ឯកឧត្តមរដ្ឋមន្ត្រី ថោ ជេដ្ឋា ចុះពិនិត្យប្រព័ន្ធធារាសាស្ត្រដំណាក់អំពិល និងការងារបង្កបង្កើនផលស្រូវប្រាំង ក្នុងភូមិសាស្ត្រសង្កាត់លលកសរ ក្រុងពោធិ៍សាត់ ខេត្តពោធិ៍សាត់

ភ្នំពេញ៖ នៅរសៀលថ្ងៃចន្ទ ៧រោច ខែបុស្ស ឆ្នាំរោង ឆស័ក ពុទ្ធសករាជ ២៥៦៨ ត្រូវនឹងថ្ងៃទី២០ ខែមករា ឆ្នាំ២០២៥នេះ ឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម អមដំណើរដោយឯកឧត្តមរដ្ឋលេខាធិការប្រចាំការ ឯកឧត្តមជាថ្នាក់ដឹកនាំ មន្ត្រីបច្ចេកទេសក្រសួង និងមន្ទីរធនធានទឹក និងឧតុនិយមខេត្តពោធិ៍សាត់បានអញ្ជើញចុះពិនិត្យប្រព័ន្ធធារាសាស្ត្រដំណាក់អំពិល និងការងារបង្កបង្កើនផលស្រូវប្រាំង ក្នុងភូមិដំណាក់អំពិល សង្កាត់លលកសរ ក្រុងពោធិ៍សាត់ ខេត្តពោធិ៍សាត់ នៅភាគខាងលិចចម្ងាយ ១៨គីឡូម៉ែត្រ ពីក្រុងពោធិ៍សាត់។

សូមជម្រាបថា គិតត្រឹមខែមករានេះ ក្នុងប្រព័ន្ធធារាសាស្ត្រដំណាក់អំពិលអនុវត្តការងារបង្កបង្កើនផលស្រូវប្រាំងបានចំនួន ១៣.០០០ហិកតា។ ប្រព័ន្ធធារាសាស្ត្រដំណាក់អំពិលទទួលប្រភពទឹកពីតំបន់ជួរភ្នំក្រវាញតាមដងស្ទឹងពោធិ៍សាត់ និងទំនប់អាងស្ដុកទឹកលេខ៣ និងទំនប់អាងស្ដុកទឹកលេខ៥ ក្នុងស្រុកភ្នំក្រវាញ។ ប្រព័ន្ធនេះគ្របដណ្តប់លើឃុំ-សង្កាត់ចំនួន១១ នៃក្រុង-ស្រុកចំនួន៣ នៃខេត្តពោធិ៍សាត់ គឺក្រុងពោធិ៍សាត់ ស្រុកភ្នំក្រវាញ និងស្រុកបាកាន។

សូមបញ្ជាក់ថា ប្រព័ន្ធធារាសាស្ត្រដំណាក់អំពិលបានចាប់ផ្តើមសាងសង់ និងជួសជុលឡើងវិញក្នុងឆ្នាំ២០០៦ មានហេដ្ឋារចនាសម្ព័ន្ធដូចជា៖ ទី១).សំណង់មេកាត់ស្ទឹងពោធិ៍សាត់ចំនួន ១កន្លែងប្រវែង ១៤៤ម៉ែត្រ, ទី២).ប្រឡាយមេចំនួន ១ខ្សែប្រវែង ២០,៧គីឡូម៉ែត្រ, ទី៣).ប្រឡាយរងចំនួន ១៤ខ្សែប្រវែង ៩៩,៦៦គីឡូម៉ែត្រ, ទី៤).ប្រឡាយស្រោចស្រពបញ្ចូលស្រែចំនួន ២៥៩ខ្សែ ប្រវែង ៣៣៤,៨៤គីឡូម៉ែត្រ, ទី៥).ប្រឡាយដោះទឹកចំនួន ២០ខ្សែប្រវែង៩៧,៥០គីឡូម៉ែត្រ និងទី៦).សំណង់ទ្វារទឹកនិងសំណង់ដោះទឹកសរុបចំនួន ៣៨០កន្លែង មានប្រជាពលរដ្ឋទទួលផលចំនួន ៧.៨៦០គ្រួសារ និងមានសហគមន៍កសិករប្រើប្រាស់ទឹកចំនួន ៥សហគមន៍ ៕