ភ្នំពេញ៖ ឯកឧត្ដម សោម សុគន្ធ រដ្ឋលេខាធិការ តំណាងលោកជំទាវបណ្ឌិតសភាចារ្យ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ បានអញ្ជើញបើកមហោស្រពជាតិភាពយន្តខ្នាតខ្លីកម្ពុជា លើកទី៤ ដែលរៀបចំដោយនាយកដ្ឋានសិល្បៈភាពយន្ត និងផ្សព្វផ្សាយវប្បធម៌ នាល្ងាចថ្ងៃទី២៥ ខែវិច្ឆិកា ឆ្នាំ២០២៤ នៅសាលសន្និសីទចតុមុខ។
មហោស្រពជាតិភាពយន្តខ្នាតខ្លីកម្ពុជា នឹងធ្វើការចាក់បញ្ចាំងភាពយន្តខ្នាតខ្លីចំនួន ៥៨ស្នាដៃ នៅតាមបណ្តារោងភាពយន្តមួយចំនួនក្នុងរាជធានីភ្នំពេញ ដោយអនុញ្ញាតឲ្យទស្សនិកជនចូលទស្សនាដោយសេរី ព្រមទាំងអាចបោះឆ្នោតជ្រើសរើសភាពយន្ត ដែលខ្លួនពេញចិត្តដើម្បីទទួលពានរង្វាន់ភាពយន្តមានអ្នកគាំទ្រច្រើន។
នាឱកាសនោះ ឯកឧត្ដម សោម សុគន្ធ បានឲ្យដឹងថា មហោស្រពជាតិភាពយន្តខ្នាតខ្លីកម្ពុជា បានដើរតួនាទីយ៉ាង សំខាន់ ក្នុងការបង្កើតធនធានមនុស្សថ្មីៗ ប្រកបដោយសមត្ថភាព ទេពកោសល្យក្នុងវិស័យភាពយន្ត សម្រាប់បច្ចុប្បន្ន និងអនាគត។
ឯកឧត្ដមបានបន្តថា យុវជនទាំងអស់បានចូល រួមចំណែកយ៉ាងសកម្ម ក្នុងការបង្កើតស្នាដៃភាពយន្តថ្មីៗ ប្រកបដោយគំនិតច្នៃប្រឌិត ព្រមទាំងបានបង្កប់នូវអត្ថន័យ ខ្លឹមសារ អប់រំ សីលធម៌ គុណធម៌ និង អត្តសញ្ញាណជាតិ ដែលសកម្មភាពទាំងនេះ មិនត្រឹមតែបានជួយអភិឌ្ឍឧស្សាហកម្មភាពយន្តកម្ពុជាប៉ុណ្ណោះទេ តែថែមទាំងបានចូលរួមចំណែកយ៉ាងសំខាន់ ក្នុងការថែរក្សា ការពារ វប្បធម៌ ប្រពៃណីទំនៀមទម្លាប់របស់ជាតិយើង។
ជាមួយគ្នានេះ ឯកឧត្ដម ប៉ុក បូរក្ស ប្រធាននាយកដ្ឋានសិល្បៈភាពយន្ត និងផ្សព្វផ្សាយវប្បធម៌ បានឲ្យដឹងថា មហោស្រពជាតិភាពយន្តខ្នាតខ្លីកម្ពុជាលើកទី៤ មានស្នាដៃភាពយន្តខ្នាតខ្លីសុំចូលរួមប្រកួតប្រជែង ចំនួន ៤៦ ស្នាដៃ ដែលក្នុងនោះមានភាពយន្តខ្លីសម្រាប់ប្រឡងចំនួន ៣៤ ស្នាដៃ និងស្នាដៃឯកសារភាពយន្តខ្នាតខ្លីសម្រាប់ប្រកួតប្រជែងចំនួន ១២ ស្នាដៃ។
តាមគម្រោងមហោស្រពជាតិភាពយន្តខ្នាតខ្លីកម្ពុជាលើកទី៤ នឹងត្រូវបិទបញ្ចប់ ហើយប្រកាសលទ្ធផលម្ចាស់ជ័យលាភីនៅរសៀលថ្ងៃទី៣០ ខែវិច្ឆិកា ឆ្នាំ២០២៤ នៅសាលសន្និសីទចតុម្មុខ។ មហោស្រពជាតិភាពយន្តខ្នាតខ្លីកម្ពុជាលើកទី៤ មានរង្វាន់ធំចំនួន ៤ និងរង្វាន់លើកទឹកចិត្តចំនួន ៩ ផ្សេងទៀត។ ក្នុងនោះចំណាត់ថ្នាក់លេខ ១ ទទួលបានពានរង្វាន់មាស ១ អមដោយទឹកប្រាក់ចំនួន ១២ លានរៀល, លេខ ២ ទទួលបានពានប្រាក់មួយ អមដោយទឹកប្រាក់ ៨ លានរៀល, លេខ ៣ ទទួលបានពានសំរឹទ្ធ អមដោយទឹកប្រាក់ ៤ លានរៀល និងពានរង្វាន់ភាពយន្តឯកសារខ្លី នឹងទទួលបានពានមួយអមដោយទឹកប្រាក់ ២ លានរៀល។ ក្រៅពីនេះ ក៏មានពានរង្វាន់លើកទឹកចិត្តមួយចំនួនទៀតផងដែរ៕
