វ៉ាស៊ីនតោន៖ កម្មវិធីទិកតុក បានបង្ហាញវត្តមានសាជាថ្មីនៅលើ App Store និង Play Store នៅលើទឹកដីសហរដ្ឋអាម៉េរិក កាលពីថ្ងៃព្រហស្បតិ៍ទី១៣កុម្ភៈ ខណៈលោកប្រធានាធិបតី ដូណាល់ ត្រាំ បានពន្យារពេលការហាមឃាត់លើកម្មវិធីនេះរហូតដល់ថ្ងៃទី៥ ខែមេសា។
កម្មវិធីវីដេអូខ្លីដ៏ពេញនិយម ដែលត្រូវបានប្រើប្រាស់ដោយប្រជាជនអាម៉េរិកប្រមាណ១៧០លាននាក់ បានបិទដំណើរការមួយរយៈពេលខ្លីកាលពីខែមុន មុនពេលច្បាប់ហាមឃាត់ចូលជាធរមាននៅថ្ងៃទី១៩ ខែមករា ដែលតម្រូវឱ្យម្ចាស់កម្មវិធីក្រុមហ៊ុនចិន ពោលគឺក្រុមហ៊ុន Byte Dance លក់កម្មវិធីនេះ ដោយសារហេតុផលសន្តិសុខជាតិ ឬប្រឈមនឹងការហាមឃាត់។ នៅថ្ងៃបន្ទាប់ លោក ត្រាំ បានចុះហត្ថលេខាលើបទបញ្ជាប្រតិបត្តិពន្យារពេលការអនុវត្តការហាមឃាត់នេះរយៈពេល៧៥ថ្ងៃ ដោយអនុញ្ញាតឱ្យទិកតុកបន្តប្រតិបត្តិការរបស់ខ្លួននៅក្នុងសហរដ្ឋអាម៉េរិកជាបណ្តោះអាសន្ន។ ទោះបីជាទិកតុកបានបន្តសេវាកម្មបន្ទាប់ពីការធានារបស់ ត្រាំ ក៏ដោយក្រុមហ៊ុន Google និង Apple បន្តដកកម្មវិធីនេះចេញពីវេទិការបស់ពួកគេនៅក្នុងសហរដ្ឋអាម៉េរិក។ យ៉ាងណា ទិកតុក ជាកម្មវិធីដែលទាញយកច្រើនជាងគេទីពីរនៅសហរដ្ឋអាម៉េរិកកាលពីឆ្នាំមុន អាចត្រូវបានទាញយកមកប្រើប្រាស់បានវិញនៅលើទឹកដីសហរដ្ឋអាម៉េរិកនៅថ្ងៃទី១៣ ខែកុម្ភៈ។ ដូច្នេះ អ្នកប្រើប្រាស់អាចទាញយក និងធ្វើបច្ចុប្បន្នភាពកម្មវិធីនេះបានឡើងវិញ។
ទិកតុកមានការទាញយកច្រើនជាង៥២លានដងក្នុងឆ្នាំ២០២៤។ នេះបើយោងតាមក្រុមហ៊ុនស៊ើបការណ៍ទីផ្សារ Sensor Tower។ Sensor Tower បានឱ្យដឹងថា ប្រហែល៥២ភាគរយនៃការទាញយកសរុបរបស់ទិកតុកបានមកពី App Store ខណៈដែល៤៨ភាគរយទៀតបានមកពី Play Store នៅសហរដ្ឋអាម៉េរិកកាលពីឆ្នាំមុន។ គួរជម្រាបជូនថា ច្បាប់ដែលតម្រូវឱ្យក្រុមហ៊ុន ByteDance លក់ទិកតុកទៅឱ្យសហរដ្ឋអាម៉េរិក បើមិនចង់ប្រឈមមុខនឹងការហាមឃាត់ ត្រូវបានចុះហត្ថលេខាដោយអតីតប្រធានាធិបតី ចូ បៃឌិន ក្នុងខែមេសាឆ្នាំ២០២៤ ដែលបង្កឡើងដោយការព្រួយបារម្ភផ្នែកសន្តិសុខជាតិ និងការភ័យខ្លាចថាប្រទេសចិនអាចប្រើប្រាស់កម្មវិធីចែករំលែកវីដេអូនេះ ដើម្បីឈ្លបយកការណ៍លើអ្នកប្រើប្រាស់ជនជាតិអាម៉េរិក៕
