មន្ទីរបញ្ចកោណ៖ អំពើពុករលួយក្នុងយោធារបស់ចិន អាចនឹងរំខានដល់វឌ្ឍនភាពរបស់បងធំប្រចាំតំបន់អាស៊ីនេះ ឆ្ពោះទៅរកគោលដៅទំនើបកម្មយោធាឆ្នាំ២០២៧
បរទេស៖ មន្ទីរបញ្ចកោណបានអះអាងនៅក្នុងរបាយការណ៍ប្រចាំឆ្នាំរបស់ខ្លួន ស្តីពីយោធារបស់ចិន ដែលត្រូវបានចេញផ្សាយកាលពីថ្ងៃពុធទី១៨ធ្នូថា អំពើពុករលួយនៅក្នុងយោធារបស់ចិន អាចនឹងរំខានដល់វឌ្ឍនភាពរបស់បងធំប្រចាំតំបន់អាស៊ីនេះ ឆ្ពោះទៅរកគោលដៅទំនើបកម្មយោធាឆ្នាំ២០២៧។
ចាប់តាំងពីឆ្នាំមុនមក យោធារបស់ប្រទេសចិន បានឆ្លងកាត់ការបោសសម្អាតប្រឆាំងអំពើពុករលួយយ៉ាងធំ ហើយកាលពីខែមុន ក្រសួងការពារជាតិបានបញ្ជាក់ថា មន្ត្រីយោធាលំដាប់កំពូលម្នាក់ត្រូវបានព្យួរការងារ ហើយកំពុងស្ថិតនៅក្រោមការស៊ើបអង្កេតសម្រាប់ការរំលោភវិន័យធ្ងន់ធ្ងរ។ របាយការណ៍ដ៏ទូលំទូលាយរបស់មន្ទីរបញ្ចកោណ បានបង្ហាញថា នៅចន្លោះខែកក្កដាដល់ខែធ្នូ ឆ្នាំ២០២៣ យ៉ាងហោចណាស់មន្ត្រីយោធាជាន់ខ្ពស់ និងនាយកប្រតិបត្តិឧស្សាហកម្មការពារជាតិចិនចំនួន១៥នាក់ត្រូវបានដកចេញពីមុខតំណែង។
របាយការណ៍បន្តថា នៅក្នុងឆ្នាំ២០២៣ កងទ័ពរំដោះប្រជាជនចិនបានប្រឈមនឹងរលកថ្មីនៃការស៊ើបអង្កេតទាក់ទងនឹងអំពើពុករលួយ និងការដកតំណែងមេដឹកនាំជាន់ខ្ពស់ ដែលអាចរំខានដល់វឌ្ឍនភាពរបស់ខ្លួនឆ្ពោះទៅរកគោលដៅទំនើបភាវូបនីយកម្មឆ្នាំ២០២៧។ មន្ត្រីសហរដ្ឋអាម៉េរិក រួមទាំងប្រធានទីភ្នាក់ងារស៊ើបការណ៍សម្ងាត់មជ្ឈិម បាននិយាយថា ប្រធានាធិបតីចិន លោក ស៊ី ជីនពីង បានបញ្ជាឱ្យយោធារបស់លោកត្រៀមខ្លួនឈ្លានពានតៃវ៉ាន់នៅឆ្នាំ២០២៧។
បើតាមមន្ទីរបញ្ចកោណ គោលដៅទំនើបភាវូបនីយកម្មផ្លូវការឆ្នាំ២០២៧ របស់ចិនរួមមាន៖ ការពន្លឿនការរួមបញ្ចូលនៃការស៊ើបការណ៍សម្ងាត់ យន្តការ និងឧបករណ៍ផ្សេងទៀត ខណៈការជំរុញល្បឿននៃទំនើបកម្មនៅក្នុងទ្រឹស្តីយោធា បុគ្គលិក អាវុធ និងឧបករណ៍។ លោក អេលី រ៉ាត់ន័រ (Ely Ratner) ជំនួយការរដ្ឋមន្ត្រីក្រសួងការពារជាតិអាម៉េរិកទទួលបន្ទុកកិច្ចការសន្តិសុខឥណ្ឌូប៉ាស៊ីហ្វិក បានប្រាប់វិទ្យាស្ថានស្រាវជ្រាវនៅទីក្រុងវ៉ាស៊ីនតោន បន្ទាប់ពីការចេញផ្សាយរបាយការណ៍នេះថា ការដកមន្ត្រីជាន់ខ្ពស់ទាំង១៥រូបចេញពីតំណែងទំនងគ្រាន់ជាចំណុចតូចមួយនៃការបោសសម្អាតអំពើពុករលួយប៉ុណ្ណោះ។ លោកបន្តថា៖«ថ្នាក់ដឹកនាំរបស់ប្រទេសចិន នឹងមិនចាត់វិធានការប្រឆាំងអំពើពុករលួយខ្លាំងក្លាពេកនោះឡើយ លុះត្រាតែពួកគេមានអារម្មណ៍ថា ប្រសិទ្ធភាពប្រតិបត្តិការរបស់កងទ័ពរំដោះប្រជាជនកំពុងត្រូវបានប៉ះពាល់»។
មន្ត្រីការពារជាតិជាន់ខ្ពស់របស់សហរដ្ឋអាម៉េរិកបានប្រាប់អ្នកសារព័ត៌មានថា ការប្រមាញ់ប្រឆាំងអំពើពុករលួយក៏អាចពន្យឺតគម្រោងយោធា រួមទាំងនៅក្នុងឧស្សាហកម្មការពារជាតិរបស់ប្រទេសចិនផងដែរ។ របាយការណ៍ថ្មីនេះ បានចង្អុលបង្ហាញពីការដកចេញសមាជិកកងកម្លាំងរ៉ុក្កែតរបស់ប្រទេសចិនជាច្រើនរូប ដែលជាកងកម្លាំងទទួលបន្ទុកត្រួតពិនិត្យមីស៊ីល និងអាវុធនុយក្លេអ៊ែរ។ កាលពីខែវិច្ឆិកា ឧត្តមនាវីឯក មីវ ហួ (Miao Hua) បម្រើការនៅគណៈកម្មាការយោធាមជ្ឈិម ជាអង្គភាពបញ្ជាការយោធាកម្រិតខ្ពស់បំផុតរបស់ប្រទេសនេះ កំពុងស្ថិតនៅក្រោមការស៊ើបអង្កេតសម្រាប់ការរំលោភវិន័យយ៉ាងធ្ងន់ធ្ងរ។ លោក មីវ ធ្លាប់ជាមន្ត្រីនយោបាយនាំមុខគេរបស់យោធានៅក្នុងគណៈកម្មាការប្រាំមួយនាក់។
