សម្តេចនាយករដ្ឋមន្ត្រី សម្រេចស្ថាបនាផ្លូវក្រាលកៅស៊ូប្រវែងជិត៩គីឡូម៉ែត្រ និងផ្លូវបេតុងប្រវែង១,៥គីឡូម៉ែត្រ ភ្ជាប់ពីផ្លូវបេតុងចាស់ ទៅដល់តំបន់អភិរក្សជលផលកំពង់ភ្លុក ខេត្តសៀមរាប តាមសំណើរបស់ប្រជាពលរដ្ឋ
ភ្នំពេញ៖ តាមសំណើរបស់ប្រជាពលរដ្ឋ បន្ទាប់ពីសម្តេចធិបតីបានលួចឆ្មក់ចុះទៅតំបន់អភិរក្សជលផលកំពង់ភ្លុក និងឆ្លៀតចុះសួរទុក្ខប្រជាពលរដ្ឋដែលរស់នៅតាមមូលដ្ឋាននាពេលថ្មីៗនេះ សម្តេចបានសម្រេចស្ថាបនាផ្លូវក្រាលកៅស៊ូប្រវែង៨គីឡូម៉ែត្រ និង៨៥០ម៉េត្រ និងផ្លូវបេតុងប្រវែង១,៥គីឡូម៉ែត្រ ដែលតភ្ជាប់ពីផ្លូវបេតុងចាស់ រហូតទៅដល់តំបន់ អភិរក្សជលផលកំពង់ភ្លុក ស្ថិតក្នុងឃុំកំពង់ភ្លុក ស្រុកប្រាសាទបាគង ខេត្តសៀមរាប។
សម្តេចបវរធិបតី ហ៊ុន ម៉ាណែត បានប្រាប់អ្នកឧកញ៉ាបណ្ឌិត សៀង ណាំ តំណាងរាស្ត្រមណ្ឌលសៀមរាប និងជាប្រធានកងវិស្វកម្ម សម្តេចតេជោ ហ៊ុន សែន ប្រចាំខេត្តសៀមរាប ដើម្បីចុះមកពិនិត្យ និងសិក្សាស្ថាបនាផ្លូវក្រាលកៅស៊ូ និងចាក់ផ្លូវបេតុងភ្ជាប់ជាមួយផ្លូវបេតុងចាស់នេះតែម្តង។
ក្រោយទទួលបានបទបញ្ជារបស់សម្តេចបវរធិបតី ហ៊ុន ម៉ាណែត អ្នកឧកញ៉ាបណ្ឌិត សៀង ណាំ នៅថ្ងៃទី០៣ ខែធ្នូ ឆ្នាំ២០២៤នេះ បានប្រញាប់រួតរះដឹកនាំក្រុមការងារចុះដល់ទីតាំងផ្លូវខាងលើ ដើម្បីពិនិត្យ និងសិក្សាធ្វើយ៉ាងស្ថាបនាផ្លូវនេះឱ្យបានឆាប់រួចរាល់ តាមការស្នើសុំរបស់ប្រជាពលរដ្ឋដោយផ្ទាល់ជាមួយសម្តេចបវរធិបតី នាយករដ្ឋមន្ត្រី៕
