រដ្ឋាភិបាលកោះតៃវ៉ាន់ អនុវត្តទោសប្រហារជីវិតជាលើកដំបូងរបស់ខ្លួនក្នុងរយៈពេល៥ឆ្នាំ ខណៈធ្វើឱ្យក្រុមសិទ្ធិមនុស្ស និងអឺរ៉ុបស្រងាកចិត្ត និងខកចិត្តជាខ្លាំង
តៃប៉ិ៖ រដ្ឋាភិបាលកោះតៃវ៉ាន់ បានអនុវត្តទោសប្រហារជីវិតជាលើកដំបូងរបស់ខ្លួនក្នុងរយៈពេលប្រាំឆ្នាំ កាលពីល្ងាចថ្ងៃព្រហស្បតិ៍ទី១៧ ខែមករា ខណៈការណ៍នេះធ្វើឱ្យក្រុមសិទ្ធិមនុស្ស និងសហភាពអឺរ៉ុបស្រងាកចិត្ត និងខកចិត្តជាខ្លាំង ហើយថែមទាំងបានអំពាវនាវឱ្យរដ្ឋាភិបាលកោះតៃវ៉ាន់ ផ្អាកជាបន្ទាន់នៃការកាត់ទោសប្រហារជីវិត។
ទោះបីកោះតៃវ៉ាន់មានឈ្មោះជាដែនដីប្រជាធិបតេយ្យសេរីបំផុតរបស់អាស៊ីក៏ដោយ ក៏ទោសប្រហារជីវិតនៅតែត្រូវបានអនុវត្ត ទោះបីជាមួយរយៈចុងក្រោយនេះ កោះតៃវ៉ាន់កម្រនឹងយកច្បាប់កាត់ទោសប្រហារជីវិតមកអនុវត្តក៏ដោយ នោះក៏ព្រោះតែឧក្រិដ្ឋកម្មនៃអំពើហិង្សារបស់ឧក្រិដ្ឋជននៅមានកម្រិតទាប។ កាលពីខែកញ្ញាឆ្នាំមុន តុលាការធម្មនុញ្ញកោះតៃវ៉ាន់បានសម្រេចថា ទោសប្រហារជីវិតមានលក្ខណៈធម្មនុញ្ញ ប៉ុន្តែសម្រាប់តែឧក្រិដ្ឋកម្មធ្ងន់ធ្ងរបំផុតតែប៉ុណ្ណោះ ជាមួយនឹងការត្រួតពិនិត្យផ្លូវច្បាប់យ៉ាងម៉ត់ចត់បំផុត បន្ទាប់ពីបានពិចារណាលើញត្តិប្រហារជីវិត ដែលនាំឱ្យមនុស្ស៣៧នាក់ត្រូវអស់អាយុសង្ខារ។
ក្រសួងយុត្តិធម៌កោះតៃវ៉ាន់ អះអាងនៅក្នុងសេចក្តីថ្លែងការណ៍មួយថា លោក ហ័ង លីនកៃ (Huang Lin-kai) ដែលត្រូវបានប្រហារជីវិតនៅមជ្ឈមណ្ឌលឃុំឃាំងក្រុងតៃប៉ិ ក្រោយត្រូវបានតុលាការកាត់ទោសប្រហារជីវិត កាលពីឆ្នាំ២០១៧ ពីបទឃាតកម្មកាលពីឆ្នាំ២០១៣ លើអតីតមិត្តស្រី និងម្តាយរបស់នាង។ មិនត្រឹមតែប៉ុណ្ណោះ លោក ហ័ង ក៏បានចាប់រំលោភអតីតសង្សាររបស់លោកផងដែរ។ ក្រសួងសមីបានអះអាងថា ការអនុវត្តទោសប្រហារជីវិតលើលោក ហ័ង គឺស្របទៅនឹងចេតនានៃសេចក្តីសម្រេចខែកញ្ញាឆ្នាំមុនរបស់តុលាការធម្មនុញ្ញ ព្រោះឧក្រិដ្ឋកម្មរបស់លោកគឺ«ពិតជាអមនុស្សធម៌ និងកាចសាហាវឃោរឃៅយង់ឃ្នងបំផុត»។
ជុំវិញរឿងរ៉ាវរៀបរាប់ខាងលើ សហភាពអឺរ៉ុបបានអំពាវនាវឱ្យកោះប្រជាធិបតេយ្យតៃវ៉ាន់ អនុវត្ត និងផ្អាកទោសប្រហារជីវិត និងបន្តគោលនយោបាយជាប់លាប់ឆ្ពោះទៅរកការលុបបំបាត់ទាំងស្រុងនូវទោសប្រហារជីវិត ខណៈទោសប្រហារជីវិតនេះ គឺជាការវិវឌ្ឍដ៏គួរឱ្យរន្ធត់ និងឃោរឃៅមួយ។ ទន្ទឹមនឹងនោះ ក្រុមសិទ្ធិមនុស្សសម្ព័ន្ធភាពកោះតៃវ៉ាន់ ដើម្បីបញ្ចប់ការកាត់ទោសប្រហារជីវិត បានអះអាងថា ទោសប្រហារជីវិតនឹងធ្វើឱ្យសង្គមកាន់តែបង្ហូរឈាម។ សូមរំឭកថា កោះតៃវ៉ាន់បានប្រហារជីវិតមនុស្សម្នាក់ចុងក្រោយនៅក្នុងខែមេសា ឆ្នាំ២០២០ ដោយការណ៍នោះ រងនូវការប្រមាថ និងស្តីបន្ទោសពីសហភាពអឺរ៉ុបជាខ្លាំង៕
