លទ្ធផលនៃជំរឿនសេដ្ឋកិច្ចរបស់ប្រទេសចិនលើកទី៥ ត្រូវបានចេញផ្សាយ

នៅវេលាម៉ោង៣រសៀលថ្ងៃទី២៦ ខែធ្នូ ការិយាល័យព័ត៌មាននៃក្រុមប្រឹក្សាកិច្ចការរដ្ឋចិនបានធ្វើសន្និសីទសារព័ត៌មាន និងប្រកាសលទ្ធផលនៃជំរឿនសេដ្ឋកិច្ចរបស់ប្រទេសចិនលើកទី៥ ។
តាមការផ្សាយដំណឹងឱ្យដឹងថា ពេលវេលាធ្វើជំរឿនលើកនេះគឺគិតត្រឹមថ្ងៃទី ៣១ ខែធ្នូ ឆ្នាំ ២០២៣ ហើយឯកសារយោងសម្រាប់ធ្វើជំរឿនគឺឯកសារក្នុងឆ្នាំ ២០២៣ ។ បុគ្គលនិងអង្គភាពផ្តល់បទសម្ភាសន៍ក្នុងការធ្វើជំរឿនលើកនេះ រួមមាននីតិបុគ្គល អង្គភាពសាជីវកម្ម និងអ្នកប្រកបអាជីវកម្មជាលក្ខណៈឯកជនដែលប្រកបអាជីវកម្មផ្នែកឧស្សាហកម្មផលិតនិងកែច្នៃ និងឧស្សាហកម្មសេវាកម្ម ។
លទ្ធផលនៃជំរឿនបានបង្ហាញថា គិតត្រឹមចុងឆ្នាំ ២០២៣ ប្រទេសចិនមាននីតិបុគ្គលផ្នែកឧស្សាហកម្មផលិតនិងកែច្នៃ និងឧស្សាហកម្មសេវាកម្មចំនួន ៣៣,២៧ លានអង្គភាព កើនឡើង ៥២,៧% បើធៀបនឹងចុងឆ្នាំ ២០១៨ ដែលមានអ្នកប្រកបអាជីវកម្មចំនួន ៤២៨,៩៨៤ លាននាក់ កើនឡើង ១១,៩%។ អ្នកប្រកបអាជីវកម្មជាលក្ខណៈឯកជនមានចំនួន ៨៧,៩៩៥ លានអង្គភាព ដែលមានអ្នកប្រកបអាជីវកម្ម ១៧៩,៥៦៤ លាននាក់។
យោងតាមលទ្ធផលនៃជំរឿនឱ្យដឹងថា ចំនួនអង្គភាពនៅក្នុងឧស្សាហកម្មផលិតនិងកែច្នៃ និងឧស្សាហកម្មសេវាកម្មរបស់ប្រទេសចិនបានកើនឡើងយ៉ាងខ្លាំង ព្រមនិងទទួលបុគ្គលិកកាន់តែច្រើនឱ្យចូលធ្វើការ ។ ទ្រង់ទ្រាយនៃទ្រព្យសម្បត្តិសហគ្រាសបានបន្តកើនឡើង ប្រាក់ចំណូលអាជីវកម្មបានកើនឡើងយ៉ាងលឿនបង្គួរ សមត្ថភាពច្នៃប្រឌិតខាងវិទ្យាសាស្រ្តនិងបច្ចេកវិទ្យាបានលើកកម្ពស់ថែមទៀត ប្រសិទ្ធភាពនៃផលិតភាពក៏ត្រូវបានលើកកម្ពស់ផងដែរ។ រចនាសម្ព័ន្ធឧស្សាហកម្មត្រូវបានធ្វើឱ្យប្រសើរឡើង សេដ្ឋកិច្ចឌីជីថលមានការរីកចម្រើន ហើយភាពស៊ីសង្វាក់គ្នា និងតុល្យភាពនៃការអភិវឌ្ឍក្នុងតំបន់កាន់តែខ្លាំងឡើងៗ ។ ក្នុងរយៈពេលប្រាំឆ្នាំកន្លងមកនេះ ការអភិវឌ្ឍប្រកបដោយគុណភាពខ្ពស់របស់ប្រទេសចិនទទួលបានសមិទ្ធផលគួរឱ្យកត់សម្គាល់៕