សម្ដេចធិបតី ហ៊ុន ម៉ាណែត៖ រាជរដ្ឋាភិបាលកម្ពុជា ប្រកាន់ជំហរដោះស្រាយដោយសន្ដិវិធី ជាជាងប្រើយន្តការជម្លោះដោយប្រដាប់អាវុធ ជុំវិញបញ្ហា «កោះគុត»
ភ្នំពេញ៖ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ដ្រីនៃកម្ពុជា បានបញ្ជាក់ថា ជុំវិញករណី «កោះគុត» រាជរដ្ឋាភិបាលកម្ពុជា ប្រកាន់ជំហរដោះស្រាយដោយសន្តិវិធី ជាជាងប្រើយន្តការជម្លោះដោយកម្លាំងប្រដាប់អាវុធ។
នាឱកាសអញ្ជើញប្រគល់សញ្ញាបត្រជូនដល់និស្សិត សាកលវិទ្យាល័យភូមិន្ទភ្នំពេញ នៅថ្ងៃទី២១ ខែវិច្ឆិកា ឆ្នាំ២០២៤ សម្តេចមហាបវរធិបតី ហ៊ុន ម៉ាណែត បានថ្លែងមានប្រសាសន៍ថា បញ្ហាកោះគុត រាជរដ្ឋាភិបាលប្រកាន់ជំហរពីរ ទី១.ភាពចាស់ទុំខាងនយោបាយ, ទី២.ទទួលខុសត្រូវចំពោះជាតិ និងប្រជាជន ចំពោះបូរណភាពទឹកដី និងអធិបតេយ្យជាតិ។
ក្រោយមានអ្នកចោទប្រកាន់ថា រាជរដ្ឋាភិបាលធ្វើឱ្យបាត់ «កោះគុត» នោះ សម្ដេចធិបតី ហ៊ុន ម៉ាណែត ក៏បានដាក់ជាសំណួរថា តើមានអំណះអំណាងអ្វីមកបញ្ជាក់ថា «កោះគុត» កាប់កាន់ដោយភាគីថៃ ខណៈភាគីកម្ពុជា និងថៃ មិនទាន់ឯកភាពគ្នាផងនោះ ហើយភាគីទាំងពីរ បាននិងកំពុងចរចាគ្នា។
សម្ដេចធិបតី គូសបញ្ជាក់ថា រាជរដ្ឋាភិបាល មានភាពទទួលខុសត្រូវចំពោះជាតិ ព្រោះថា រឿងព្រំដែនត្រូវប្រើរយៈពេលវែង និងអត់ធ្មតណាស់ ដូច្នេះ ការទទួលខុសត្រូវរបស់រាជរដ្ឋាភិបាល ក្នុងការដោះស្រាយបញ្ហានេះ រាជរដ្ឋាភិបាល មានការប្ដេជ្ញាចិត្តខ្ពស់ក្នុងការ ការពារទឹកដី ឲ្យបានជាដាចខាត់ ៕
