មន្ត្រីជាន់ខ្ពស់ក្រសួងអប់រំ អញ្ជើញបិទការបោះជំរំកាយរឹទិ្ធរៀមច្បងថ្នាក់ជាតិ លើកទី២ ឆ្នាំ២០២៤
ភ្នំពេញ៖ លោកជំទាវ គឹម សេដ្ឋានី រដ្ឋលេខាធិការប្រចាំការ និងជាអនុប្រធានកាយរឹទិ្ធជាតិកម្ពុជា តំណាងដ៏ខ្ពង់ខ្ពស់ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្រ្តី រដ្ឋមន្រ្តីក្រសួងអប់រំ យុវជន និងកីឡា និងជាប្រធានកាយរឹទិ្ធជាតិកម្ពុជា អមដំណើរដោយថ្នាក់ដឹកនាំក្រសួងអប់រំ យុវជន និងកីឡា រដ្ឋបាលខេត្តកំពង់ធំ សមាគមកាយឫទ្ធិនារីកម្ពុជា និងអាជ្ញាធរពាក់ព័ន្ធ នាថ្ងៃទី៦ វិច្ឆិកា បានចូលរួមជាអធិបតីក្នុងពិធីបិទការបោះជំរំកាយរឹទិ្ធរៀមច្បងថ្នាក់ជាតិ លើកទី២ ក្រោមប្រធានបទ “ចូលរួមកាយរឹទិ្ធកម្ម ដើម្បីវឌ្ឍនភាពអនាគតរបស់ខ្ញុំ” នៅវិទ្យាស្ថានបច្ចេកវិទ្យាកំពង់ឈើទាល ខេត្តកំពង់ធំ។
លោកជំទាវរដ្ឋលេខាធិការប្រចាំការ បានថ្លែងថាការបោះជំរំកាយរឹទិ្ធ គឺជាថ្នាលអប់រំ និងសាលារៀនចល័ត ដែលរៀបចំឡើងស្របតាមក្របខណ្ឌអាយុរបស់កាយរឹទិ្ធរៀមច្បង មានចន្លោះអាយុ១៨-២៥ឆ្នាំ ដោយមានរបៀបវារៈកម្មវិធី និងសកម្មភាពចំនួន ៣២ម៉ោង ចែកចេញសកម្មភាពជា ២ផ្នែក៖ ផ្នែកទី១-សកម្មភាពក្នុងជំរំ (On-site Activity) និងផ្នែកទី២-សកម្មភាពក្រៅជំរំ (Off-site Activity)។
ការបោះជំរំកាយរឹទិ្ធរៀមច្បងថ្នាក់ជាតិ លើកទី២ ដែលមានប្រតិភូកាយរឹទិ្ធរៀមច្បង កាយរឹទិ្ធជំទង់ និងកាយរឹទិ្ធស្ម័គ្រចិត្តចំនួន ៤២០នាក់ មកពី២១ គ្រឹះស្ថានឧត្តមសិក្សាសាធារណៈ ឯកជន និងកាយរឹទិ្ធរាជធានី ខេត្ត មានរយៈពេល ៥ថ្ងៃ ចាប់ពីថ្ងៃទី២ ដល់ថ្ងៃទី៦ ខែវិច្ឆិកា ឆ្នាំ២០២៤ ដោយបែងចែកជា ៤ អនុជំរំ ស្មើនឹង១២កង ៕
