមសហការ និងផ្តល់សាលប្រជុំរបស់សាខាសម្រាប់ដំណើរការវគ្គបណ្តុះបណ្តាលរយៈពេល ៤ថ្ងៃនេះ និងថ្លែងអំណរគុណដល់សហព័ន្ធអន្តរជាតិ ដែលបានជួយឧបត្ថម្ភថវិកា និងអ្នកសម្របសម្រួលវគ្គមកពី IFRC Country cluster ទីក្រុងបាងកក និង IFRC/APRO ដែលឆ្លៀតពេលដ៏មានតម្លៃនាពេលនេះ។
នៅព្រឹកថ្ងៃដដែលបន្ទាប់ពីបើកវគ្គបណ្តុះបណ្តាល លោកជំទាវ ម៉ែននារីសោភ័គ អគ្គលេខាធិការរងទី១ រួមជាមួយលោកជំទាវ អាំង សុជាតា ខូយរីដា អនុប្រធានកិត្តិយសសាខាកាកបាទក្រហមកម្ពុជាខេត្តពោធិ៍សាត់ និងក្រុមការងារបានអញ្ជើញចុះចែកអំណោយមនុស្សធម៌ជូនប្រជាពលរដ្ឋងាយរងគ្រោះបំផុតចំនួន ២៥គ្រួសារ នៅសង្កាត់ផ្ទះព្រៃ ក្រុងពោធិ៍សាត់ ដោយក្នុងមួយគ្រួសារទទួលបាន អង្ករ ២៥គីឡូក្រាម, មី ១កេស, ត្រីខ ១យួរ (១០កំប៉ុង), ទឹកស៊ីអ៊ីវ ១យួរ, ឃីត (ក្រមា សារុង មុង ភួយ) ១កញ្ចប់, និងថវិកាមួយចំនួនផងដែរ។
ឆ្លៀតពេលបន្ទាប់ពីចុះជួបបងប្អូនប្រជាពលរដ្ឋដែលងាយរងគ្រោះបំផុតរួចមក លោកជំទាវអគ្គលេខាធិការរងទី១ និងក្រុមការងារ បន្តដំណើរចុះពិនិត្យមើលពីជីវភាពនិងការប្រកបរបរដាំដុះបន្លែរបស់បងប្អូនប្រជាពលរដ្ឋដែលបានចងក្រងជាសហគមន៍នៅតាមគេហដ្ឋានសម្រាប់ដាំបន្លែដែលមានលក្ខណៈបច្ចេកទេសត្រឹមត្រូវ ស្ថិតនៅសួនបន្លែសហគមន៍ភូមិជ្រែង ឃុំស្វាយលួង ស្រុកកណ្តៀង ខេត្តពោធិ៍សាត់ផងដែរ។
ជាក់ស្តែងក្រោយពីបានចុះពិនិត្យផ្ទាល់ពីស្ថានភាពរស់នៅរបស់សហគមន៍ខាងលើ លោកជំទាវអគ្គលេខាធិការរងទី១ បានឱ្យដឹងថា ការបើកវគ្គបណ្តុះបណ្តាលគ្រូបង្គោល ស្តីពី “ផែនទីបង្ហាញផ្លូវទៅកាន់ភាពធន់តាមរយៈការលើកកម្ពស់ ការប៉ាន់ប្រមាណភាពងាយរងគ្រោះ និងសមត្ថភាព” ពិតជាមានសារៈសំខាន់ខ្លាំង អាចឱ្យយើងបានដឹងថាប្រជាពលរដ្ឋទាំងអស់មិនមែនជួបការលំបាកទាំងអស់គ្នានោះទេ ប្រសិនបើគាត់អាចចងក្រងជាសហគមន៍និងទទួលបានការបណ្តុះបណ្តាលជំនាញបច្ចេកទេសត្រឹមត្រូវ សង្កេតឃើញថាគ្រួសាររបស់ពួកគាត់មានជីវភាពល្អប្រសើរ។ ទន្ទឹមនឹងនេះបញ្ហាប្រឈមដែលបងប្អូនជួបប្រទះគឺបញ្ហាទឹក ជាមួយគ្នានេះរាជរដ្ឋាភិបាលបានយកចិត្តទុកដាក់ខ្ពស់ដោះស្រាយបញ្ហាទឹកដើម្បីជួយសង្គ្រោះផលដំណាំរបស់បងប្អូនប្រជាពលរដ្ឋជាបន្តបន្ទាប់ និងបានផ្តួចផ្តើមកសាងសហគមន៍កសិកម្មទំនើប និងបានចាត់មន្ត្រីកសិកម្មឃុំចុះជួយប្រជាពលរដ្ឋទៅដល់សហគមន៍ផងដែរ៕
