ឧត្តមសេនីយ៍ទោ សោម ស៊ុន ដាក់បទបញ្ជាឲ្យកងកម្លាំង បន្តសកម្មភាពការពារទប់ស្កាត់ និងបង្ក្រាបបទល្មើសធនធានធម្មជាតិ និងចូលរួមសហការអនុវត្តគោលនយោបាយភូមិឃុំ មានសុវត្ថិភាព ឱ្យមានប្រសិទ្ធភាព
ភ្នំពេញ៖ ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ នៅថ្ងៃទី៣០ ខែឆ្នូ ឆ្នាំ២០២៤ បានដាក់បទបញ្ជាដល់ថ្នាក់ដឹកនាំគ្រប់លំដាប់ថ្នាក់ មេបញ្ជាការគ្រប់បណ្ដាកងឯកភាព និងគ្រប់ស្ថាប័នចំណុះនៃបញ្ជាការដ្ឋានតំបន់ប្រតិបត្តិការសឹករងកំពង់ធំ ត្រូវបន្តចូលរួមអនុវត្តបទបញ្ជាស្ដីពីការការពារទប់ស្កាត់ និងបង្ក្រាបបទល្មើសធនធានធម្មជាតិនៅក្នុងខេត្តកំពង់ធំ ឲ្យមានប្រសិទ្ធភាព។ ជាមួយនោះ កងកម្លាំងនៅខាងក្រោយត្រូវបន្តចូលរួមសហប្រតិបត្តិការក្នុងការអនុវត្តនូវគោលនយោបាយភូមិឃុំ មានសុវត្ថិភាព ពិសេសការបង្ក្រាបក្រុមក្មេងទំនើង ឲ្យទទួលបានជោគជ័យ។ ដែលពិធីនេះប្រព្រឹត្តទៅនៅទីបញ្ជាការតំបន់ប្រតិបត្តិការសឹករងកំពង់ធំ យោធភូមិភាគទី ៤។
ឧត្តមសេនីយ៍ទោ សោម ស៊ុន បានថ្លែងអំណរគុណចំពោះកងកម្លាំងចម្រុះទាំងអស់ ដែលបានខិតខំបំពេញភារកិច្ចក្នុងរយៈពេលជាង ៨ខែ នៃការអនុវត្តផែនការប្រើប្រាស់កម្លាំងសរុបវិធានការសរុប ក្នុងការការពារទប់ស្កាត់ និងបង្ក្រាបបទល្មើសធនធានធម្មជាតិ នៅក្នុងខេត្តកំពង់ធំ ដែលមានកងកម្លាំងចម្រុះចូលរួមប្រតិបត្តិការចំនួនជាង៣៣០នាក់ បានអនុវត្តដោយជោគជ័យ ដោយគ្មានការកាប់ទន្ទ្រានជាថ្មីយកដីរដ្ឋធ្វើជាកម្មសិទ្ធិ ព្រមជាមួយនោះបានរកឃើញផ្ទៃដីដែលបានកាប់ទន្ទ្រានមុនពេលកងកម្លាំងចម្រុះទៅដល់ជាង២,៥០០ហិកតា ដែលត្រូវបានដកហូត និងកំពុងធ្វើការគ្រប់គ្រងទុកជាសម្បត្តិរដ្ឋ ហើយបានដំណើរការដាំស្ដារព្រៃឈើឡើងវិញ បានជាង ៥ម៉ឺនដើម ។
ឧត្តមសេនីយ៍ទោ សោម ស៊ុន ក៏បានប្រគល់ភារកិច្ចផងដែរ ដល់កងកម្លាំងទាំងអស់នៃបញ្ជាការដ្ឋានតំបន់ប្រតិបត្តិការសឹករងកំពង់ធំ ត្រូវបន្តសហប្រតិបត្តិការជាមួយកងកម្លាំងប្រដាប់អាវុធទាំងបី អាជ្ញាធរដែនដីគ្រប់លំដាប់ថ្នាក់ ក្នុងការអនុវត្តនូវគោលនយោបាយភូមិឃុំ មានសុវត្ថិភាព ឱ្យទទួលបានជោគជ័យ ពិសេសចូលរួមតាមការ ដែលអាចធ្វើទៅបាន ក្នុងការបង្ក្រាបក្មេងទំនើងនៅតាមមូលដ្ឋាននានា ដែលក្រុមទាំងនេះបានបង្កអសន្តិសុខក្នុងសង្គម ធ្វើឲ្យប្រជាពលរដ្ឋមានការភ័យខ្លាច ។
នាយទាហាន នាយទាហានរង និងពលទាហានទាំងអស់នៃបញ្ជាការដ្ឋានតំបន់ប្រតិបត្តិការសឹករងកំពង់ធំ បានប្តេជ្គាចិត្តអនុវត្តឱ្យបានដាច់ខាត តាមបទបញ្ជារបស់ប្រមុខរាជរដ្ឋាភិបាល ដែលដឹកនាំប្រកបដោយភាពមុឺងម៉ាត់ និងស្វាហាប់ របស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ថ្នាក់ដឹកនាំគ្រប់លំដាប់ថ្នាក់នៃកងយោធពលខេមរភូមិន្ទ និងឯកឧត្តមអភិបាលខេត្ត ប្រធានគណៈបញ្ជាការឯកភាពរដ្ឋបាលខេត្តកំពង់ធំ ឲ្យទទួលបានជោគជ័យ ៕
