អាជ្ញាធរជួយសង្គ្រោះមនុស្សចម្រុះជាតិសាសន៍១៨នាក់ ក្រោយលិចទូកដឹកភ្ញៀវទេសចរ និងទំនិញរបស់ក្រុមហ៊ុនស្ពីតហ្វឺរឺ

ភ្នំពេញ៖ បើតាមការឱ្យដឹងពីមន្ត្រីសមត្ថកិច្ចនគរបាលព្រំដែនទឹក ដែលបានចុះប្រតិបត្តិការជួយសង្គ្រោះ បានឱ្យដឹងថា មនុស្សប្រុសស្រីចម្រុះជាតិសាសន៍ចំនួន១៨នាក់ ដែលរួមមានទាំងជនជាតិខ្មែរផងនោះ ត្រូវបានជួយសង្គ្រោះអាយុជីវិតមកកាន់កន្លែងមានសុវត្ថិភាពហើយ បន្ទាប់ពីទូករបស់ពួកគេត្រូវបានលិចចូលទៅក្នុងសមុទ្ទ កាលពីល្ងាចថ្ងៃទី២១ ខែវិច្ឆិកា ឆ្នាំ២០២៤។

សមត្ថកិច្ចនគរបាលព្រំដែនទឹក បញ្ជាក់ថា កាលពីវេលាម៉ោងជាង១៦ៈ៣០នាទៅល្ងាច មានប្រជានេសាទរាយការណ៍តាមអាយកូមមកថា មានករណីលិចទូកមួយគ្រឿងរបស់ក្រុមហ៊ុនស្ពីតហ្វឺរឺ ដែលមានដឹកភ្ញៀវទេសចរបរទេសផង និងដឹកទំនិញផ្ទុកនៅលើទូកនោះផង បានជួបឧប្បត្តិហេតុលិចនៅសមុទ្ទម្តុំជិតកូនកោះ ស្ថិតក្នុងភូមិដើមថ្កូវ សង្កាត់កោះរ៉ុង ក្រុងកោះរ៉ុង ខេត្តព្រះសីហនុ ដោយសារតែខូចម៉ូទ័របូមទឹក។ មន្ត្រីនគរបាលដដែលឱ្យដឹងបន្តថា ទូកនោះមានបណ្តោយប្រវែង២៦ម៉ែត្រ និងទទឹង៦ម៉ែត្រ។

បន្ទាប់ពីទទួលបានដំណឹងនេះភ្លាម ក្រុមការងារទូកអូប័រល្បឿនលឿនរបស់អ្នកឧកញ៉ា ទៀ វិចិត្រ និងក្រុមសង្គ្រោះស្ម័គ្រចិត្តមានម៉ូតូទឹក បានចេញទៅអន្តរាគមន៍ជួយស្រង់មនុស្សនៅលើទូកទាំងអស់បានដោយសុវត្ថិភាព ប៉ុន្តែទូកត្រូវបានលិចចូលទៅក្នុងសមុទ្ទបាត់ បណ្តាលឱ្យខូចខាត និងបាត់បង់សម្ភាររួមមាន៖ ស៊ីម៉ងត៍២តោន, ម៉ូតូ Scopy ១គ្រឿង, ទំនិញចម្រុះជាច្រើនមុខទៀត និងទូកបានលិចបាត់ចូលសមុទ្ទ។ តែយ៉ាងណា ជាភព្វសំណាងមនុស្សទាំងអស់ត្រូវបានជួយសង្គ្រោះអាយុជីវិតបានដោយសុវត្ថិភាព។ ចំពោះជនរងគ្រោះទាំង១៨នាក់នោះរួមមាន៖ ស្ត្រីជនបរទេសចំនួន៥នាក់, ស្ត្រីជនជាតិខ្មែរម្នាក់, បុរសជនបរទេស៤នាក់ និងបុរសជនជាតិខ្មែរ៨នាក់ ៕