តស់! មកស្គាល់ប្រវត្តិប្រធានាធិបតីកូរ៉េខាងត្បូង ដែលមានបញ្ហា ការផ្ដួលរំលំ ជាប់ពន្ធនាគារ ឬត្រូវបានធ្វើឃាត
សេអ៊ូល៖ កាលពីថ្ងៃទី៣ ខែធ្នូថ្មីៗ ប្រធានាធិបតីកូរ៉េខាងត្បូង លោក យូន ស៊ុកយ៉ុល បានប្រកាសប្រើច្បាប់អាជ្ញាសឹក។ លោក យូន ថា ការប្រើច្បាប់អាជ្ញាសឹកមានគោលបំណងការពារកូរ៉េខាងត្បូង សេរីនិយមពីការគំរាមកំហែងបង្កឡើងដោយកងកម្លាំងកុម្មុយនីស្ដកូរ៉េខាងជើង និងដើម្បីលុបបំបាត់កងកម្លាំងប្រឆាំងរដ្ឋ។ភ្លាមៗ សមាជិកសភាបានប្រមូលផ្តុំគ្នាប្រឆាំងនឹងក្រឹត្យនេះ ដោយបង្ខំឱ្យប្រធានាធិបតីដកច្បាប់អាជ្ញាសឹកចេញ ក្រោយប្រើបានត្រឹម៣ម៉ោង។
ច្បាប់អាជ្ញាសឹកបែបនេះ ត្រូវប្រកាសជាលើកដំបូងក្នុងរយៈពេលជាង៤ទស្សវត្សរ៍រជ្ជកាលមេដឹកនាំ លោក ជុន ឌូវ៉ាន់ (Chun Doo-hwan) ក្នុងឆ្នាំ១៩៨០។ ប្រធានាធិបតីកូរ៉េខាងត្បូង ស្ទើរតែទាំងអស់ប្រឈមមុខនឹងការចោទប្រកាន់ ត្រូវបានគេផ្ដួលរំលំ ការធ្វើឃាត ឬជាប់ពន្ធនាគារពីបទពុករលួយជាដើម។
តស់មកស្គាល់ប្រវត្តិប្រធានាធិបតីកូរ៉េខាងត្បូង ដែលមានបញ្ហា ការផ្ដួលរំលំ ជាប់ពន្ធនាគារ ឬត្រូវបានធ្វើឃាតទាំងអស់គ្នា។
១.លោក ស៊ីងមែន រ៉េ (Syngman Rhee)៖ លោកកាន់តំណែងចន្លោះឆ្នាំ១៩៤៨ ដល់ឆ្នាំ១៩៦០។ លោកគឺប្រធានាធិបតីទីមួយរបស់ប្រទេសកូរ៉េខាងត្បូង ដែលគ្រប់គ្រងដោយផ្តាច់ការ និងការគាបសង្កត់។ ប្រជាជនមិនពេញចិត្ត និងបានតវ៉ាជាសាធារណៈដ៏ធំប្រឆាំងនឹងអំពើពុករលួយ និងការប្រព្រឹត្តខុសច្បាប់។ ការណ៍នេះបានបង្ខំឱ្យលោកលាលែងពីតំណែងក្នុងឆ្នាំ១៩៦០។
២.លោក យុន បូសឺន (Yun Bo-seon)៖ លោកកាន់តំណែងចន្លោះឆ្នាំ១៩៦០ ដល់១៩៦២។ លោក យុន បានក្លាយជាប្រធានាធិបតី បន្ទាប់ពីចលនាគាំទ្រលទ្ធិប្រជាធិបតេយ្យដែលដឹកនាំដោយនិស្សិត បានបញ្ចប់របបគ្រប់គ្រងរបស់លោក ស៊ីងមែន រ៉េ។ ទោះជាយ៉ាងណា អាណត្តិប្រធានាធិបតីរបស់លោក ត្រូវបានធ្វើរដ្ឋប្រហារដោយរបបយោធាដែលដឹកនាំដោយលោក ផាក ជុងហេ (Park Chung-hee) ក្នុងឆ្នាំ១៩៦១។ ហើយលោកបានលាលែងពីតំណែងនៅឆ្នាំ១៩៦២។
៣.លោក ផាក ជុងហេ (Park Chung-hee)៖ កាន់តំណែងចន្លោះឆ្នាំ១៩៦១ ដល់ឆ្នាំ១៩៧៩។ ដូចបានដឹង! លោក ផាក បានដណ្តើមអំណាចតាមរយៈរដ្ឋប្រហារ និងគ្រប់គ្រងដោយអំណាចផ្តាច់ការ ផ្តោតលើកំណើនសេដ្ឋកិច្ច។ អាណត្តិរបស់លោកត្រូវបានបញ្ចប់ ដោយលោកត្រូវបានធ្វើឃាតនៅឆ្នាំ១៩៧៩ បន្ទាប់ពីមានការគៀបសង្កត់ផ្នែកនយោបាយ និងការរំលោភសិទ្ធិមនុស្សជាច្រើនឆ្នាំ។
៤.លោក ឆយ យូហា (Choi Kyu-hah)៖ កាន់តំណែងឆ្នាំ១៩៧៩ ដល់១៩៨០។ បន្ទាប់ពីការធ្វើឃាតរបស់លោកផាក ជុងហេ លោក ឆយ យូហា បានក្លាយជាប្រធានាធិបតី ដោយសន្យាធ្វើកំណែទម្រង់ និងការបោះឆ្នោតតាមលទ្ធិប្រជាធិបតេយ្យ។ ទោះជាយ៉ាងណា ច្បាប់អាជ្ញាសឹកដែលដាក់ដោយលោក ជុន ឌូវ៉ាន់ (Chun Doo-hwan) ក្នុងខែឧសភាឆ្នាំ១៩៨០ បានធ្វើឱ្យលោក ឆយ ជ្រុះចេញពីតំណែងប្រធានាធិបតីភ្លាមៗ។
៥.លោក ជុន ឌូវ៉ាន់ (Chun Doo-hwan)៖ លោកកាន់តំណែងចន្លោះឆ្នាំ១៩៨០ ដល់១៩៨៨។ លោក ជុន បានឡើងកាន់អំណាចតាមរយៈរដ្ឋប្រហារ ដោយមនុស្សរាប់រយនាក់ត្រូវបានសម្លាប់។ បន្ទាប់ពីចុះចេញពីដំណែង លោក ជុន បានប្រឈមមុខនឹងការកាត់ទោសប្រហារជីវិតនៅឆ្នាំ១៩៩៦ ចំពោះទង្វើរបស់លោក។ ក្រោយមកលោកត្រូវបានកាត់ទោសឱ្យជាប់គុកអស់មួយជីវិត។
៦.លោក រ៉ូហ៍ តែវូ (Roh Tae-woo)៖ កាន់តំណែងចន្លោះឆ្នាំ១៩៨៨ ដល់១៩៩៣។ លោក រ៉ូហ៍ ជាប់ឆ្នោតតាមរយៈការបោះឆ្នោតជ្រើសរើសប្រធានាធិបតីដោយផ្ទាល់ជាលើកដំបូងរបស់ប្រទេសកូរ៉េខាងត្បូង បានប្រឈមមុខនឹងការចោទប្រកាន់ពីបទប្រព្រឹត្តិខុសលើប្រព័ន្ធហិរញ្ញវត្ថុ និងអំពើពុករលួយ។ ក្រោយមក លោកត្រូវបានកាត់ទោសឱ្យជាប់គុក១៧ឆ្នាំក្នុងឆ្នាំ១៩៩៦ ប៉ុន្តែក្រោយមកលោកត្រូវបានលើកលែងទោសវិញ។
៧.លោក គីម យ៉ុងសេម (Kim Young-sam)៖ កាន់តំណែងចន្លោះឆ្នាំ១៩៩៣ ដល់ឆ្នាំ១៩៩៨។ លោកបានព្យាយាមដោះស្រាយអំពើពុករលួយ និងពង្រឹងលទ្ធិប្រជាធិបតេយ្យ។ ទោះជាយ៉ាងណាក៏ដោយ វិបត្តិហិរញ្ញវត្ថុអាស៊ីឆ្នាំ១៩៩៧ បានជះឥទ្ធិពលយ៉ាងធ្ងន់ធ្ងរដល់សេដ្ឋកិច្ចកូរ៉េខាងត្បូង នាំឱ្យប៉ះពាល់ដល់អាណត្តិរបស់លោក។
៨.លោក រ៉ូហ៍ មូយុន (Roh Moo-hyun)៖ កាន់តំណែងចន្លោះឆ្នាំ២០០៣ ដល់២០០៨។ លោកបានផ្តោតលើកំណែទម្រង់រីកចម្រើន ប៉ុន្តែលោកបានប្រឈមមុខនឹងការចោទប្រកាន់នៅឆ្នាំ២០០៤។ អាណត្តិរបស់លោកត្រូវបានបំផ្លាញដោយបញ្ហាប្រឈមសេដ្ឋកិច្ច និងចលាចលការងារ។
៩.លោកស្រី ផាក គឺនហេ (Geun-hye)៖ លោកស្រីកាន់ដំណែងចន្លោះឆ្នាំ២០១៣ ដល់ឆ្នាំ២០១៧។ លោកស្រីជាប្រធានាធិបតីស្រីទីមួយរបស់ប្រទេសកូរ៉េខាងត្បូង។ យ៉ាងណា លោកស្រីបានប្រឈមមុខនឹងការចោទប្រកាន់នៅឆ្នាំ២០១៦ ជុំវិញរឿងអាស្រូវពុករលួយ ដែលពាក់ព័ន្ធនឹងមនុស្សជំនិតរបស់លោកស្រី គឺ លោក ឆយ ស៊ូនស៊ីល (Choi Soon-sil)។ ក្រោយមកលោកស្រីត្រូវបានគេដកចេញពីតំណែងក្នុងឆ្នាំ២០១៧ ហើយក្រោយមកក៏ត្រូវជាប់គុក។
១០.លោក យូន ស៊ុកយ៉ុល (Yoon Suk Yeol)៖ ជាក់ស្តែង លោកកាន់តំណែងតាំងពីឆ្នាំ២០២២ មកទល់បច្ចុប្បន្ន។ នៅថ្ងៃទី៣ ខែធ្នូ ឆ្នាំ២០២៤ លោក យូន បានប្រកាសច្បាប់អាជ្ញាសឹក ដោយលើកឡើងពីការគំរាមកំហែងពីកងកម្លាំងប្រឆាំងរដ្ឋដែលគាំទ្រកូរ៉េខាងជើង។ សូមជម្រាបថា ចលនានេះបានរំឭកដល់សម័យកាលរបស់លោកជុន ឌូវ៉ាន (Chun Doo-hwan)។
គួរបញ្ជាក់ថា សមាជិកសភាបានជំទាស់យ៉ាងតក់ក្រហល់ទៅនឹងក្រឹត្យនេះ ដោយបង្ខំឱ្យលោក យូន លុបចោលភ្លាមៗបន្ទាប់ពីចេញបានរយៈពេល៣ម៉ោង ខណៈកៅអីប្រធានាធិបតីកំពុងឡើងកម្តៅ៕
