ភ្នំពេញ៖ មន្រ្តីនគរបាលនៃក្រសួងមហាផ្ទៃ បានដកកាំភ្លើងបាញ់ ប្តីប្រពន្ធ២នាក់បានរងរបួសធ្ងន់ និងត្រូវបញ្ចូនទៅសង្គ្រោះនៅមន្ទីរពេទ្យភ្លាមៗ ដោយសារទាស់សម្តីគ្នា។
ហេតុការណ៍នេះ បានកើតឡើយនៅចំណុចបរិវេណផ្ទះជួលមួយកន្លែង ផ្លូវលំ ភូមិព្រែកឫស្សីលិច សង្កាត់ព្រែកឫស្សី ក្រុងតាខ្មៅ កាលពីវេលាម៉ោង០៩យប់ ថ្ងៃទី១៧ ខែវិច្ឆិកា ឆ្នាំ២០២៤នេះ។
បើតាមលោក យី វណ្ណដា អធិការក្រុងតាខ្មៅ បានឱ្យដឹងថា នៅថ្ងៃកើតហេតុ មានសេចក្ដីរាយការណ៍ពីពលរដ្ឋថាមានករណីផ្ទុះអាវុធជាច្រើនគ្រាប់បណ្ដាលឱ្យប្ដីប្រពន្ធមួយគូរងរបួសធ្ងន់ដេកដួលក្នុងថ្លុកឈាម ហើយភ្លាមៗនោះ កម្លាំងជំនាញដឹកនាំដោយលោកឧត្តមសេនីយ៍ទោ ឈឿន សុចិត្ត ស្នងការនគរបាលខេត្តកណ្តាល បានចុះទៅដល់ទីតាំងកើតហេតុ ព្រមទាំងឃាត់ខ្លួនជនដៃដល់យកទៅសាកសួរ ។
លោកអធិការក្រុងតាខ្មៅ បានបន្តថា ឈ្មោះ សយ សុផានី ភេទប្រុស ជាមន្ត្រីនគរបាលជាតិ ឋានន្តរស័ក្តិជាវរសេនីយ៍ឯក (ស័ក្តិ៥) ឋានៈប្រធានសាខាប្រមូលថវិកាចំណូល នាយកដ្ឋានផែនការសេដ្ឋកិច្ច និងហិរញ្ញវត្ថុ នៃអគ្គនាយកដ្ឋានភស្តុភារ និងហិរញ្ញវត្ថុ ក្រសួងមហាផ្ទៃ ។ រីឯ ជនរងគ្រោះទី ១.ឈ្មោះ ស៊ាង តូម៉ា ភេទប្រុស អាយុ៥៤ឆ្នាំ មុខរបររត់កង់បី (PassApp) រងរបួសចំនួន៣គ្រាប់ និងទី២.ឈ្មោះ ជា សុភី ភេទស្រី អាយ៥៤ឆ្នាំ មុខរបរជាមេផ្ទះ។ ពួកគេទាំង២មានទីលំនៅចំណុចទីតាំងកើតហេតុ។
ក្រោយការឃាត់ខ្លួនកម្លាំងជំនាញបានបើកការសាកសួរជំហានដំបូងថា មុនឈានដល់ការធ្វើសកម្មភាពបាញ់ប្រហារនេះ ដំបូងឡើយជនដៃដល់ និងជនរងគ្រោះ ជាអ្នកជួលបន្ទប់ក្បែរគ្នា ស្រាប់តែនៅថ្ងៃកើតហេតុខាងលើពួកគេបានឈ្លោះប្រកែកគ្នាតឹងសសៃក រហូតដល់ខ្មាន់កាំភ្លើងទប់កំហឹងលែងជាប់ក៏ទាញកាំភ្លើងបាញ់ទាំងកំរោលបែបនេះ។
បច្ចុប្បន្ន កងកម្លាំងកំពុងកសាងសំណុំរឿង និងរៀបចំបញ្ចូនជនសង្ស័យ រួមទាំងអាវុធខ្លី54 ជាវត្ថុតាងទៅកាន់តុលាការ ដើម្បីចាត់ការតាមនិតិវធីច្បាប់៕
