មហាសេដ្ឋីអូស្ត្រាលី បើកដំណើរការគណបក្សនយោបាយថ្មី ដែលលោកអះអាងថា ត្រូវបានបំផុសគំនិតផ្ទាល់ដោយលោក ដូណាល់ ត្រាំ
កង់បេរ៉ា៖ មហាសេដ្ឋីអូស្ត្រាលី លោក ឃ្លីវ ផាលមឺរ បានបើកដំណើរការគណបក្សនយោបាយថ្មី ដែលលោកអះអាងថា ត្រូវបានបំផុសគំនិតផ្ទាល់ដោយប្រធានាធិបតីសហរដ្ឋអាម៉េរិក លោក ដូណាល់ ត្រាំ។
មហាសេដ្ឋីរ៉ែ លោក ផាលមឺរ បាននិយាយថា គណបក្ស Trumpet of Patriots របស់លោកនឹងដើរតាមគោលនយោបាយរបស់ ត្រាំ ក្នុងការកាត់បន្ថយទំហំរដ្ឋាភិបាល។ លោក ផាលមឺរ បានប្រាប់សន្និសីទសារព័ត៌មានថា៖«យើងគិតថា ផែនការរបស់លោក ដូណាល់ ត្រាំ មានប្រសិទ្ធភាពខ្លាំង ក្នុងការកាត់បន្ថយការចំណាយសាធារណៈ»។ លោកក៏បានបន្ទរទស្សនៈរបស់ ត្រាំ ដោយរិះគន់អន្តោប្រវេសន៍ទ្រង់ទ្រាយធំ និងបានប្រកាសថា គណបក្សនឹងទទួលស្គាល់តែពីរភេទប៉ុណ្ណោះ។
មហាសេដ្ឋីរ៉ែ រូបនេះបានឱ្យដឹងទៀតថា គណបក្សរបស់លោកគ្រោងនឹងឈរឈ្មោះជាបេក្ខជននៅគ្រប់អាសនៈទាំង១៥០ នៅក្នុងសភាជាន់ទាបរបស់ប្រទេសអូស្ត្រាលី ក៏ដូចជាសភាជាន់ខ្ពស់ ដែលត្រូវបានគេស្គាល់ថា ជាព្រឹទ្ធសភា។ លោក ផាលមឺរ ជាមហាសេដ្ឋីទី១៨ របស់ប្រទេសអូស្ត្រាលី និងមានទ្រព្យសម្បត្តិសុទ្ធចំនួន២,១ពាន់លានដុល្លារ ពីមុនបានដឹកនាំគណបក្សស្តាំនិយម United Australia Party (UAP) និងបានធ្វើជាសមាជិកសភាក្នុងសភាជាន់ទាបអស់រយៈពេល៣ឆ្នាំចាប់ពីឆ្នាំ២០១៣។
លោក ផាលមឺរ បានចំណាយទឹកប្រាក់ប្រហែល៦៣,៥២លានដុល្លារលើយុទ្ធនាការសម្រាប់គណបក្ស UAP នៅក្នុងការបោះឆ្នោតសហព័ន្ធចុងក្រោយ តែទទួលបានសមាជិកព្រឹទ្ធសភាតែមួយនៅក្នុងសភាជាន់ខ្ពស់។ លោកបានបរាជ័យក្នុងការចុះឈ្មោះគណបក្ស UAP សម្រាប់ការបោះឆ្នោតនៅឆ្នាំនេះ ដែលត្រូវធ្វើឡើងនៅខែឧសភា។
នាយករដ្ឋមន្រ្តីអូស្ត្រាលី លោក អេនថូនី អាលបានីស មិនទាន់ប្រកាសកាលបរិច្ឆេទនៃការបោះឆ្នោតនៅឡើយទេ បន្ទាប់ពីធនាគារកណ្តាលរបស់ប្រទេសនេះ កាត់បន្ថយអត្រាការប្រាក់ ជាការជំរុញសម្រាប់រដ្ឋាភិបាលដែលបានមើលឃើញថា ប្រជាប្រិយភាពរបស់ខ្លួនធ្លាក់ចុះដោយសារតែសម្ពាធនៃការរស់នៅ៕
