ឯកឧត្តម ម៉ុល វិបុល ចូលរួមវគ្គបណ្តុះបណ្តាលស្តីពី «Singapore Skills Transformation 4.0» នៅវិទ្យាស្ថានអប់រំបណ្ដុះបណ្ដាលបច្ចេកទេស (ITE) នៃប្រទេសសិង្ហបុរី

ភ្នំពេញ៖ ឯកឧត្តម ម៉ុល វិបុល អនុរដ្ឋលេខាធិការ ក្រសួងការងារ និងបណ្ដុះបណ្ដាលវិជ្ជាជីវៈ បានចូលរួមវគ្គបណ្តុះបណ្តាលស្តីពី «Singapore Skills Transformation 4.0» ដែលប្រព្រឹត្តទៅចាប់ពីថ្ងៃទី១០ ដល់ថ្ងៃទី១៥ ខែកុម្ភៈ ឆ្នាំ២០២៥ នៅវិទ្យាស្ថានអប់រំបណ្ដុះបណ្ដាលបច្ចេកទេស (ITE) នៃប្រទេសសិង្ហបុរី។

វិទ្យាស្ថាន ITE បានដើរតួនាទីយ៉ាងសំខាន់ក្នុងការអភិវឌ្ឍសមត្ថភាពធនធានមនុស្សនៅប្រទេសមួយចំនួន ក្នុងនោះនាពេលកន្លងមក កិច្ចសហប្រតិបត្តិការរវាងក្រសួងការងារ និងបណ្ដុះបណ្ដាលវិជ្ជាជីវៈ ជាមួយវិទ្យាស្ថាន ITE របស់សិង្ហបុរី បានសម្រេចនូវផ្លែផ្កាគួរឱ្យកត់សម្គាល់ ពិសេសលើការបណ្ដុះបណ្ដាលពង្រឹងសមត្ថភាពដល់មន្ត្រីរាជការ គ្រូបង្គោល TVET និងមន្ត្រីគ្រប់គ្រងនៅតាមគ្រឹះស្ថាន TVET នានារបស់កម្ពុជា។

ទន្ទឹមនេះ ភាគីសិង្ហបុរីបានកោតសរសើរនិងវាយតម្លៃខ្ពស់ចំពោះសមត្ថភាព ភាពរហ័សរហួនក្នុងការអនុវត្តការងារ និងចំណេះដឹងរបស់មន្ត្រីរាជការរបស់កម្ពុជាក្នុងវិស័យTVET។

គន្លឹះសំខាន់ៗដែលស្រង់ចេញពីបទពិសោធន៍នៃវិស័យTVET តាមរយៈទស្សនកិច្ចសិក្សានៅវិទ្យាស្ថានអប់រំបណ្ដុះបណ្ដាលបច្ចេកទេស ITE ទាំង៣សាខា នៃប្រទេសសិង្ហបុរី មានដូចជា៖

ទី១.កត្តាជោគជ័យរបស់TVET នៅប្រទេសសិង្ហបុរី ត្រូវបានជំរុញតាមរយៈកិច្ចសហប្រតិបត្តិការដ៏រឹងមាំរវាងរាជរដ្ឋាភិបាល និងឧស្សាហកម្ម។

ទី២. ការផ្លាស់ប្តូរពីឧស្សាហកម្ម 4.0 ទៅឧស្សាហកម្ម 5.0 តម្រូវឱ្យ TVET ផ្តោតលើទាំងស្វ័យប្រវត្តិកម្ម និងជំនាញដែលផ្តោតលើមនុស្ស។

ទី៣. បរិវត្តកម្មឌីជីថលគឺជាកត្តាចាំបាច់ ជាមួយនឹងការរីកចម្រើនយ៉ាងឆាប់រហ័សនៃAI, IoT និងបរិយាកាសសិក្សាប្រកបដោយភាពឆ្លាតវៃ ក្លាយជាចំណុចកណ្តាលនៃការបណ្តុះបណ្តាល។

ទី៤. SkillsFuture បម្រើជាគំរូសម្រាប់ការបង្កើនកម្លាំងពលកម្មជំនាញ ការរួមបញ្ចូលមូលនិធិរបស់រាជរដ្ឋាភិបាល ភាពជាដៃគូឧស្សាហកម្ម និងការលើកទឹកចិត្តជំរុញដល់ការរៀនសូត្រពេញមួយជីវិត។

ទី៥. ភាពជាដៃគូឧស្សាហកម្មពង្រឹងវិស័យ TVET តាមរយៈការសហការអភិវឌ្ឍកម្មវិធីសិក្សា, ការចុះកម្មសិក្សា និងកម្មវិធី work-study programs ៕