ជប៉ុន និងអាមេរិក ចោទក្រុមចោរព័ត៌មានវិទ្យារបស់កូរ៉េខាងជើង លួចលុយឌីជីថលគ្រីបតូជាង៣០០លានដុល្លារ

តូក្យូ៖ ប៉ូលិសជប៉ុន និងប៉ូលិស FBI របស់សហរដ្ឋអាមេរិក នៅថ្ងៃអង្គារ ទី២៤ ខែធ្នូ បានឱ្យដឹងថា ក្រុមចោរព័ត៌មានវិទ្យា ឬ hacker របស់ប្រទេសកូរ៉េខាងជើង បានលួចលុយឌីជីថលគ្រីបតូ (cryptocurrency) ចំនួនជាង៣០០លានដុល្លារ ពីក្រុមហ៊ុនជួញដូរលុយគ្រីបតូ DMM Bitcoin ដែលមានមូលដ្ឋាននៅប្រទេសជប៉ុន។ នេះបើតាមការចេញផ្សាយដោយ ទីភ្នាក់ងារព័ត៌មាន AFP។

ប៉ូលិសជប៉ុន និង FBI បានឲ្យដឹងថា ក្រុម hacker នោះ មានឈ្មោះថា The TraderTraitor ដែលទំនងជាផ្នែកនៃក្រុម hacker ធំ ហៅថា Lazarus Group ដែលត្រូវបានគេជឿថា មានទំនាក់ទំនងជាមួយរដ្ឋាភិបាលទីក្រុងព្យុងយ៉ាង។

ក្រុម Lazarus Group ទទួលបានភាពល្បីឈ្មោះដំបូង កាលពី១០ឆ្នាំមុន នៅពេលដែលក្រុម hacker នោះ រងការចោទប្រកាន់ថា បានធ្វើសកម្មភាពវាយប្រហារតាមប្រព័ន្ធអ៉ីនធើណិត លើក្រុមហ៊ុន Sony Pictures ដើម្បីជាការសងសឹក សម្រាប់ខ្សែភាពយន្ត The Interview ដែលជាភាពយន្តចំអក មេដឹកនាំកូរ៉េខាងជើង លោក គីម ជុងអ៊ុន។

គួរបញ្ជាក់ថា កម្មវិធីឯកទេសផ្នែក cyber-warfare ឬសង្រ្គាមអ៉ីនធើណិតរបស់ប្រទេសកូរ៉េខាងជើង មានអាយុកាលយ៉ាងហោច តាំងតែពីពាក់កណ្តាលទសវត្សរ៍ឆ្នាំ១៩៩០ មកម៉្លេះ ហើយបើតាមយោមតាមរបាយការណ៍យោធា ឆ្នាំ២០២០ របស់សហរដ្ឋអាមេរិក មកទល់បច្ចុប្បន្ននេះ វាបានវិវត្តទៅជាអង្គភាព cyber-warfare ធំមួយ មានសមាជិកប្រហែល៦០០០នាក់ ហៅថា Bureau 121 ដែលធ្វើប្រតិបត្តិការចេញពីប្រទេសមួយចំនួន។