សមាជិកសភាសែ្វងយល់ពីវឌ្ឍនភាពនៃការចុះបញ្ជីដីធ្លី តាមរយៈសិក្ខាសាលា ស្តីពី“វឌ្ឍនភាពនៃការចុះបញ្ជីដីធ្លី-បរិយាកាសគ្មានវិវាទ”
ភ្នំពេញ៖ សិក្ខាសាលាផ្សព្វផ្សាយស្តីពី “វឌ្ឍនភាពនៃការចុះបញ្ជីដីធ្លី-បរិយាកាសគ្មានវិវាទ” បានរៀបចំឡើងក្នុងគោលបំណងជម្រាបជូននូវព័ត៌មានអំពីវឌ្ឍនភាពការចុះបញ្ជីដីធ្លី ការគ្រប់គ្រងដីធ្លី និងដំណោះស្រាយ ជូនដល់សមាជិកសមាជិកាព្រឹទ្ធសភា រដ្ឋសភា រាជរដ្ឋាភិបាលនិងអង្គភាពពាក់ព័ន្ធ នៅព្រឹកថ្ងៃទី១៣ ខែមករា ឆ្នាំ២០២៥ នាសណ្ឋាគារ សូហ្វីតែលភ្នំពេញភូគីត្រា។
សិក្ខាសាលានេះ បានរៀបចំធ្វើឡើងដោយព្រឹទ្ធសភានៃព្រះរាជាណាចក្រកម្ពុជានិងមានការគាំទ្រដោយក្រសួងរៀបចំដែនដី នគរូបនីយកម្ម និងសំណង់ ក្នុងគោលបំណងផ្តល់ព័ត៌មានថ្មីៗ ដើម្បីជាជំនួយស្មារតី ចំពោះសមាជិក សមាជិកាព្រឹទ្ធសភា រដ្ឋសភា នៅក្នុងការអនុវត្តតួនាទីរបស់ខ្លួន ពិសេសនៅក្នុងការចុះសិក្សាស្វែងយល់ការងារនៅតាមមណ្ឌលរាជធានីខេត្ត ក៏ដូចជានៅពេលត្រូវចុះជួបប្រាស្រ័យជាមួយប្រជាពលរដ្ឋ ជាដើម។
ឯកឧត្តម អ៊ុំ សារឹទ្ធ ប្រធានគណៈកម្មការសាធារណការ ដឹកជញ្ជូន អាកាសចរណ៍ស៊ីវិល ប្រៃសណីយ៍ ទូរគមនាគមន៍ ឧស្សាហកម្ម រ៉ែ ថាមពល ពាណិជ្ជកម្ម រៀបចំដែនដី នគរូបនីយកម្ម និងសំណង់ (គណៈកម្មការទី៩) នៃព្រឹទ្ធសភា បានថ្លែងថា វេទិកាផ្សព្វផ្សាយនាពេលនេះ គឺជាឱកាសនៃការតាំងចិត្តរួមគ្នា ដើម្បីបន្តដោះស្រាយវិវាទដីធ្លីឱ្យបានកាន់តែល្អប្រសើរឡើងថែមទៀត តាមរយៈបទបង្ហាញគន្លឹះ អំពីសមិទ្ធផល បទពិសោធន៍ ការប្រឈម និងទិសដៅក្នុងពេលខាងមុខ ព្រមទាំងសំណួរ ចម្លើយ និងអនុសាសន៍សំខាន់ៗ ដើម្បីកសាងបរិយាកាសគ្មានវិវាទ សំដៅពង្រឹងពង្រីក សុខដុមនីយកម្មសង្គម ប្រកបដោយចក្ខុវិស័យអភិវឌ្ឍរឹងមាំ និងយូរអង្វែង។
លោកជំទាវ និន សាផុន ប្រធានគណៈកម្មការសាធារណការ ដឹកជញ្ជូន អាកាសចរណ៍ស៊ីវិល ប្រៃសណីយ៍ ទូរគមនាគមន៍ ឧស្សាហកម្ម វិទ្យាសាស្ត្រ បច្ចេកវិទ្យា នវានុវត្តន៍ រ៉ែ ថាមពល ពាណិជ្ជកម្ម រៀបចំដែនដី នគរូបនីយកម្ម និងសំណង់ (គណៈកម្មការទី៩) នៃរដ្ឋសភា បានមានប្រសាសន៍លើកឡើងថា ការរៀបចំសិក្ខាសាលានិងការជួបជុំគ្នានាឱកាសនេះគឺជាការឆ្លុះបញ្ចាំងឱ្យឃើញនូវការប្តេជ្ញាចិត្តរួមគ្នារវាងស្ថាប័ននីតិប្បញ្ញត្តិ និងស្ថាប័ននីតិប្រតិបត្តិដើម្បីស្វែងរកដំណោះស្រាយប្រកបដោយប្រសិទ្ធិភាពនិងនិរន្តរភាពក្នុងការដោះស្រាយបញ្ហាប្រឈមពាក់ព័ន្ធនឹងវិវាទដីធ្លីនិងក្នុងការបម្រើផលប្រយោជន៍របស់ប្រជាជាតិ។
ឯកឧត្តមបណ្ឌិត ធន់ វឌ្ឍនា អនុប្រធានទី២ព្រឹទ្ធសភា បានមានប្រសាសន៍ថា វេទិកាផ្សព្វផ្សាយនេះ មានគោលបំណងពង្រឹងកិច្ចសហប្រតិបត្តិការរវាងសមាជិកសភា និងមន្ត្រីរដ្ឋាភិបាល ដោយជំរុញការសន្ទនាបើកចំហលើការដោះស្រាយវិវាទដីធ្លី ក្នុងការចូលរួមក្នុងការវាយតម្លៃ និងពិនិត្យលើដំណើរការ និងបញ្ហាប្រឈមក្នុង ការដោះស្រាយវិវាទដីធ្លី ដើម្បីជាមូលដ្ឋានសម្រាប់ការកែលម្អ។ លើសពីនេះទៅទៀតនឹងផ្តោតលើការពង្រឹងការយល់ដឹងអំពីក្របខ័ណ្ឌច្បាប់ ពាក់ព័ន្ធនឹង ការគ្រប់គ្រងដីធ្លី ការអនុវត្តច្បាប់រយៈពេលកន្លងមក និងគោលនយោបាយនានាជុំវិញការគ្រប់គ្រងដីធ្លី។ តាមរយៈការចែករំលែកបទពិសោធន៍ និងការលើកឡើងពីករណីអនុវត្តដោយជោគជ័យ អាចរៀនពីវិធីសាស្ត្រប្រកបដោយភាពច្នៃប្រឌិតក្នុងការដោះស្រាយវិវាទដីធ្លី។
ឯកឧត្តមបានលើកទឹកចិត្តឱ្យមានការធ្វើវេទិកាផ្សព្វផ្សាយដូចនេះជាច្រើនទៀត ដើម្បីចែករំលែកព័ត៌មាន ចំណេះដឹង និងបទពិសោធន៍ ជាពិសេសគឺការផ្សារភ្ជាប់ទំនាក់ទំនងរវាងស្ថាប័ននីតិប្រតិបត្តិនិងស្ថាប័ននីតិប្បញ្ញត្តិកាន់តែល្អប្រសើរដែលនឹងជួយពង្រឹងការអនុវត្តមុខងាររបស់សមាជិកសភាបានកាន់តែមានប្រសិទ្ធភាពខ្ពស់ រួមចំណែកបន្ថែមទៀតដល់ការអភិវឌ្ឍប្រទេសជាតិ និងសុខុមាលភាពរបស់ប្រជាជនកម្ពុជាទាំងអស់។
ក្នុងឱកាសនោះ ឯកឧត្តមឧបនាយករដ្ឋមន្ត្រី សាយ សំអាល់ រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បានថ្លែង អំពីសភាពការណ៍រួមនៃ “ការបង្កើតនូវបរិយាកាសគ្មានវិវាទ”។ ឯកឧត្តមឧបនាយករដ្ឋមន្ត្រី បានថ្លែងផ្តោតទៅលើការចុះបញ្ជីបង្ហើយ ការបញ្ចប់វិវាទដីធ្លី ការផ្តល់សេវាគាប់ចិត្ត ការកំណត់និងគ្រប់គ្រងតំបន់បឹងទន្លេសាប ការរៀបចំនិងលក្ខខណ្ឌប្រើប្រាស់ដីក្នុងតំបន់រមណីយដ្ឋានអង្គរ និងការដោះស្រាយវិវាទនៅតាមបុរី ជូនដល់អង្គសិក្ខាសាលា។
ថ្លែងបិទសិក្ខាសាលា ឯកឧត្តម វង សូត អនុប្រធានទី២នៃរដ្ឋសភា បានថ្លែងកោតសរសើរឯកឧត្តមបណ្ឌិត ធន់ វឌ្ឍនា អនុប្រធានទី២ព្រឹទ្ធសភា ដែលបានផ្តួចផ្តើមឱ្យមានសិក្ខាសាលាដ៏មានសារៈសំខាន់នេះឡើង សម្រាប់ជាការយល់ដឹងថ្មីមួយដល់អង្គនីតិប្បញ្ញត្តិ។ ឯកឧត្តមបានកោតសរសើរចំពោះឯកឧត្តមសាយ សំអាល់ ដែលបានចែករំលែកចំណេះដឹង បទពិសោធន៍ វឌ្ឍនភាពថ្មីៗ និងដំណោះស្រាយបញ្ហាវិវាទដីធ្លីដោយជោគជ័យនិងបានឆាប់រហ័ស។
ឯកឧត្តមអនុប្រធានទី២រដ្ឋសភា មានមោទនភាពនិងសុទិដ្ឋិនិយមចំពោះក្រសួង រៀបចំដែនដីនគររូបនីយកម្មដែលបានខិតខំប្រឹងប្រែងដោះស្រាយវិវាទដីធ្លី ឱ្យបានកាន់តែល្អប្រសើរឡើង ៕
