រដ្ឋអាជ្ញាកូរ៉េខាងត្បូង ចោទប្រកាន់ជាផ្លូវការ ទៅលើប្រធានាធិបតី Yoon Suk Yeol ពីបទដឹកនាំការបះបោរកំឡុង ពេលដាក់ច្បាប់អាជ្ញាសឹក

បរទេស៖ ប្រព័ន្ធផ្សព្វផ្សាយក្នុង ស្រុកបានរាយការណ៍ កាលពីថ្ងៃអាទិត្យថា រដ្ឋអាជ្ញាកូរ៉េខាងត្បូងបានចោទ ប្រកាន់ជាផ្លូវការ ទៅលើប្រធានាធិបតី Yoon Suk Yeol ពីបទដឹកនាំការបះបោរកំឡុង ពេលដាក់ច្បាប់អាជ្ញាសឹក រយៈពេលខ្លី របស់លោកកាលពីខែមុន ។ លោក Yoon ដែលត្រូវបានចោទ ប្រកាន់ កាលពីថ្ងៃទី១៤ ខែធ្នូ ប្រឈមមុខនឹងការចោទ ប្រកាន់ពីបទរំលោភអំណាច និងធ្វើឱ្យខូចដល់ ស្ថាប័នប្រជាធិបតេយ្យ។

យោងតាមសារព័ត៌មាន RT ចេញផ្សាយ នៅថ្ងៃទី២៦ ខែមករា ឆ្នាំ២០២៥ បានឱ្យដឹងថា លោក Yoon បានប្រកាសច្បាប់ អាជ្ញាសឹកជាបន្ទាន់នៅថ្ងៃទី៣ ខែធ្នូដោយអះអាងថា ក្រុមប្រឆាំងកំពុងរៀបចំ “ការបះបោរ” និងចោទប្រកាន់ថា ក្រុមប្រឆាំងបានអាណិតអាសូរ ដល់ប្រទេសកូរ៉េខាងជើង ។ វិធានការដ៏ចម្រូងចម្រាសនេះ ត្រូវបានលុបចោល ក្នុងរយៈពេលប៉ុន្មានថ្ងៃ ដែលនាំទៅដល់ការចោទ ប្រកាន់របស់លោកដោយរដ្ឋសភា ។ ការចាប់ខ្លួនលោក Yoon កាលពីថ្ងៃទី ១៥ ខែមករា បានបង្កឱ្យមានការតវ៉ា ដោយហិង្សាដោយ អ្នកគាំទ្ររបស់លោក ដែលបានសម្រុកចូលតុលាការ ក្រុងសេអ៊ូលខាងលិច។

រដ្ឋអាជ្ញាបានលើកឡើង នៅក្នុងសេចក្តីថ្លែងការណ៍ និងត្រូវបានដកស្រង់ ដោយសារព័ត៌មាន យ៉ុនហាប់ថា “បន្ទាប់ពីបានពិនិត្យយ៉ាង ទូលំទូលាយនូវភស្តុតាងពីករណីសមគំនិតដែលបានស៊ើបអង្កេតរហូតមកដល់ពេលនេះហើយភស្តុតាងពី សំណុំរឿងបញ្ជូនទៅប៉ូលីស និងស៊ើបអង្កេត យើងបានកំណត់ថាវាសមស្រប (ត្រឹមត្រូវ) ក្នុងការចោទប្រកាន់ (Yoon)”។

រដ្ឋអាជ្ញាបានចោទប្រកាន់លោក Yoon ដោយគ្មាន ការស៊ើបអង្កេតបន្ថែម ដោយលើកឡើងពីភស្តុតាង គ្រប់គ្រាន់ដែលប្រមូលបានរួចហើយ និងការព្រួយបារម្ភថា លោកអាចបំផ្លាញភស្តុតាង នៃឧក្រិដ្ឋកម្ម ដែលត្រូវបានចោទ ប្រកាន់របស់គាត់ លុះត្រាតែមានការចោទ ប្រកាន់ជាផ្លូវការ។ រដ្ឋអាជ្ញាបានចោទប្រកាន់ថា ក្រឹត្យច្បាប់អាជ្ញាសឹក របស់គាត់គឺជាផ្នែកមួយនៃផែនការដ៏ទូលំទូលាយមួយ ដើម្បីដណ្តើមការគ្រប់គ្រងមុខងាររដ្ឋ។

សូមបញ្ជាក់ថា ការបះបោរស្ថិត ក្នុងចំណោមបទចោទ មួយចំនួន ដែលប្រធានាធិបតីកូរ៉េខាងត្បូងម្នាក់ មិនមានអភ័យឯកសិទ្ធិ ។ បើត្រូវកាត់ទោស គឺលោក Yoon អាចប្រឈមនឹងការ ជាប់ពន្ធនាគារអស់មួយជីវិត ឬកាត់ទោសប្រហារជីវិត៕