សម្តេចធិបតី ហ៊ុន ម៉ាណែត និងលោកជំទាវបណ្ឌិត ឧបត្ថម្ភអំណោយជូនអតីតយុទ្ធជន និងគ្រួសារអតីតយុទ្ធជន ដែលមានជីវភាពលំបាកខ្វះខាត
ភ្នំពេញ៖ លោកស្រី ស្រី លីណា ប្រធានមន្ទីរសង្គមកិច្ច អតីតយុទ្ធជន និងយុវនិតិសម្បទា ខេត្តកំពង់ស្ពឺ ជាអនុប្រធានអចិន្រ្តៃយ៍គណៈកម្មាធិការសមាគមអតីតយុទ្ធជនកម្ពុជា ខេត្តកំពង់ស្ពឺ តំណាង ឯកឧត្តម ឧត្តមសេនីយ៍ទោ ម៉ាន់ ម៉ាច មេបញ្ជាការតំបន់ប្រតិបត្តិការសឹករងកំពង់ស្ពឺ ជាប្រធានសមាគមអតីតយុទ្ធជនកម្ពុជាខេត្តកំពង់ស្ពឺ នៅថ្ងៃទី១៣ ខែវិច្ឆិកា ឆ្នាំ២០២៤ បានដឹកនាំ ក្រុមការងារ គណៈកម្មាធិការ ស.អ.កខេត្ត និង គណៈកម្មាធិការ ស្រុកថ្ពង ស្រុកឱរ៉ាល់ ស្រុកភ្នំស្រួច និងក្រុងច្បារមន បានអញ្ជើញសំណេះសំណាលសាកសួរសុខទុក្ខ និងបាននាំយកអំណោយស្បៀងអាហាររបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា និងលោកជំទាវបណ្ឌិត ឧបត្ថម្ភជូនអតីតយុទ្ធជន និងគ្រួសារអតីតយុទ្ធជនចំនួន ៥៧គ្រួសារ ដែលមានជីវភាពលំបាកខ្វះខាតខ្លាំង ក្នុងនោះ ÷ នៅស្រុកថ្ពង. ស្រុកឱរ៉ាល់ ស្រុកភ្នំស្រួច. និងក្រុងច្បារមន ដែលមានអតីតយុទ្ធជន និងគ្រួសារមានជីវភាពខ្វះខារតចំនួន ៥៧គ្រួសារ ។
លោកស្រី ស្រី លីណា បានពាំនាំនូវការផ្ដាំផ្ញើសាកសួរសុខទុក្ខពីសំណាក់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា និងលោកជំទាវបណ្ឌិត ដែលសម្ដេចនិងលោកជំទាវ តែងតែគិតគូរយកចិត្តទុកដាក់ពីសុខទុក្ខ និងជីវភាពរស់នៅរបស់បងប្អូនអតីតយុទ្ធជន។ ជាមួយនេះដែរ សម្ដេចមហាបវរធិបតី និងលោកជំទាវ លោកបានជូនពរដល់បងប្អូនអតីតយុទ្ធជនទាំងអស់ និងក្រុមគ្រួសារសូមបានប្រកបតែសេចក្តីសុខ សេចក្តីចម្រើន សុខភាពល្អ និងសុភមង្គលគ្រប់ ពេលវេលា ។
លោកស្រី ស្រី លីណា បានអំពាវនាវដល់បងប្អូនអតីតយុទ្ធជន និងគ្រួសារ ត្រូវចេះថែទាំសុខភាព រស់នៅស្អាត មានអនាម័យ ដើម្បីជៀសផុតពីជម្ងឺតំកាត់ផ្សេងៗ និងខិតខំប្រកបរបររកទទួលទានដោយសុចរិតទៀងត្រង់ ព្រមទាំងខិតខំបង្កបង្កើនផលដាំដំណាំ ចិញ្ចឹមសត្វ និងត្រូវចូលរួមជាមួយអាជ្ញាធរមូលដ្ឋានអនុវត្តឱ្យបានជោគជ័យនូវគោល នយោបាយភូមិ.ឃុំ មានសុវត្ថិភាពរបស់រាជរដ្ឋាភិបាល។
នៅក្នុងឱកាសនេះដែរ លោកស្រី ប្រធានមន្ទីរ អនុប្រធានអិន្រ្តៃយ៍គណៈកម្មាធិការសមាគម ក៏បាននាំយកនូវអំណោយស្បៀងអាហារ គ្រឿងឧបភោគ បរិភោគរបស់សម្តេចមហាបវរធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី ឧបត្ថម្ភជូនដល់ក្រុមគ្រួសារអតីតយុទ្ធជន ទាំងបួន ក្រុង/ស្រុក ចំនួន ៥៧គ្រួសារ សម្រាប់ដោះស្រាយជីវភាពប្រចាំថ្ងៃ ដោយក្នុង ១គ្រួសារទទួលបាន៖ អង្ករចំនួន ២៥គីឡូក្រាម មីជាតិចំនួន ១កេស ទឹកត្រីចំនួន ១យួរ ទឹកស៊ីអ៉ីវចំនួន ១យួរ ត្រីខកំប៉ុងចំនួន ១យួរ ផងដែរ ។ ដោយឡែកស្រុកឱរ៉ាល់ លោកអភិបាលស្រុក និងជាប្រធានកិត្តិយស សមាគមអតីតយុទ្ធជនស្រុកឱរ៉ាល់ បានជួយឧបត្ថម្ភ ភួយ ចំនួន ១៧ សម្រាប់អតីតយុទ្ធជន និងគ្រួសារ ១៧គ្រួសារ/នាក់ ដោយម្នាក់ៗទទួលបានភួយបន្ថែមចំនួន១ និងក្រុងច្បារមន លោកអភិបាលក្រុង និងជាប្រធានកិត្តិយស សមាគមអតីតយុទ្ធជនក្រុងច្បារមន បានជួយឧបត្ថម្ភថវិកា ចំនួន ៣២០,០០០ (សាមសិបពីរម៉ឺន) រៀល សម្រាប់អតីតយុទ្ធជន និងគ្រួសារ ១៦គ្រួសារ/នាក់ ដោយម្នាក់ៗទទួលបានថវិកាបន្ថែមចំនួន ២០,០០០ (ម្ភៃពាន់) រៀល ។
សរុបអំណោយ អង្ករចំនួន ១,៤២៥គីឡូក្រាម មីជាតិចំនួន ៥៧កេស ទឹកត្រីចំនួន ៥៧យួរ ទឹកស៊ីអ៉ីវចំនួន ៥៧យួរ ត្រីខកំប៉ុងចំនួន ៥៧យួរ ភួយចំនួន ១៧ និងថវិកា ៣២០,០០០ (សាមសិបពីរម៉ឺន) រៀល ។
ក្នុងនោះអតីតយុទ្ធជន និងក្រុមគ្រួសារអតីតយុទ្ធជន ទាំង ៥៧គ្រួសារ បានសូមគោរពថ្លែងអំណរគុណដ៏ជ្រាលជ្រៅជាទីបំផុតសម្តេចធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី ដែលតែងតែជួយដោះស្រាយនូវរាល់ការលំបាកខ្វះខាតរបស់ពួកគាត់បានទាន់ពេលវេលា សូមប្តេជ្ញាចូលរួម និងគាំទ្ររាជរដ្ឋាភិបាលក្រោមការដឹកនាំប្រកបដោយកិត្តិបណ្ឌិតរបស់ សម្តេចមហាបវរធិបតី ហ៊ុន ម៉ាណែត ជានាយករដ្ឋមន្ត្រី និងសូមជូនពរ សម្តេច លោកជំទាវបណ្ឌិត បុត្រាបុត្រី និងក្រុមការងារ បានជួបប្រទះនូវពុទ្ធពរទាំង៤ប្រការគឺអាយុ វណ្ណៈ សុខៈ និងពលៈ កុំបីឃ្លៀងឃ្លាតឡើយ។
