រដ្ឋមន្រ្តីក្រសួងធម្មការ និងសាសនា អញ្ជើញបើកសិក្ខាសាលាស្តីពី កិច្ចសន្ទនាអន្តរជំនឿសាសនា ដើម្បីសុខដុមនីយកម្មសាសនានៅកម្ពុជា ឆ្នាំ២០២៤

ភ្នំពេញ៖ នាទីស្តីការក្រសួង នៅព្រឹកថ្ងៃទី៦ ខែធ្នូ ឆ្នាំ២០២៤ ឯកឧត្តមបណ្ឌិត ចាយ បូរិន រដ្ឋមន្រ្តីក្រសួងធម្មការនិងសាសនា អញ្ជើញជាអធិបតីបើកសិក្ខាសាលាស្តីពី កិច្ចសន្ទនាអន្តរជំនឿសាសនា ដើម្បីសុខដុមនីយកម្មសាសនានៅកម្ពុជា ឆ្នាំ២០២៤ ក្រោមប្រធានបទ “ការពង្រឹងភាពជាពលរដ្ឋល្អក្នុងសង្គមតាមរយៈសាសនមាគ៌ា”។

ឯកឧត្តមបណ្ឌិត ចាយ បូរិន បានមានប្រសាសន៍ថា សិក្ខាសាលានេះពិតជាមានសារៈសំខាន់ណាស់  ពីសុខដុមនីយកម្មសាសនានៅកម្ពុជា ក៏ដូចជាការបង្ហាញពីការយកចិត្ត ទុកដាក់របស់រាជរដ្ឋាភិបាល នីតិកាលទី៧ នៃរដ្ឋសភា ដឹកនាំដោយសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានបើកចំហរនូវសិទ្ធ សេរីភាព នៃជំនឿសាសនារបស់ ប្រជាពលរដ្ឋកម្ពុជា យ៉ាងពេញលេញ ទាំងលើឆាកជាតិ និងអន្តរជាតិ ព្រមទាំងបានដាក់ចេញនូវវិធានការ ឬយន្តការគន្លឹះសម្រាប់ចូលរួម អនុវត្តជាក់ស្តែងបន្ថែមទៀត ឱ្យសមស្របតាមការវិវត្តន៍របស់សង្គម ដើម្បី រួមចំណែកការអភិវឌ្ឍន៍សង្គមជាតិ។ ទន្ទឹមនឹងការផ្តល់នូវសិទ្ធសេរីភាពខាងជំនឿសាសនា ដែលរាជរដ្ឋាភិបាលផ្តល់ឲ្យ ការគ្រប់គ្រងនៃសាសនាក៏ត្រូវតែគោរពទៅតាមច្បាប់របស់ព្រះរាជាណាចក្រកម្ពុជាផងដែរ។

ឯកឧត្ដមបន្តថា ក្នុងនោះ ដើម្បីរក្សាឲ្យបាននូវភាពសុខដុមនីយកម្មក្នុងវិស័យសាសនាឲ្យបានស្ថិតស្ថេរ ក្នុងសាសនានីមួយៗ ដែលជាការរួមចំណែកធ្វើឱ្យយើង សម្រេចបាននូវ សង្គមជាតិមួយដ៏ល្អផូផង់គ្មានអំពើហិង្សា ការរើសអើង ការប្រកាន់ពូជសាសន៍ វណ្ណៈ ពណ៌សម្បុរ ការបែងចែកក្នុងចំណោមប្រជាពលរដ្ឋ ដែលបណ្តាលមកពី ភាពខុសគ្នា នៃជំនឿសាសនានីមួយៗ សំដៅទប់ស្កាត់រាល់ការយកសាសនា ធ្វើជាឧបករណ៍ បម្រើផលប្រយោជន៍បុគ្គល ដែលធ្វើឱ្យប៉ះពាល់ដល់ សេចក្តីថ្លៃថ្នូរនៃជំនឿសាសនា និងប្រែក្លាយសក្តានុពល របស់សាសនា នីមួយៗ ឱ្យទៅជាកម្លាំងចលករដ៏មានប្រសិទ្ធិភាពក្នុងការអភិវឌ្ឍន៍សេដ្ឋកិច្ច សង្គម រួមចំណែកការពារសុខសន្តិភាព សាមគ្គីភាព ប្រពៃណីវប្បធម៌ ទំនៀមទម្លាប់ជាតិ និងលើកកម្ពស់តម្លៃសីលធម៌ក្នុងសង្គមជាតិ។

ឯកឧត្តមបណ្ឌិត រដ្ឋមន្រ្តី បានផ្តល់ទស្សនទានដល់អង្គសិក្ខាសាលាទាំងមូលថា៖

១.សូមឱ្យមេដឹកនាំ និងបរិស័ទគ្រប់សាសនាទាំងអស់ គោរពព្រះវិន័យធម៌ ព្រះធម៌ក្នុងសាសនានីមួយៗ ស្របតាមច្បាប់របស់រាជរដ្ឋាភិបាល ដើម្បីសុខដុមនីយកម្មសាសនានៅកម្ពុជា។

២.សូមឱ្យបន្តចូលរួមថែរក្សាការពារ សន្តិភាព ស្ថេរភាព និងគាំទ្រ កម្មវិធីនយោបាយរបស់រាជរដ្ឋាភិបាល ក្នុងការអភិរក្សនិងការអភិវឌ្ឍ វិស័យសាសនានៅកម្ពុជាឱ្យមានភាពសុខដុមរមនាជានិរន្តរ៍ ។

៣.គោរពនិងអនុវត្តឱ្យបានម៉ឺងម៉ាត់ តាមគោលនយោបាយយុទ្ធសាស្ត្រ បញ្ចកោណដំណាក់កាលទី១ របស់រាជរដ្ឋភិបាលនីតិកាលទី៧ នៃរដ្ឋសភា ដែលដឹកនាំដោយ សម្តេចធិបតី នាយករដ្ឋមន្ត្រី នៃព្រះរាជាណាចក្រ កម្ពុជា។

៤.សូមឱ្យគ្រប់ភាគីពាក់ព័ន្ធនិងមេដឹកនាំសាសនា បន្តអនុវត្ត មុខងារតួនាទី ភារកិច្ចរបស់ខ្លួន ក្នុងការអប់រំទូន្មាន និងផ្សព្វផ្សាយឱ្យបាន ជ្រួតជ្រាបគ្រប់មជ្ឈដ្ឋានជាពិសេសបរិស័ទ ជាយុវជន គប្បីខិតខំកែច្នៃ ចំណេះដឹងជំនាញដែលខ្លួនមាន ទៅជាផលប្រយោជន៍ដែលសុចរិត ប្រកបដោយភាពរីកចម្រើន ជាទីស្រឡាញ់រាប់អាននៃអ្នកផងទាំងពួង បញ្ចៀសឱ្យបានជាដាច់ខាតនូវរាល់អធិករណ៍ទាំងក្នុងក្របខណ្ឌនៃសាសនា របស់ខ្លួន និងជាមួយសាសនាដទៃ។

៥.គោរពសេរីភាពខាងជំនឿដែលមានចែងក្នុងរដ្ឋធម្មនុញ្ញ នៃ ព្រះរាជាណាចក្រកម្ពុជា បង្កើនសាមគ្គីភាពរវាងគ្រប់សាសនា ដើម្បីប្រែក្លាយសក្តានុពលសាសនា ក្នុងការចូលរួមចំណែកថែរក្សាសន្តិភាព និងការ អភិវឌ្ឍប្រកបដោយចិរភាព ។

សូមជម្រាបជូនថា សិក្ខាសាលាស្តីពី កិច្ចសន្ទនាអន្តរជំនឿសាសនា ដើម្បីសុខដុមនីយកម្មសាសនានៅកម្ពុជា ឆ្នាំ២០២៤ ក្រោមប្រធានបទ “ការពង្រឹងភាពជាពលរដ្ឋក្នុងសង្គមតាមរយៈសាសនមាគ៌ា” នាឱកាសនេះ មានការអញ្ជើញចូលរួមដោយសម្តេច ព្រះមន្រ្តីសង្ឃទាំង២គណៈ  ,សមាជិកព្រឹទ្ធសភា រដ្ឋសភា តំណាងរាជរដ្ឋាភិបាល, ឯកឧត្តម លោកជំទាវ ថ្នាក់ដឹកនាំក្រសួងធម្មការនិងសាសនា, ថ្នាក់ដឹកនាំតំណាងក្រសួង-ស្ថាប័នអន្តរក្រសួង, អភិបាលរងរាជធានី-ខេត្ត, ប្រធានមន្ទីរធម្មការនិងសាសនាទាំង២៥ខេត្ត-ក្រុង, ថ្នាក់ដឹកនាំឥស្លាមសាសនា ,ថ្នាក់ដឹកនាំគ្រិស្តសាសនា និងតំណាងអង្គការពាក់ព័ន្ធ សរុបប្រមាណ៣២៤អង្គ/នាក់៕