រដ្ឋមន្ត្រីការបរទេស៖ កាតាកំពុងធ្វេីការជាមួយក្រុមការងាររបស់លោក ដូណាល់ ត្រាំ លេីបទឈប់បាញ់នៅតំបន់ហ្កាហ្សា

ដូហា៖ នាយករដ្ឋមន្ត្រី និងជារដ្ឋមន្ត្រីការបរទេសកាតា លោក Sheikh Mohammed bin Abdulrahman Al Thani បានឲ្យដឹងថា ប្រទេសកាតា កំពុងធ្វេីការជាមួយអនាគតរដ្ឋបាលលោក ដូណាល់ ត្រាំ លេីបញ្ហាសង្រ្គាមហ្កាហ្សា ក្រោយបានដឹងពីទំនោរថ្មីសម្រាប់ការចរចាបទឈប់បាញ់។ នេះបេីយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃសៅរ៍ ទី៧ ខែធ្នូ ឆ្នាំ២០២៤។

លោក Sheikh Mohammed bin Abdulrahman Al Thani បានបញ្ជាក់ក្នុងសន្និសីទនៅទីក្រុង Doha ថាយើងឃេីញមានការលើកទឹកចិត្តច្រើនពីអនាគតរដ្ឋបាលអាមេរិក ដើម្បីសម្រេចបាននូវកិច្ចព្រមព្រៀងមួយ សូម្បីតែមុនពេលប្រធានាធិបតីចូលកាន់តំណែងផ្លូវការ ហើយនោះពិតជាបានធ្វើឱ្យយើងខំព្យាយាមផ្លាស់ប្តូរ និងធ្វេីឱ្យអ្វីៗត្រលប់មកវិញ។ យើងធ្វេីការជាមួយគ្នា ក្នុងពីរបីសប្តាហ៍កន្លងមកនេះ។

បេសកជនទទួលបន្ទុកកិច្ចការមជ្ឈិមបូព៌ារបស់លោក ត្រាំ បានធ្វើដំណើរទៅកាន់ប្រទេសកាតា និងអ៉ីស្រាអែល ដើម្បីចាប់ផ្តើមការជំរុញផ្នែកការទូតរបស់ប្រធានាធិបតីជាប់ឆ្នោតអាមេរិករូបនេះ ជុំវិញកិច្ចព្រមព្រៀងបទឈប់បាញ់ និងការដោះលែងចំណាប់ខ្មាំងអ៉ីស្រាអែល។

លោក Steve Witkoff ដែលនឹងក្លាយជាបេសកជនជាផ្លូវការនៃរដ្ឋបាលលោក ត្រាំ បានជួបដាច់ដោយឡែកជាមួយនាយករដ្ឋមន្ត្រីអ៉ីស្រាអែល លោក Benjamin Netanyahu និងលោក Al Thani កាលពីចុងខែវិច្ឆិកាកន្លងទៅ។

សូមបញ្ជាក់ថា យោងតាមអាជ្ញាធរសុខាភិបាលហ្កាហ្សា សង្គ្រាមដែលអូសបន្លាយក្នុងជាង ១៤ខែមកនេះ បានសម្លាប់ប្រជាជនប៉ាឡេស្ទីនជាង ៤៤.០០០នាក់ ខណៈដែលកងកម្លាំងអ៉ីស្រាអែលបន្តបេសកកម្មកម្ចាត់ក្រុមហាម៉ាស និងរំដោះចំណាប់ខ្មាំងដែលនៅសល់។